Sai Ninghtan Rap Ra Lam

Solidarity ngu ai sai ninghtan rap ra lam ngu ai gaw shinggyim masha ni simsa lam lu la na matu hte rawt jat bawngring wa lu na matu magam bungli shakut galaw lu nga hkra galoi mung n gun jaw ya nga ai lam rai nga ai. Mungkan shara shagu hta tsaban 20 hte 21 hpe amyu bawng sang ni hte seng ai myit rawt shamu shamawt kasu kabrawng lam ni a majaw nsim sa dik ai  du daw sai hkaw law dik htum ai tsaban ngu masat da ai rai nga ai.

Ndai zawn rai byin ai lam gaw mungdan langai hta amyu bawng sang law law jawm shanu nga ai majaw byin ai rai nga ai.Byin nga ai madung manghkang lam ni gaw amyu bawng sang kaji ni hku nna amyu bawng sang kaba ni a mung masa lam shinggyim nga pra lam htung hking lam hte sut masa lam ni hta ka up da ai hpe hkrum sha nga ai majaw amyu bawng sang kaji ni shinggyim ahkaw ahkang ni n gawn nsawn di hkrum ai masa byin nga ai rai nga ai.

Amyu bawng sang kaji ni gaw rap ra ai shinggyim ahkaw ahkang ni hpe hkret sum ra ma ai.Tinang nang a shinggyim sari sadang,shanglawt lam rap ra ai ahkaw ahkang tinggyeng hparan daw dan la lu na ahkaw ahkang ni a matu shakut shaja ai a majaw  majan ni nhkring nsa byin ai,shinggyim masha asak law law sum ra nna shinggyim masha ni a asak sai ni hka shi zawn nsim nsa lwi yawng nga ra ai mung rai nga ai.

Myu bawng sang shagu hpe maren sha re ngu ai masa hte ding yang ngang grin ai masa galaw kau ai lam gaw shinggyim nga pra lam hte seng nna myit hpawm kahkyin gumdin nga lu na matu madi shadaw ya na malai kaji kajaw re lam ni kaw nna hkawt myit ga garan wa ai lam ni hpe byin pru shangun nna  tinang a htingbu htingpyen ni hpe pyi hpyen shatai kau wa ai masa de pyi hkrang gale kau shangun chye nga ai,manang wa hpe pawt singdawng na hkrit maja ra ai myit n gring ai lam masin kahpra ai lam hpe byin pru shangun ai nga nna tsun da nga ai.

Myit htingkup  ai tinggyeng myit sha myit  chye ai amyu bawng sang myu tsaw myit ni a majaw shinggyim masha ni a bung pre  ai shinggyim sari sadang arawng aya,shinggyim ahkaw ahkang shinggyim shanglawt lam ni hpe hkungga ai lam nnga mat wa shangun ai.Jahtum nnga ai nju ndawng lam,tsi la nmai ai myit machyi hkat lam ni a majaw matai dawp matai htang ai lam ni majan byin ai lam ni matut manoi byin nga ra ai lam ni rai nga ai.

Simsa lam a n gun kaba dik ai lam ngu ai hta dai mungdan dai buga shara ni hkan shinggyim masha ni galaw shapraw da ai n kaba dik ai nuclear wan bawm laknak ni nrai nga ai.Simsa ai lam nhten run mat hkra galaw shakut ai lam hta ahkyak dik ai lam gaw dialogue ngu ai shada man hkrum bawngban ai lam rai nga ai.

Shinggyim masha shagu gaw hkungga gring ai shinggyim sari lu da ai ni hkrai re ngu ai masha hte mu mada shangun ai.Dai re majaw koi yen nlu mai ai mung masa manghkang shinggyim nga pra manghkang sut masa manghkang lam ni hte hkrum kadup wa yang kaga amyu bawng sang langai ngai (snr) wuhpung wuhpawng ni hpe tsep kawp dip shamyit kau na awng dang ai lam ni lu la hkra shakut ai lam ni galaw nga na malai kaja dik ai lam gaw man hkrum jahkrum ai lam hpe mahtang she madung da jai lang chye nga ra na rai nga ga ai.Hkrum zup bawngban ai ngu ai masa gaw mungdan shagu na mungdan asuya ya ningbaw ni madung da hkan sa shatup ra ai lam ni re nga nna San Pra ai Wa Sarabyin Yawhan Pawlu II mung tsun  sharin lai wa yu ai.

Jet ai hkrum zup bawngban lam ni hta shinggyim masha shagu a bungpre ai shinggyim sari hpe hkungga ai lam,kaga myu sha ni a tengman tsawm htap manu dan ai htung hking lai htung masa ni hpe hkungga ai lam,kaga myu sha ni hta nga  ai shanhte a tara shang up hkang na ahkaw ahkang,ahkang aya ni hte shanhte hkum hpe shanhte nan daw dan hparan lu ai shanhte a ahkaw ahkang ni hpe hkungga ya ai lam,kaga myu sha ni a mai kaja ai lam ni hpe chye na hkap la madi shadaw ya lu uga matu tinang a hkum hpe chyu sha yu chye ai prat masa kaw na pru mada yu chye ai lam,tara rap ra lam hte maren mara galu kaba bawngring jat lam lu la na matu tinang nang hta nga ai sut su nga mai lam ni hte jawm pawng shanglawm lu na lam ni rai nga ai.

Shinggyim wuhpung wuhpawng hta manang wa manang jan a hkam sha ai lam ni hpe madat ya ai,chye na mu mada ya ai ahkyak shatai ya ai ndai lam ni gaw grai nan ahkyak ai lam ni rai nga ai.Shinggyim masha shagu gaw ahkyak nga ai rai nna shinggyim masha shagu a hkam sha ai lam kam sham ai lam prat a yaw shada ai lam ni yawng gaw manu dan nga ai ngu lam hpe ndai hkrum bawngban ai lam a marang e shada mu mada ya lu nga ai.

Wuhpung wuhpawng rawt jat galu kaba lam ngu ai shaloi dai wuhpung wuhpawng hta shanglawm asak hkrung nga ai shinggyim masha shagu a atsam marai hkam la ai ningmu hte shada daw jaw ai magam bungli ni lawm nga ai.Dai re majaw masha yawng a matu ngu ai masa hpe npawt gaw da ai rawt jat ai shinggyim wuhpung wuhpawng hpe gaw gap la lu na matu hkrum zup bawngban jahkrum ai lam ngu ai hpe n gawn nsawn nsu nnawn n galaw kau ai sha manu shadan la ra na rai nga ga ai.

by:Fr.Bernard Tang Ji