Dama Shang Ai Lam Hte Labye Htang Ai Lam

DAMA SHANG AI LAM

Wunpawng Htunghking Laika Buk Page 221

Lasha marai langai ngai asak ram wa nna, num la na aten du rai tim, shing n rai kanu kawa hte tsan ai buga hkan nga hkawm hkrup rai nna num la ai lam hta myitsu salang jahkum let, hkungran poi galaw lu na daram re ai atsam hte aten n nga ai wa rai yang, mayu ni hkungran poi galaw ya nhtawm, mayu ni a nta e nga lawm chye ma ai. Dai zawn re nna dinghku de sha ai hte mayu nta e nga lawm ai dinghku hpe "Dama lung ai" shing n rai "Dama shang ai" nga ma ai.

Shing rai dama lung ai shaloi, mayu ni a nta e sanit ning nga let,mayu gumgai dingla ni hte mayu nta ni hpe galaw jaw, galaw ya, rai nna nta madu kasha zawn rai  nga chye nga ma ai. Mayu ni hta shadang sha n nga ai rai yang. Prat tup nga lawm nan ai ni mung nga ma ai. Shing rai dama lung ai ni hta hpang e htingbren bai pru mayu ai hte mayu nta kaw nna karan pru wa ai ni mung nga shajang ma ai. N pru mayu ai majaw prat tup nga lawm nan ai ni mung nga shajang nga ma ai.

Mayu nta kaw n nga lawm ai sha, htingbren pru mayu ai ni rai yang, sanit ning na ai hpang, htingbren pru wa nga ma ai. Sanit ning rai n hpring yang htingbren pru wa ai ni mung nga shajang nga ma ai. Shing rai mayu ni a nta kaw nga lawm let, nta madu kasha zawn rai nna, galaw jaw let nga ai gaw  mayu ni hpe hpu bang ai a malai rai nga ai. Kahkri kasha ni sanit ning hpring nna, htingbren pru wa ai shaloi, mayu ni gaw lawu na hte maren, kahkri kasha ni hpe karum gat nga ma ai.

Dai karum dat ai gaw;- U kasha woi ai u hkai kanu langai mi, wa kasha woi ai wa kanu langai mi, nga hkalung woi ai nga kanu langai mi, kahkri kasha ni galaw sha na daram re ai hkau na yi langai mi, shat di shatmai di, shat ban, shatmai wan,lakung, kamai, shingnoi, htingga hte kaga hkyak hkyak lang ra ai baw arung arai ni hkum hkra karan jaw let htingbren shapraw dat nga ma ai.

Ndai lahta de (tsun mat wa ai) ka da ai dama lung ai lam gaw, shabri shabrai n sha ai bum ga buga ginra hkan na ni hkan ai lailen rai nga ai. Ndai prat hta layang ga de du hkawm nna, shabri shabrai sha ai masha nkau mi numsha ni hte rau, shada da tsawra let hkau chyap hkat ai lam nga wa yang, mayu ni nan kanu kawa tai nna, hkungran poi galaw ya ai hte mayu nta kaw tawng marang mi nga lawm ai lam ni mung nga ma ai. Shing re ai lam ni mung dama lung ai lam ni rai nga ai.

Rai tim dai zawn dama lung ai hta kade ning du hkra mayu ni hpe galaw jaw, galaw ya, bau karum na, ngu ai shadawn shadang n tawn da ma ai. Mayu ni a lam matsun hkang shading ai hku hkan nna, madung hkan sa ra nga ai. Dai zawn mayu nta e nga nna htinggaw garan pru kumran pru wa ai ni yawng hta na malawng maga ngu na ni gaw mayu ni a nat, mayu ni ahkring dat, hkan let mayu ni a gumgun nat jaw chye nga ma ai. Ndai zawn re ai dama lung ai lam ni hte hkan sa galaw ai lam ni gaw, moi prat kaw nna ndai prat du hkra, Chyurum Wunpawng Mungchying sha ni naw hkan sa galaw nga ai Htunghking lailen kaba langai mi rai nga ai rai.

LABYE HTANG AI LAM

Wunpawng Htunghking Laika Buk Page 221, 217

Ndai labye htang ai ngu ai hpe ai Manmaw Sinli ga hte Sinpraw hkran buga ni hta rai yang, "Kabang taugu hta wa ai" nga ma ai. Dai gaw hkungran poi ngut hpang la ningnan wa hte rau, myitsu ai la salang num salang langai ngai lawm let, mayu ga de mayu jahkrum sa ma ai. Shing rai shawng ningnan mayu jahkrum wa ai hpe Hkahku ga de rai yang "Labye  htang ai" ngu nna, Manmaw sinli ga hte hpraw Sinpraw hkran buga ni hta rai yang,  "Kabang taugu hta wa ai"' nga ma ai. Shing rai wa ai shaloi, nga rai tim, bau rai tim, nba bujung yan rai tim, ja hpaga langai ngai gun nna wa chye nga ma ai.

