Dinghku A Dawhpum Kanu Num Ni Dinghku A Matu Gumhpraw Mahkawng Ga

Tsawra ai Kun dinghku Kanu num ni  anhte ja gumhpraw hpe mahkawng ai ngu ai gaw Kamhpa myit hpe grau law wa lu shangun ai sha n ga kaga akyu chyeju ni law law hpe mung hkam la lu nga ai re.

Dai majaw Kamhpa myit grau nna law jat wa hkra daini kaw nna gumhpraw mahkawng ga.Gumhpraw mahkawng na matu yaw shada da ai kun dinghku kanu ni nga na re ngu kam ai.Anhte kanu num ni hku nna shajan jai lang ai lam ni hpe shayawm nna gumhpraw hpe mahkawng gring nga ai re.Ya na zawn gumhpraw mahkawng ai ngu ai gaw anhte ai kun dinghku kanu ni a myit hpe grau nna kamhpa myit rawng shangun nga ai re.Bai nna myit masin shim lam hpe grau nna lu shangun ai rai nga ai.

Gumhpraw mahkawng da ai rai yang hpang de kun dinghku hte seng nna ja gumhpraw  ra ahkyak wa ai lam ni nga wa yang hparan la na matu madi shadaw ya lu nga ai re.Dai majaw ja gumhpraw hpe mahkawng ai gaw Kamsham lam sha n ga kaga akyu chyeju ni law law lu la nga ai re.

Dai majaw anhte kun dinghku kanu ni kaw nna tinggyeng  madu ai sut masa lam langai hpe galaw mayu ai yup mang shingran ni nga ai rai yang ya kaw nna gumhpraw mahkawng ga.Ndai zawn galaw na rai yang ja gumhpraw gaw ra ja lu rai nga ai.

Bai nna Dum nta hta nga nna bungli galaw mayu ai Kun dinghku Kanu ni mung tinang a galaw mayu ai lam ni a matu gumhpraw mahkawng da ra nga ai. Dum nta a matu nnga nmai ja gumhpraw law law hkrat na lam ni galaw sana nga yang mung ya kaw nna ja gumhpraw hpe atsawm mahkawng da yang grai kaja nga ai.Ga shadawn Nta nnan bai gap ai,Nta bai gram lajang ai lam ni gaw hkrat ang ai shabrai law ai majaw kalang ta galaw lu na gaw n loi nga ai re.Dai majaw ja gumhpraw hpe gau ngwi ngwi mahkawng nna galaw shapraw mat ra nga ai.

Bai langai gaw Anhte hta tingkyeng madu lu ai Dum nta (shing nrai) Mawdaw Car zawn re nlu shi ai rai yang ya kaw nna gumhpraw mahkawng shajin da ai rai yang grai kaja nga ai.Ya prat hta Dum nta Sun wang langai madu lu na ngu ai gaw grai yak wa sai zawn Mawdaw Car langai mari jawn na ngu ai mung nloi la nga ai re.Dai majaw ndai lam ni hpe madu lu na matu gaw anhte kun dinghku kanu num ni zen ai hte gumhpraw mahkawng ra nga ga ai re.

Bai langai gaw anhte a kashu kasha ni a Jawng shabrai a matu mung gumhpraw mahkawng na matu ahkyak nga ai re.Anhte a Kashu Kasha ni a Jawng lung ladaw gaw shaning law grai galu nga ai re.Grau nna gaw Dak kasu jaw shabrai rai nga ai.Dai majaw Ma ni a Jawng shabrai hpe mahkawng da na matu mung grai nan ahkyak nga ai re.

Bai nna dum nta masha ni a hkamja lam a matu mung hkyen lajang mahkawng da na nmai malap nga ai.Dum nta masha langai ngai ana ahkya machyi makaw hkrum wa ai ten kajawng kaja lam amyu myu hkrum wa ai ten na matu ja gumhpraw hpe mahkawng da ra nga ga ai.

Anhte asak kaba ugut gu wa ai ten na matu mung anhte hta ja gumhpraw ram daw nga taw ai rai yang anhte myit pyaw myit kamhpa lam lu la nga ai re.Anhte a kashu kasha ni hpe lit nshali shangun mayu ai rai yang ya kaw nna ja gumhpraw mahkawng da na matu gaw ahkyak nga ga ai re.Dai majaw anhte kun dinghku hta ra ahkyak  ai lam ni nga wa jang mung myit tsang lam nnga hkra rai ja gumhpraw ni hpe kaja ra ai kaw sha jai lang let dinghku hpe gaw gap sa wa ga law.

By; Mung Hkrang