Karai Kasang Nga Ai Lam Hpe Nawku Hpung Hku Nna Madun Ya Nga Ai

Kaja ai bungli hpe nang galaw lu ai daram galaw u, mai byin ai daramn galaw u kaning re ai ladat hte raitim galaw u, shara shagu hta dang lu ai daram galaw u, aten shagu hta galaw u, masha yawng a matu galaw u, aten lu ai daram galaw u. nga nna John Wesley ngu ai wa masat da ai tara ngu ai nga nga a1. John Wesley (1703-1791), Known as John Wesley's Rule

Hpunau ni Karai Kasang ngu ai nga ai, shi hkum nan up hkang nga ai ngu ai hpe Nawku hpung makam masham Shagu hta mu lu nga ail. Nawku Hpung nga ai gaw mungkan hta Karai Kasang a matu shara la nna dai shara kaw Karai Kasang nga nhtawm, mungkan gaw Karai Kasang a mungdan tai na matu re nga nna, Wa Sarabyin Benedic 16 (sh) Cardinal (Joseph Ratzinger) tsun shana lai wa sai.

Yesu Hkristu a marang e Karai Kasang a mungdan nga hpang wa sai. Sakramentu ni hpe jaw ya ai shara shagu hkan e mara hte si hkrung si htan a mungdan hpe ningpawt kaw nna ru hte nawng la kau nna galai shai hpang wa sai. Dai gaw hpan da ai lam ningnan hpang sai rai nna Karai Kasang a mungdan hpang wa sai rai nga sai.

Hkristan ni gaw shanhte hpe jaw ya ai asak ningnan hpe tatut hkrang n shapraw ai rai jang, Sakramentu ni gaw kumla kaman sha rai mat na re. Masha hpe shat n jaw ai sha, Chyoi Pra Hkum sha hkam la u ngu tsun ai gaw tang ndu na re, ta tut garum ai lam n lawm ai n-gup ga hte sha hkaw tsun ai gaw tang n du na re.

Sakramentu ni gaw anhte hpe Karai Kasang kade daram tsaw ra ai hpe madun ya ai rai nna, masat ginhka da ai jarit lai hkra, lamu ga htum hkra, sak hkrung mahkrung ma hkra: shut hpyit mara a mungsung lam ni, ruyak shoi hpa lam ni,n tara ai lam ni, n chye n chyang ai lam ni, makam masham hta lumnai re ai lam ni, ya aten na myit hpaji ni, kaning re ai matsan mayan lam ni yawng, hpe lai di nna anhte hpe tsawra nga ai. nga nna, (Cardinal Bergoglio in the pre-conclave, 2013) Madu a Wenyi nye a ntsa e nga nga ai:

Matsan mayan ni hpe Kabu Gara Shiga hkaw tsun na matu, shi ngai hpe na-man chya ni ai: Bawng dung ai ni hpe shalawt lu na lam, Myi kyaw ai ni hpe myi bai mu na lam, hkaw tsun na matu mung Zingri Zingrat hkrum ai ni hpe dat dat shangun na hte Madu a sharawng awng ai shaning hkaw tsun dan na matu mung shi ngai hpe shangun dat ni ai, nga ai. Dai laika katsu nna, tara jawng sin ai wa hpe bai ya kau nhtawm, shi dung nga ai: tara jawng na ni nlang hte gaw shi hpe azi yu nga ma ai. Shi gaw, Ndai ka da ai ga gaw dai ni nan nanhte a na hta dik mat sai, ngu nna shanhte hpe ga tsun hpaw wu ai. Lk. 4: 18-21

Nawku Hpung gaw kata kaw nna shi a shinggan de jarit lai hkra sara ai, lamu ga htum hkra n ga ai sha, sak hkrung mahkrung shut hpyit mara, ruyak shoihpa, n tara ai, n chye n chyang ai, makam masham hta lum nai re ai, aten a myit masa, matsan mayan hkrum ai, myit hte n hkawn lu ai mungsung gasung de du hkra du sa ra ai. nga nna, Cardinal Bergoglio (sh) Pope Francis in the pre-conclave, 2013) Hpa majaw nga yang Nawku hpung gaw, hpung masha ni hpe sha n ga shawa masha hte seng ai tara ni masat da nga ai.

