Ningrum Ninga Wa N ra Ai Hpe Hkum Jaw U

     Tsawra ai nu wa hpu ni anhte amyu shayi law malawng gaw myit tau chye ai lam nnga ai zawn tinang tsawra ai ningrum a ntsa grai ladu shalai hkra galaw jaw mayu chye ga ai.Anhte amyu shayi nkau gaw ningrum wa ra ai mung nra ai mung yawng hpe jaw chye nga ga ai.

     Dai gaw anhte myu shayi ni a gawng kya lam byin chye nna myit tsam pu lam hpe mung byin chye shangun nga ai.Ningrum wa nra ai hpe jaw hkrup nna ningrum ra ai hpe gaw njaw ai ngu mara shagun ai mung hkrum chye nga ga ai.Anhte la ni law malawng gaw  makau grup yin kaw nga ai myu shayi ni rai nga ai kanu,madu jan,kana kajan ni kam hpa shamyet shanat machyu ai hpe lu mayu ai ni rai nga ai. La ni law malawng gaw la re ngu myit hte lam shagu hpe hparan lajang lu ai ni byin mayu ai ni  rai nga ga ai.

     Grau nna gaw ningrum ningtau jan kaw nna tinang a ntsa machyu kamhpa shamyet shanat mayu ai myit nnga na hpe myit tsang ai rai nga ai. Asan sha tsun ga nga yang gaw ningrum ningtau jan a yu kaba hkungga manu shadan kamhpa ai hpe ra sharawng ai ni rai nga ai.Dai re majaw la ni gaw mayak mahkak lam ni hkret sum ai lam ni hpe tsawra ai ningrum ningtau jan ni hpe tsun dan na matu nwawm chye nga ga ai. Dai masa lam ni hpe chye ai raitim tinang a ningrum ningtau wa  lama mi hta yak hkak hkrum nhprinem ai lam ni hkrum wa jang ningrum ningtau jan ni nnga lu wa chye ga ai.

      Gara shara kaw mi lawm lu lawm lu tinang a ningrum wa hprinem na matu shanglawm mayu ai ni rai nga ga ai. Garum mayu ai,gasat poi shang ya ra ai nga tim pyi nga ai n gun atsam mahkra jai lang let shanglawm nna tinang a ningrum wa a matu awng padang hpe jaw mayu ai ni rai na ga ai. Dai zawn awng padang hpe la jaw mayu ai gaw tsawra shawang myit san san rai nna ningrum wa hprinem myit pyaw jang myit dik ai masa lam rai nga ai. Raitim num langai a hpaji jaw ai lam shanglawm garum ai lam hpe la ni a ningmu hta num ni a ningmu hte maren nre ai ngu ai hpe myit dum sadi ra nga ga ai.

     Ningrum hpe gara hku garum na kade daram kaba ai mayak mahkak lam hpe raitim garum shingtau mayu ai tsawra shawang myit ni gaw ningrum a matu kalang marang hta myit shuk hpa byin shangun chye ai re. Shi hpe garum ai re dai hpe ningrum gaw shi a sari hpe jahkret ya ai, gaya hkrum hkra galaw ai ngu pawt ai mara shagun ai nga aput angun nga ai num ni nga nga ai.

    La nkau ni a ningmu hta shi kaw nna manghkang hpe hparan na matu shakut nga ai ten hta ningrum ningtau jan kaw nna hpaji jaw ai madi madun ai garum hparan na matu shakut ai lam gaw shanhte a matu madi shadaw ya ai lam nbyin ai sha shanhte a hparan ai lam hpe shuk shanut ya ai lam byin shangun nna la ngu rai dum ai sari hpe hkra machyi ya ai ngu mu mada chye nga ga ai re.Dai re majaw ningrum wa kaw nna kanu e garum rit nga ntsun dingsa,kanu a ningmu hpe tsun yu rit nga ntsun dingsa gaw azim rai nga ai lam gaw madu jan madu wa lahkawng yan a matu grau nna kaja nga ai.

      La ni kaw nna tinang a ningrum ningtau jan a tsawra shawang myit hpe nra sharawng ai lam nrai tim,madu jan lawm yang she awngdang ai ngu ai gaw la ni atsam marai hpe hkra shangun ngu hkam la sawn la chye ma ai. Dai hta n ga num ni kaw nna ningrum a manghkang lam hte seng nna kaga la ni hpe bawngban ai lam mung la ni a matu masin pawt gaya jahkrum ai ngu sawn la nga ai re.

     Anhte myu shayi ni hku nna gaw tinang hta nhprinem ten,myit ru myit yak hkrum ai ten,myit tsam pu hkrum nga ai ten ni hta ningrum ningtau wa kaw na n gun jaw garum shingtau ai lam hpe grai myit mada ra sharawng nga ai re.Ningrum wa a n gun jaw ga langai hte myit n gun  hpring zup lu la ai  num ni law law nga nga ai re. Dai zawn hkam sha lam hpe ningshawng jaw ai num ni gaw tinang a ningrum wa hpe mung bai n gun jaw garum ra ai ngu ai ningmu hte ningrum a manghkang hta shanglawm na matu shakut ai kaw nna madu jan madu wa sha nhprinem ai lam ni byun chye nga ai.

     Anhte la nkau ni gaw ningrum ningtau jan a garum la ai majaw hprinem wa ai ngu ai hpe nkam hkam la ai ni law law nga ga ai. Ningrum ningtau jan  ka up mayu ai hkawhkam jan tai mayu ai, lam shagu hta sara galaw htinghkang mayu ai ngu myit sawn lam shang wa ai shaloi ningrum ningtau jan a tsawra shawang myit ngu ai hta masha lapran hta shakawng shadawng galaw mayu ai num,ngai hpe masha shawng hta sari jahkret gaya jahkrum ai num jinghku jingyu ni a lapran gaya jahkrum mayu ai num ngu sha myit la chye ga ai.

    Ningrum ningtau jan a shanglawm ai lam,garum shingtau ai majaw langai hte langai n yu kam hkra pawt hkat nna kun dinhku hpe du hkra hkra machyi chye ai lam byin chye ai hpe mu lu nga ai.Dai re majaw anhte myu shayi ni kaw nna tinang a ningrum wa mayak mahkak hkrum ai ten hta ningrum kaw nna nchye shangun dingsa nshanglawm ai gaw grau nna kaja na re. Hpaji jaw lam n galaw hkrup hkra hting hkang nna ningrum kaw tinang hpe garum hpyi lam nnga dingsa gaw zim rai nga ai gaw grau kaja na rai nga ai.

By: Mung Hkrang