Simsa lam hte dinghku prat

Karai Kasang gaw masha marai shagu hpe shi hkrai nga garen taw na n ra ai; shawa hpawng hta myit hkrum myitra ngwi pyaw sim sa ai hte nga na matu ra sharawng nna hpan da ai. Dai majaw shinggyim masha ni gaw shi a mabyin hta nan, dinghku masha hku nna nga na matu rai nga ai. Ndai lam hpe Chyum Laika hta mu lu nga ai: Karai Kasang gaw Ewa hpe Adam a makau e manang tai na matu jaw da ai. “Shaloi dai masha wa gaw, yam nga mahkra hpe mung, ntsa malen pyen ai u mahkra hpe mung, nam mali na dusat nhprang mahkra hpe mung, amying shingteng jaw wu ai: rai ti mung, dai masha wa a matu shi hte ram ai nrum ntau garai n nga lu ai. Dai majaw Karai Kasang gaw, shi a garep nra langai mi shaw la nna, shinggyim numsha shachyaw wu ai rai nna, dai masha wa kaw woi wa ya wu ai. Shaloi dai masha wa gaw, Ya, masha ndai gaw, nye a nra hta na nra, nye a ashan hta na ashan rai nga ai,” ngu wu ai (Npawt Nhpang 2: 20-23).  

              Chyum Laika hta e dinghku prat hte seng nna lawm nga ai: Ga Shaka Dingsa hta kanu kawa ni gaw kashu kasha ni hpe Karai Kasang a tsaw ra ai, sadi dung ai, Karai kasang hte hkrum katut ai mahkrum lam ni hpe tsun shalai ya ra ai, shawng nnan ahkyak htum gaw, shinggyim masha a prat hta hpaji byengya gaw ahkyak ai, ma ni hpe tsun shalai ya na lit nga ai. Ga Shaka Ningnan hta e, Yesu mung yu maya dinghku langai hta shangai wa sai. Shi a kanu kawa ni mung shi hpe lanu lahku ai hte tsaw ra let bau kaba ai. Karai Kasang gaw masha hku nna shangai wa nhtawm  “yu maya” dinghku hpe lata la ai gaw Karai Kasang a man e dinghku gaw grai ahkyak ai lam madun nga ai. Dinghku hpe laklai ai shara jaw da nna, wuhpung wuhpawng hta laklai  manu shadan da nga ai ngu ai hpe madun ai re.

            Anhte a Nawku hpung hta mung kundinghku hte seng nna sharin matsun da ya ai lam law law nga ai. Dinghku hpe masha wuhpung wuhpawng a matu ahkyak dik npawt madung   hku nna Nawku Hpung mu mada ai. Dinghku hta laklai ai ahkaw ahkang nga ai rai nna, dai gaw shawa prat yawng a madung re. Dik hkra tsun ga nga jang, dinghku gaw shinggyim asak pra wa ai shara rai nna shawng na masha shada matut mahkai jat wa ai shara mung rai nga ai.   Dinghku gaw shawa a npawt nhpang re; shawa lajang ai magam lam ni yawng gaw dinghku kaw na pru wa ai. Ndai lam a majaw, dinghku hpe Karai Kasang gyin lajang da ya ai nga nna Nawku Hpung kaw nna sharin matsun ya nga ai. 