Shinggyim masha ni gaw wuhpung wuhpawng hte nga ai ni rai ma ai. Sumsing lamu e mung, ga ntsa e mung. masha gaw wuhpung wuhpawng kaw shamyet shanat nga ai. Ga Shaka Dingsa ten kaw nna Karai Kasang gaw Shi a masha ni hpe tara ai hte kaja ai hku sak hkrung na matu tara ni hpe jaw da sai. Shawa wuhpung wuhpawng gaw gap na matu, kaja ai hte n kaja ai bungli ni hpe ginhka na matu masha ni gaw myit yu mang yu nna chye lu ma ai.

Yesu a prat hta e tara rap ra ai lam gaw tsaw ra ai tara hta hkum tsup mat wa sai hpe anhte mu chye lu ai. Dai ni na aten hta kahkyin gumdin ai myit masa hpe Hkristan ni, htingbu wa hpe tsaw ra ai myit kaw na lu la ai rai nga ai. Shawa social ngu ai gaw, tinang hte myit hkrum ai ni, manaw manang ni hte seng nga ai.Ga shadawn mungdaw mungdan ni, shawa wuhpung wuhpawng hta masat da ai tara hte maren rau jawm nga ai; dai gaw shinggyim wuhpung wuhpawng hte seng ai rai nga ai.

Hkristan ni yawng, woi awn ai ningbaw ningla ni kaw nna hkawt, mungkan hpe grau kaja wa hkra gawgap na matu lit nga ai.Nawku Hpung a shawa hte seng nna myit ai lam madung gaw, gawgap ai lam re: tang madun ai, galai shai na matu galaw ai, ndai lam ni yawng gaw, Yesu Hkristiu a tsawra ai masin salum hpe kam hpa myit mada ai kaw na pru wa ai rai nga ai. Pope Francis, Evangelii gaudium (EG 183)

Nawku hpung a Shawa hte seng ai tara ni a yaw shada ai lam lahkawng nga nga ai. dai ni gaw,

1.Kabu Gara Shiga hta lawm ai hte maren tara rapra ai magam bungli ni hpe tang madun na.

2. Tara rapra ai hte seng ai Kabu Gara Shiga a numhtet ga hte, n htan shai ai shawa hte seng ai, sut masa, mung masa lam ni hpe ninghkap na.

Masha a sari sadang hte seng ai ningmu gaw Hkristan makam kaw na asan sha re ndai ningmu kaw nna tara ni, shadawn jitna ni hte manu shadan ai lam ni gaw shanglawt nna tara rapra ai shawa lai len hpe shabyin ya ai. Dai tara ni asan sha raitim, dai ni byin nga ai shawa hte seng ai manghkang ni hte lakap nna ya sha ya sha jai lang ra nga ai. Shawa tara ni hpe jai lang ai shaloi, Nawku Hpung gaw madu a nsen hpe n lu tsun shapraw ai masha ni maga tsap ai.

Dai masha ni nan n tara ai bungli hte hkrang ni a majaw hkrat sum nga ma a. Nawku Hpung a sak hkrung ai sharin shaga ai rung (Magisterium) gaw, Karai a Mungga hpe daw jau ai rung re, dai mungga a ntsa e nga nna dawdan ai shara n re ai. dai Mungga sharin shalai dat ai hpe sha sharin shaga ai, dai Mungga hpe azin ayang madat mara ai, sadi sahka ai hte makawp maga ai, Karai a numhtet ga hte maren, Chyoi Pra ai Wenyi a garum ya ai hte sanglang ya ai, ndai makam masham a npawt kaw nna Karai Kasang shadan shaleng ai hte maren kam sham na matu madun dan ai. nga nna Dei Verbum 10 Madu a mungga laika nambat 10 hta rawng nga ai. Vatican Council I1, Dei Verbum 10

Dai rai yang Nawku Hpung a shawa hte seng ai tara ni hpe kadai dawdan ya ai kun? Nawku Hpung masha ni yawng lawm ai, laksan lit la da ai ni, Karai Kasang a laklai chyeju kumhpa lu ai ni, shawa hte seng ai tara ni hpe galaw shapraw ai hta shang lawm ma ai. Shawa hte seng ai tara ni hpe Nawku Hpung a ahkyak ai laika ni hta adan sha tsun da ai. Shawa hte seng ai tara gaw Nawku Hpung a tara shang "sharin shaga ai" lam re.

Wa Sarabyin hte saradaw ni ka da ai Nawku Hpung a matsun laika (Magisterium) hku nna tara rapra ai, simsa ai, shawa wuhpung wuhpawng hte seng ai lam ni hpe Nawku Hpung hte masha amyu ni hpe galoi mung shadum jahprang ya nga ai.