Asak apart ram hkam kaja ai ni gaw tinang galaw lu ai bungli Lama Ma Hpe Galaw Ra Ai

Hpunau ni Simsa lam hpe gaw gap ga lamang hta, Anhte asak apart ram ai ni hkam kaja ai ni gaw tinang galaw lu ai bungli lama ma hpe galaw ra ai. ngu ai lam hpe jawm madat la yu ga. Hpa majaw nga yang asak apart ram wa sai num sha la sha marai shagu gaw bungli lama ma galaw nna shang gumhpraw lu yang sha myit ngwi simsa lam lu na rai nga ai. Asak gaw 30 ning du wa tim kanu kawa kaw lata hpyen nna gum hpraw hpyi taw nga ai. Grau sawng ai gaw Num mung la da sai, kasha mung lu sai, hpa bungli n galaw nna asak kaba sai kanu gai da kaw kap sha taw nga ai gaw sawng dik rai sai. Dai gaw grai yu kaji hpa rai nga ai. Nta n kau mi hta, asak kaba mat sai kanu kawa yen gahti gari tam jaw nga ai hpe sha la sha nna shani tup tup phone hkrai ahpye nga ai ramma ni grai nga nga ma ai. Dai Ramma ni myit hprang wa na matu, kanu kawa ni, ramma ningbaw ningla ni, manaw manang ni shada jawm shadum la ra sai

Francis myu sha hpaji ninghkring Charles Peguy gaw, shanhte a mungdan hta moi prat na bungli galaw masha ni a tsawm htap ai myit masa hpe tang madun da nga ai. Moi prat na bungli galaw masha ni gaw shanhte a bungli hpe grai tsawra manu shadan ma ai. Bungli galaw let myit pyaw simsa lam tam la ma ai. Hpawt ni hpa baw galaw na ngu myit nna mahkawn  hkawn  let jahpawt jau jau bungli galaw sa ma ai. Shani  shat sha la jahkring mi hkring la nna, atsam dat nna shana de du hkra bungli bai galaw ma ai. Shana de bungli hkring nna nta de wa jang mahkawn nna bai wa ma ai. Shanhte gaw bungli galaw nna gumhpraw gade lu na n myit ai sha bungli hpe sharawng shara hte galaw ma ai. Bungli gade ngut sai hpe yu nna myit pyaw ma ai. 

Hpa majaw nga yang magam bungli gaw tinang a prat re. Magam bungli gaw tinang a prat hte tinang a kun dinghku hpe a rawng lu shangun ai ngu kam ma ai. Bungli atsawm galaw ai majaw tinang a mare bu ga rawt galu kaba wa ai ngu kam ma ai. Hkau na galaw ai ni hkai rem amu galaw ai ni grai kabu pyaw let galaw ma ai. Shanhte a kashu kasha ni mung, wa gaw, hkau na kaba madu ai nga nna kabu gum rawng ma ai. Nye Wa gaw jawng sara re, Nye Nu gaw Tsi rung sara num re, Sara wun re nga nna kabu gum rawng let tsun ma ai. Dai gaw tinang galaw ai bungli gaw arawng sadang jaw ya ai sari sadang rawng ai ngu tsun mayu ai re.

          Francis mung na dung lahkum galaw ai laksama langai mi  gaw shi a myit hta, hkaw hkam wa dung na ting nyang  galaw nga n ngai ngu myit la nna atsawm sha galaw wu ai da. Tsun mayu ai gaw hkungga tsawra ai myit hte bungli galaw ai rai nga ai. Dai prat lai mat wa ai hpang Uropa dan hta, jak hte bungli galaw ai ladat lang wa ai ten kaw nna tsawm htap la ai myit masa ni hten run mat wa sai. Bungli madu ni bungli galaw masha ni hpe jak zawn jai lang ai. Bungli galaw masha ni mung gumhpraw grau law jaw na hpe chyu hpyi wa ma ai. Dai ten kaw nna bungli galaw ai ni a sari sadang shingkang n nga mat sai. Bungli loi galaw nna shabrai law law lu mayu ai myit jahten shang mat wa sai. Bungli a tsawm htap la ai manu hpe bungli galaw ai ni nan jahten kau masai. Bungli hpe myit lawm hkum lawm let n galaw mat sai majaw grau kaja ai hku gyin shapraw ai atsam mung n rawng mat sai. Rung rai ni law law galaw shapraw na sha myit ai majaw, jet ai kaja ai madang yawm mat wa sai. Bungli madu ni hte bungli galaw ni a lapran e  nta masha zawn tsawra hkungga ai myit ni yawm mat wa sai. Bungli galaw ai masha shada da mung,  manawn masham ma ai. Bungli madu ni mung bungli galaw ai ni hpe mayam zawn yam sha ma ai. Bungli galaw ai ni mung, shabrai law law jaw na matu atik anang hpyi wa ma ai. Dai manghkang a majaw magam bungli rawt galu kaba wa lam yawm mat wa sai. Ndai manghkang hpe mu chye ai ni gaw, bungli galaw ai ni hte bungli madu ni a lapran e myit masa bai gram la ra sai ngu ai dum chye ma ai.