            Dinghku kata e laklai ai lam ni law law nga ai, dai ni gaw “ Ndut ndang tsaw ra ai lam re : ndai gaw dinghku hta masha ni n lu galai kau ai kaja ai lam ni re. Dinghku kata hta e, ban amyu myu na masha ni, tsaw ra nna rau nga nga ma ai, kaji kawoi ni, kanu kawa ni, kasha ni, kashu ni,  ka moi ni, katsa ni rau nga ma ai. shanhte gaw asak n bung ai, mahkrum madup machye machyang n bung ai, atsam marai n bung ai, raitim shanhte langai hte langai kahkyin gumdin ma ai, manu shadan ma ai, tinang hkum a matu chyu n myit ai sha apnawng ma ai, garum hkat ma ai, tara rapra ai hpe rau hkam la ma ai. Dinghku masha shagu hpe mu chye hkap la ai, gingdan ai raitim, n gingdan ai raitim, shi a sari sadang hpe hkungga ai. Kaning re ai masa hta raitim, shi hpe jawm tsawra ma ai. Ga shadawn, kashu kasha wa lagaw lata nkung ai, n hkum ai, ga n chye shaga ai, (shing) tsa ya ka-ni ya, 4 ya tai mat ai, htawng na bai pru wa ai zawn re lam ni hpe mung tsawra matsan dum ai myit the hkap la lu nga ai. Ndai lam ni hku nna, dinghku hta htunghking, myit masa lailen adan sha nga wa ai.

            Raitim, ya aten hta gaw, grai lai shai mat wa sai. Shi hpa baw tam jaw lu ai na kun, gumhpraw tam lu ai kun, ngu ai ga san ni san wa sai. Law malawng masha ni gaw shawng nnan atawng apa lu ai ni hpe she madung da wa ai. Ndai myit masa gaw dinghku a dahkat rai nna dinghku hpe jahten ya lu ai. Dinghku ngu ai gaw Adam yan Eva a prat kaw nna nga hpang wa sai prat langai mi re ai majaw, ya aten du hkra, du na ra ai ten hta mung ahkyak ai, akyu rawng ai, nnga n mai rai nga ai. Dai ni na ten du hkra dinghku gaw prat dep ai hku shang lawm nga ai, shawa hpawng hta ahkyak ai hku shang lawm nga ai.

            Dai ni na ten hta  shawa masha ni kyang lailen lam, makam masham lam ni hpe, myit hta hkrak hkawn hkrang ai lam n nga wa sai. Bai nna bunsap tsip zawn hpyan la yak wa ai mungkan manghkang hpe chye na na matu  grai yak wa sai. Byin nga ai lam shagu gaw tinang a lam tinang hkrai lajang la wa sai. Ndai lam gaw dinghku hta hkra machyi wa nga sai. Masha shagu a nga mu nga mai lam hte sari sadang a matu  magam dap shagu hpe Nawku Hpung tsang ya nga ai. Kaja ai myit mang ai lam, tsawm htap ai kanawn mazum lam, npawt nhpang hpaji lam, ma ni hpe sharin ya na matu dinghku hta lai nna, kaga shara n nga sai. Masha shada da hkungga ai, tara rapra ai, kahti galai ga shaga ai, tsaw ra daw jau ai gaw asak hkrung nga ai hta pyi grau ahkyak ai ngu ai lam ni hpe, sharin matsun ya nga ai gaw n ta dinghku sha rai wa sai.

            Anhte Myanmar mung hta, Covid ana zinli hkrum sha nga ai shaloi, ana byin nga ai madu wa hpe madu jan gaw rap di n ngam kau da ai, hkum gahtet ai majaw mak hkalawng hkut ya ai, baw machyi n sa sa chyat ai shaloi madu jan she gawn lajang ya ai. Dai the maren, madu jan machyi yang, kasha, kashu ni machyi yang mung maren sha gawn lajang hkat nga ai, dinghku masha ask hkrung na matu tsawra daw jau ai lam gaw madung re hpe dinghku kata kaw mu lu nga ai.

