Sut Lu Nga Mai Lam Hta Sadi Dung Kangka Ai Gaw Grai Ahkyak Ai

Na sut gan nga ai shara kaw na myit masin mung nga nga lit dai ( Mt6: 21 ). Ja sut gan tam ai masha hta law hpa ai, myit marin ai myit gaw kalang ta kapyawn nna hkan nang wa nga ai. Garum ningtum ai magam san san galaw ai ni pyi law hpa ai myit ndum shami pru chye wa nga ai. Sut hpaga ga ai ni sut hpaga ga ai lam hta tinang a matu amyat nga jang galaw ma ai. Amyat n nga jang n galaw ma ai. Matut galaw shakut na nga jang amyat lu la hkra mahkrun tam la ma ai. Law hpa myit marin ai ana lu ai wa gaw ding hpring kangka sadi dung ai lam hpe hkan shatup na n’gun n rawng mat wa sai. Sut gan gaw anhte myit masin hpe gyit gumbat kau ya lu ai lam hpe Madu Yesu shadum da nga ai.

Masha langai hta ahkyak dik ai gaw shi a myit masin rai nga ai. Sut gan hta myit kap mat wa sai gaw shi sut gan nga ai shi myit ten tup du nga sai re. Awng dang ngang grin ai sut masa gaw gap na nga jang gaw sadi dung ai, ding hpring kangka ai ladat lang yang chyu sha aten galu hkam lu nga ai.

Tinang a dum nta, tinang myit masin ngwi pyaw simsa lam gaw gap ai aten hta ding hpring kangka ai hte sut lu nga mai lam hta shakut ra ai. Bungli kaji kaba n lata ai sha, bungli shagu hpe manu shadan nna galaw shakut chye ra ga ai. Sut lu nga mai lam hta sadi dung kangka ai lam gaw grai ahkyak nga ai.