Dai rai yang, Anhte a mungdan hta nga ai prat dep ramma ni gara ladat hte bungli a manu rawt wa hkra shakut na kun? Sut masa hta shakut mayu ai ramma ni gaw, kungzet nna nyan hpaji rawng ai ni rai ra ai. Sut masa, hpaga yamga hte seng nna tut nawng hkaja ra ai. Laili laika ni hpe tam hti chye ra ai. Hka ja masam maram ai lam hpe tinang a bungli prat glai wa ai hte maren dingyang, bungli madung langai mi hku nna lit la ra ai.

Zet tsang nyan marai rawng na grai ahkyak nga ai. Dai hta grau ahkyak ai gaw dinghpring kang ka ai myit masa lai len nga na grau ahkyak ai. Dai Myit masa gaw masha ni tinang hpe prat tup madi shadaw hkungga nga na lam a madung rai nga ai. Ja gumhpraw hte sut lu nga mai lam   hta, shada dip sha ai, shing jawng ai ntara ai hku mawp sha ai gaw koi kau n lu  hkan lawm wa na rai nga ai. Dai aten hta nang a matu lak nak kaba ngu na gaw dinghpring kangka ai myit rai nga ai. Dai ten sari sadang nga ra ai. Tsun mayu ai gaw nang a myit hpe hkang dang ra ai.Nang a tsun shaga ai ga teng man ra ai, laikyang sat lawat ni gaw kangka sadi dung ra ai. Dai hpe sari sadang dang rawng ai ngu mayu ai re.

Tinang hkum nan shut shai nga nna masha ni hpe mying jahten ai, shatan nhkan ga tsun ai shaloi, Shatan hkrum ai wa gaw grai machyi hkrum mat wa sai nga nna, masha law malawng shadu ma ai. Kaja wa nga yang, masha ni a mying jahten ya ai, shatan n hkan ga tsun ai wa madaw sari sum hkrat mat wa ai rai nga ai. Sut lu nga mai lam galaw ai ten hta mying jahten ai, jahpoi ahpyak ai lam hpe koi kau n lu nga ai. Dai Hpe tau nau hkyen lajang da ra ai. Dai gaw, gumhpraw jahpan chyarang hpe hkrak galaw da ai, magam gun masha shada myi man n lata ai sha, pre nem ai hte ganawn mazum ra ai, tinang galaw ai bungli hpe grau kangka hkra galaw ai. Galaw shapraw ai rung rai ni hpe madang dep hkra galaw ai. Ndai lam ni gaw tinang hpe jahpoi ahpyak ai ni hpe ning hkap gasat na matu lak nak kaja rai nga ai.

Kaga makawp maga lak nak ni naw nga ai. Dai gaw sut magam galaw ai kaga masha ni awngdang ai lam hpe hkaja kasi yu la u. Masha ni hkrat sum wa ai hpe mu jang, hpa majaw hkrat sum ai hpe hka ja sawk sagawn u. Tinang a mahkrum madup hpe mung masam maram dinglik yu u. Sut magam galaw ai ten hta, tinang chye galaw ai kungkyang ai bungli hpe madung da nna galaw u. Law hpa ai myit a majaw tinang n chye ai bungli hpe arang kaba shaw nna galaw ai gaw, hkrit hpa kaba rai nga ai. Lam atsawm n nga shi  ai nlung bum hku lung shakut ai masha hte bung nga ai. Aten shagu lahkam mi gashawt ai hte hkaraw de hkawn mat wa na rai nga ai. Tinang kungkyang ai bungli hpe shawng galaw nga nna, ram daw awng dang ai hpang bungli nnan bai jat mai ai. Sut du ni law law malawng gaw shanhte chye chyang a bungli hpe sha madung da nna galaw ma ai majaw awng dang ai ni law ma ai.

Hpunau ni Ja gumhpraw sut gan ni gaw sim sa ai lam gaw gap ai hta grai n gun kaba nga ai. Anhte a mungdan hta sanat lak nak lang nna, pu ba jam jau hkam asak si hkam nna simsa lam lu la hkra shakut ai ni nga ma ai. Shanhte mung shanhte a ripkawp tara hkan lang nna jet ai myu tsaw myit hte shakut nga ma ai. Lama wa laknak lang nna dip sha, dang sha na nga jang mung chying sha ni a hkungga tsawra madi shadaw lam n lu la na rai nga ai. Hpaga yamga sut masa hta mung kungzet ai nyan marai rawng ai sari sadang hte kang ka dinghpring ai myit hte galaw ai rai yang sha masha yawng hkungga kam hpa ai ni tai na, simsa lam hpe gaw gap ai ni tai na ga ai.

(Lk.16:11-12) N tara ai sutgan hta pyi nanhte kangka n rai lu myit yang gaw, dai dingman ai sutgan hpe, nanhte hpe kadai mi kam ap ya na myit ta? Masha wa a sut rai hta, nanhte kangka n rail u myit yang gaw, nanhte madu ang ai sut rai hpe nanhte hpe kadai mi ap ya na rai ta.?