             Dai majaw dinghku gaw majoi mi shachyaw da ai hkrang n re sha shinggyim masha ni kahkyin gumdin na matu shara madung rai nga ai. Mungdan hte shawa tsang shagu (g.s. sut masa, mung masa, htunghking masa, hpaji machye machyang masa) lam ni hta shawa hte shinggyim masha a matu ra nan ra ai lam re. Nta dinghku gaw dinghku masha marai shagu hpe mai kaja ai lam galaw ya nga ai. Shinggyim masha langai mi dinghku prat hpe hkam sha lu ai gaw grai ahkyak dik ai lam re. Masha langai shangai wa nna kung kaba wa na matu dinghku gaw htap htuk dik ai, sut dik ai shara re. Dinghku hta e shawng nnan, dinghku masha shada kahkyin gumdin ai lam hkam sha lu ai. Dinghku masha ni gaw kaja ai lam myit ya ai, ndut ndang tsaw ra   hkungga ai. Dai zawn re ai masa hta dinghku masha shagu gaw prat hta kaning re ai lam ni pru wa tim, dai hpe hkang lu na matu atsam hte n-gun lu la ai. Ndai gaw Hkristan prat a npawt nhpang  yaw shada ai lam nan re.

            Dai hte maren, dinghku masha ni dinghku kata e lit la ra ai, hpa majaw nga jang, dinghku masha ni tinang a matu sha asak n hkrung lu ai. Dinghku nta masha shagu gaw lit magma la ra ai. – kanu yen kawa gaw nta masha nil u sha bu hpun na matu ja gumhpraw tam ai, kaji kawoi ni gaw nta sin nta wang hta namsi namsaw hkai n mai hkai, U,Wa kaji gajaw rem, kashu kasha ni   gaw jawng lung ram ai ni jawng lung, jawng nlung sai ni nta kaw ra ai garum, kan bau nungli lama ma galaw rai nna, marai shagu lit magam gun hpai ra ai. Marai shagu ti nang   hte seng ai lit magam lu nga ai, nta masha marai shagu a ntsa e mung shada lit la ya ra ai. Dai hta n ga, dinghku gaw shawa masha hpawng hta nan nga nga ai majaw, shawa hpe mung akyu jaw ya nga ai. Dinghku a matu sha n rai, shawa masha ni a matu mung, dinghku kata e galaw awng dang ai lam shagu gaw shawa a matu mung, akyu jaw nga ai. Jahtum tsun ga nga jang, shawa masha gaw shawa hta lawm ai masha shagu a tsaw ra ai hpe lu la ai, manu shadan ai hpe mung lu la ai, dai majaw shawa masha gaw asak hkrung lu ai. Shinggyim masha gaw gat kaw e gumhpraw hte arung arai ni hpe galai hkat ma ai. Dinghku shinggan hta galai hkat ai hpaji garai n lu yang, dinghku kata e, shada n bung ai lam ni hpe galai hkat na shawng sharin la lu ma ai. Madu hkum nan nta masha ni hpe daw jau chye ai, masha ni hpe hkap la chye ai lam ni hpe sharin la ma ai.

            Dinghku masha ni dinghku kata e lit la ai, kahkyin gumdin ai lachyum hpe sharin la ai gaw shawa yawng hpe akyu jaw ya na matu rai nga ai:  Dinghku kata hta, “kaji kajaw” sha re ai lam hta lit la nna gahkyin gumdin ai lachyum hpe sharin la ai gaw, shawa hpawng hpe akyu jaw ya na matu rai nga ai:  Dinghku kata e “kaji kajaw” re ai lam hta lit la nna kahkyin gumdin chye ai wa gaw “kaba ai” lam ni hta mung lit la chye na rai nga ai. Matsan mayan re ai ni, machyi ai ni,  asak kaba sai ni hpe yu lakawn ai gaw dinghku hta lai nna grau kaja ai shara n nga sai. Myit htum ai ni, garen gari re ai ni, ngam kau da hkrum ai ni hpe gara kaw grau mu chye la lu na i? Tinang a dinghku kata hta mai kaja ai hkrang n nga yang, shawa hpawng hpe gara hku machyi shamai ya lu na i?

            Dai majaw  “shawa hpe jet ai shinggyim masha prat shatai” na matu dinghku gaw n nga n mai rai nga ai.  Simsa ai lam gaw gap ai hta mung nta dinghku gaw grai ahkyak nga ai ngu ai lam ni hpe shana dat lu ga ai law.

By;Mama Kaba Sylvia Lahpai Seng Tawng