Dinghku Ngwi Pyaw Na Matu Madu Jan Madu Wa shada Tsun Shaga Kanawn Mazum Lam

Kun dinghku hta dinghku kanu yan kawa lahkawng yan shada tsawra ai majaw de da ai dinghku hpe hten hka mat ai lam hpe nra sharawng na ga ai.Dai majaw kun dinghku langai ngwi pyaw na matu galaw ya lu ai lam ni nga nga ai re.Kaja ngwi pyaw ai kun dinghku byin tai na matu gaw hpa lam ni hta raitim kaja ai maga de myit sawn la nna ga shaga chye ra ai.Ndai gaw grai nan ahkyak ai lam rai nga ai.Hpa majaw nga yang hpalam hta raitim ninghtan shai ai hku tsun ai hpe kadai mung nra sharawng ai ni anhte rai nga ai.

Tinang a Ningrum Nintau ntsa tinang a ningmu hkam la ai lam ntsen ai lam hte nmai kanawn mazum ai.Myit hta nra ai lam ni nga yang atsawm brang lang san chye ra ai.Dai nrai yang ntsen ai lam ni  hte tinang sha myit gahtet taw nga nna dinghku hpe jahten mayu ai  myit ni rawng wa shangun chye nga ai re.

Bai grai ahkyak ai lam gaw chyeju dum chyeju kaba sai ngu ai hte tsawra ai ngu ai hpe tsun ra ai.Anhte law malawng  gaw kun dinghku de sai nga ai hpang gaw madu jan madu wa shada tsawra ai ngu tsun shaga na hpe malap kau ai hte nra sai ngu sawn la chye ga ai.

Kaja wa nga yang tsawra ai ngu ai ga hpe Madu Jan Madu wa lapran hta tsun ya na grai ra ahkyak nga ai re.Madu jan madu wa shada da tsawra ai ngu ai hpe tsun ya yang she dinghku gaw alum ala shim lum na sha rai nga ai.Bai langai gaw tinang a ningrum ningtau gaw tinang a matu galaw ya ai lam ni,sak jaw ya ai lam ni gaw lahkawng maga nga chyalu sha rai na re.Dai re majaw chyeju kaba sai ngu ai ga hpe tsun na matu mung grai ra ahkyak nga ga ai re.

Anhte madu jan hte madu wa shada da tsawra nga ai hpe madun hkat chye ra ai.Kun dinghku de ai ngu ai tsawra shawang myit gaw hpang jahtum ginchyum dat ai nrai nga ai galoi mung lwi nga ra ai sak se madun hkat ra ai lam rai nga ai.Bai nna ningrum ningtau a ra ai,ra ai hpe chye hkra galaw na mung ahkyak nga ai.Ndai gaw Kaja dik htum matut mahkai lam rai nga ai.Tinang a ningrum ningtau a matu ra ai lam hpe galaw ya ai ngu aigaw dinghku hpe ngwi pyaw shangun nga ai re.

Ningrum a myit hpe chye na ya magang grau kaja magang rai nga ai.Hpang jahtum langai gaw ningdang ai lam hpe koi gam ra ai.Ningdang ai lam hpe koi gam ra ai ngu ai hta galoi mung hkap la ra ai ngu ai hpe tsun mayu ai gaw nrai nga ai.Kun dinghku manghkang law malawng gaw kashu kasha ma ni a lam,madu jan madu wa kanawn mazum lam hte ja gumhpraw lam a majaw byin ai law nga ai re.Ndai lam ni hte seng wa yang grai ningdang ai lam hpe koi gam ra ai.Dai majaw lahta de tsun lai wa sai lam ni hpe anhte hkan nang ai rai yang anhte a dinghku gaw ngwi pyaw simsa wa na rai nga ai law.

By; Munghkrang