Shing rai mayu jahkrum ai shaloi kungdawn bapa htu gun, udi shadu gun, natjaw ai ni  rai yang tsa chyaru bang gun, Hkristan masha ni rai yang jumdwi, ngachyu, hpalap ni hte muk ni bang gun rai nna wa chye nga ma ai. Gun ai ja hpaga hte kaga rai ni yawng atai rai nna n mai gun nga ai. Gun ai hpaga rai ni yawng gup rai kayep nna she mai gun nga ai. Dai shani hkan nang ai masha ni yawng hpe lam shabrai ngu nna kumhpa langai hpra ren di nhtawm, jaw dat chye nga ma ai. Shing rai jaw ai kumhpa hpe "Hpan ai" ngu tsun  ma ai.

Numsha nkau mi shi num wa ai Shaloi rai yawng n gun wa ai sha rai kaja ni hpe makoi kau da chye nga ma ai. Shing rai makoi kau da ai rai ni hpe Labye htang ai shani she wa la shakre nga ma ai. Shing rai nkau mi hpe makoi kau da ai lam gaw, makyin jinghku law ai majaw, dai shani kungdawn kungra Kumhpa ni hpe hpyi chye nga ma ai. Ning hpun ai palawng she jaw mi; ning gali ai kachyi she jaw mi; nga nna hpyi chye ma ai majaw, rai kaja ni hpe makoi kau da ai lam rai nga ai.

Mayu ni gaw naw ra ai kungdawn ai kungra ni hpe dai shani hkap jaw shangut shakre chye ma ai. La ningnan hpe mung gumhpraw n-ga [N-gang) hkap jahpye, shing n rai la ningnan wa grau sharawng chye ai baw sanat rai tim hkap jahpai chye nga ma ai. Shayi sha jan hpe mung gum- hpraw palawng shing n rai maku labu, shing n rai manu dan ai baw kungdawn kungra langai ngai hkap jaw chye nga ma ai. Dai shani hkap jaw ai kungdawn kungra ni gaw dama ni nta de hkrai shang mat wa nga ai. Ningnan shani jaw dat ai kungdawn kungra ni gaw "Hkau jaw hkau ya lam" hta bai ginlen lang mat wa sai rai nga ai.

Labye htang wa ai shani kaw nna gaw, dama ni mayu nta de mying ladaw dat nna wa ai lam gaw n nga sai. Ra wa ai ten hta amu bungli lama ma nga nna wa ai lam sha nga sai. Rai tim hpu ja hpaga gun nna wa na lam gaw n nga sai. Bapa htu gun, udi shadu gun, jumdwi ngachyu hpalap gun nna wa ai lam sha nga sai. Shara nkau mi hta mayu ni gaw, ladu hkrum ai hpang, shing n rai, rau ai ten ginhtawng ta hta "shayi kawan" nga nna dama nta de sa kawan hkawm chye ma ai. Dai shaloi ddama ni gaw “lam shabrai" ngu nna, ja hpaga langai hkap jaw dat chye nga ma ai.

Dama ni mayu nta de sa ai rai tim, mayu ni "shayi kawan" ngu nna sa ai rai tim, bai wa ai shaloi lam na matu "shani shat' ngu nna, shatmai hkum hkra hte jum majap matep bang let, manam hpe shabawn  dat chye nga ma ai.

Dai shani hta num hpyi sa ai shani sa ai manam ni "Janghtung wa" hpe mung, nba yan shing n ra sagu panep shing n rai ja hpaga langai ngai num hpyi sa ai shaloi sa shang madu ai hte hkap karum ai chyeju hpe htang ai, ngu nna jaw nga ma ai. Dai hpe "Janghtung jahtim ai" nga ma ai. Num la num ya lam hte seng nna janghtung jahtim ai shani kaw nna gaw ngut mat wa sai. Naw ngam nga ai hpu ja hpaga ni hte sharung kungdawn kungra ni gaw mayu ni hte num la num ya lam hte kaga lam a majaw, bungli galaw ang wa ai shani sa karum, naw ngam nga ai kungdawn kungrani hpe mung, dama ni hta ra wa ai shingra ni hta karum rai nna bungli hpe shangut kau nga ma ai.

Thomas