Mungkan Matsan Masha Nhtoi Hta Wa Sarabyin Misa Hkungga Laksan Naung Jau Ya Ai

Mungkan Matsan Masha Nhtoi Hta Wa Sarabyin Misa Hkungga Laksan Naung Jau Ya Ai

Dai nhtoi hta Wa Sarabyin Francis gaw akyu hpyi ai hta, matsan jam jau ai ni hpe garum shingtau ai hta, Kabu Gara Shiga hpe sakse hkam ai hta shakut let Hkristan Hpung masha ni a prat hpe ra kadawn ai ni a matu tai nga u ga ngu n gun jaw da ai.

Matsan masha ni a matu masat ding sat ai mungkan nhtoi hpe 2016 shaning hta Wa Sarabyin Francis hkum nan masat da ai rai nna, shaning shagu, Pranwan Ladaw 33 ngu na laban nhtoi hpe sha-ang da ai rai nga ai.

Daining, 2020 shaning hta gaw November 15, laban ya shani ang ai rai nga ai. Daining na matu ga manoi gaw “Stretch forth your hand to the poor” “matsan masha ni hpe ta ladawn ya mu” ngu ai rai nga ai.

Misa Hkungga hpe San Peter Nawku Htingnu kaba hta Wa Sarabyin hkum nan nawng jau woi ai rai nna, Kabu Gara Shiga, Mt 25: 14 – 30 hpe sumru woi da ai; dai chyum daw gaw Madu Yesu a ga shadawn “mayam marai masum hpe shanhte a madu gumhpraw arang jaw da ai” ga shadawn rai nga ai.

Ndai ga shadawn gaw anhte sak prat a ningpawt daju hte hpang jahtum rai nga ai ngu Wa Sarabyin Francis tsun da ai.

Ningpawt Ninghpang: gumhpraw arang ap jaw da ai lam

 “Yawng gaw mai kaja ai lam hte hpang ai re.”

Anhte a prat gaw Karai Kasang a chyeju hte sha hpang ga ai. Dai gaw Karai Kasang anhte hpe ap jaw da ai chyeju (gumhpraw arang) rai nga ai.

“Anhte gaw anhte madu da lu ai sutgan da madung tai nga ga ai n rai; Madung gaw anhte hpe Karai Kasang jaw ya ai asak, mai kaja lam hte Karai Kasang jaw da ai tsawm htap ai lam ni she rai nga ai. Dai gaw Karai Kasang hte hkrang bung sumla hku hpan da hkrum ai anhte a wenyi nan rai nga ai. 

Anhte a prat hpe malap mali kau shangun chye ai ja gumhpraw hte kaga agung alau ni hpe shadi ra ga ai lam Wa Sarabyin Francis shadum da ai.

Kaja ai hku hkap la chye ai nna hkang galaw ai rai yang sha, anhte hta nga ai Karai Kasang jaw da ai atsam hpe mai kaja ai lam a matu jai lang lu na ga ai.

“Karai Kasang gaw anhte shawng daw de gara hku nga lai wa ai ngu ai hpe ra marit nna sawk sagawn ai lam nnga ai sha, shi bai du sa ai shaloi apu asi pu si da nga ai hpe sha madun na matu hpyi shawn ai re,” ngu mung sumru woi da ai.

Daju madung: Daw jau ai prat

Ga shadawn a daju madung gaw daw jau chye ai prat masa nan rai nga ai. Shangun ma a bungli gaw “daw jau” ai bungli rai nga ai.

“Anhte pu si lu ai apu asi gaw anhte prat a lachyum hpe shapraw ya nga ai. Daw jau prat hta nnga ai ni gaw, ndai prat hta kachyi mi sha daw jau ma ai,” ngu mung shadum da ai. Kabu Gara Shiga gaw sadi dung kam sham ai shangun ma ni a shakut shaja ra ai lam hpe asan sha tsun dan nga ai.

Mai kaja ai lam ni hpe mahkawng da ai lam nnga ai rai yang, dai mai kaja ai lam ni mat mat na; anhte a prat hpe shadawn ai gaw anhte ni gade ram mahkawng da ai ngu ai hte shadawn ai n re; anhte ni apu asi gade daram pu si shangun sai ngu ai hte she shadawn ai rai nga ai.

Mai kaja lam a matu n myit ai sha, madu lu na matu sha mahkawng da ai gaw kaman lila rai nga ai. Anhte kumhpa lu la ai gaw anhte hkum nan kumhpa tai nga na matu rai nga ai.

Hpang Jahtum: Awng dang ai lam hte tsawra ai lam shai hkat ai masa

Wa Sarabyin Francis gaw anhte prat a hpang jahtum hte seng ai lam hpe tsun dan da ai.

Anhte a prat hpang jahtum aten hta teng man ai lam dan dawng wa na ra ai. Ndai mungkan ga na awng dang ai lam, arawng ana power, hte ja gumhpraw lam ni gaw prat a lachyum hpe shapraw ya lu na n re ai. Tsaw ra ai lam chyu sha anhte hpe prat a lachyum hpe shapraw ya lu nna, dai gaw teng man ai sut su lam nan rai nga ai.

Dai majaw, matsan ai prat hku n kam nga ai rai yang, anhte ni matsan masha ni hte yak hkak nga ai ni hta Madu Yesu hpe mu lu na matu Yesu kaw hpyi la ga; Matsan masha ni hpe daw jau ai gaw Madu Yesu hpe daw jau ai rai nga ai ngu Wa Sarabyin Francis, mungkan matsan masha ni a nhtoi hta mungga htawn da ai hpe Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-11/pope-francis-mass-world-day-poor-homily-roberto-malgesini.html