Kun dinghku kanu kawa ni  anhte a kashu kasha ni hpe shinggan hkrit hpa lam amyu myu  sha n ga myit hkam sha lam ni hpe mung shim lum nga hkra galaw ya na gaw anhte kanu kawa ni a lit kaba nan rai nga mali ai.

Anhte a kashu kasha ni a matu shim lum hte hpring zup ai hte myit simsa ai hku nna kaba wa lu na matu gaw anhte kanu kawa ni a lit kaba langai mung rai nga ga ai.Asak naw kaji ai aten kaw nna myit shim lum ai lam nlu ai kashu kasha ni hta asak kaba ram wa ai ten shinggan kaw nna mayak mahkak lam ni dip da ai hpe dang mangak kau lu na atsam hpring zup nlu nna myit ru pu ba ai lam ni hpe hkrum kadup sha chye nga ai.

Anhte a kashu kasha ni myit hkam sha lam gaw grai simani kya nga ai majaw anhte kanu kawa ni a lai kyang shamu shamawt galaw sa ai lam mung simani ra nga ai.Masing sumting lam kaja ai ten re majaw anhte kanu kwa ni a shamu shamawt galaw sa ai lam shagu gaw Ma ni a matu galoi mung nlu malap ai matsing nga na sha rai nga ai.

Dai majaw kya nya ai sumnung sumdi ai lai kyang ni hpe sha anhte kanu kawa ni jai lang sharin shaga ga.Akyu ara lam ni hpe aten shara hta hkan nna anhte a Ma ni hpe sharin shaga ai lam gaw Ma ni a matu grau nna myit shim lum lam lu nga ai.

Shinggan kaw nna manghkang lam amyu myu a majaw kashu kasha ma ni myit hpe ningma kap shangun chye ai majaw shinggan de na manghkang ni hpe nta kata de nlawm pru wa hkra sadi galaw ra nga ai.

Dum nta kata madu jan madu wa shada ga law ninggyet hkat ai lam gaw Kanu yan Kawa hta manoi shamyet shanat nga ai kashu kasha ma ni a kya simani ai myit hpe hkrit kajawng mat wa shangun  chye nga ai re.

Anhte kashu kasha ni hpe kya nna simani ai hte tsun shaga sharin shaga ai lam gaw Ma ni hpe grau nna ga madat mara wa nna myit su ai kashu kasha ni byin tai wa lu na rai nga ai.Bai nna anhte a kashu kasha ma hpe hkrai (snr) shanhte hpe hkrai dum nta hta aten na na nmai tawn da ai.

Hpa majaw nga yang anhte Kanu kawa ni makau kaw nga yang she Ma ni a myit hta myit hte hkum hkrang hpe shim lum lam hpe jaw ya lu nga ai re.Bai langai dum da ra na gaw Maw Car,Cycle zawn re ai kaw nna anhte kashu kasha ni  hpe nhkra machyi hkra sadi lakawn na mung ahkyak nga ga ai.

Grau nna gaw anhte a kashu kasha ni hpe hkrit tsang ra ai shara ni de nwoi hkawm ai lam gaw kaja dik rai nga ai.Bai nna Nu Wa ni e Kashu Kasha ma ni gaw anhte kanu kawa ni a prat myit mada shara tsawra dik ai ni re majaw  nta kata hta mung anhte kashu kasha  ni hpe hkra machye ai hkala chye ai arung arai mi hprap wan arung arai,tsi arai ni,latung sat tsi,shakya rai ni hte nta hta lang ai nhtu zen dau zawn re ai ni hpe mung atsawm shim ai shara hta tawn da nga ga.

Dai ni na rawt jat galu kaba lawan ai prat hta anhte kanu num ni mung magam bungli galaw shang ai ni grai nga wa nga ai.Dai re majaw anhte kanu kawa lahkawng yan nan bungli galaw ra ai majaw anhte kashu kasha ma ni hpe aten hpring jaw lanu lahku lakawn lanawn ai lam ni nlu galaw wa ai hpe mu lu ga ai re.

Anhte kanu kawa ni kade mi nrau ai nga tim tinang a kashu kasha Ma ni hpe aten jaw lakawn lanawn ai lam gaw galaw nan galaw ya nga ga ai.Anhte kanu kawa ni a ahkyak la lakawn lanawn ai lam gaw ma ni a myit hpe shimlum shangun ai hta sha n ga hkum hkrang lam hta mung tinang hkum tinang kam hpa manoi ai lam lu shangun nna zet let ningtawn ai kashu kasha ni byin shangun nga ai.

Myit masa lam hta mung daw dan ai lam hta mung gwi gwi hte asan sha dawdan lu ai n gun rawng ai ma ni byin tai shangun lu nga ai.Bai nna kanawn mazum lam hta mung grau nna kaja wa ai zawn sharin hkaja la ai lam hta mung grau nna myit maju jung lu nga ai majaw anhte kanu kawa ni kashu kasha ni hpe lakawn lanu lahku ra ga ai.

Kanu kawa a lakawn lanawn pawn ba ai lam n gun yawm ai Ma ni hta mayak mahkak lam ni hpe hparan lu ai atsam yawm wa nna bawnu  bawngring rawt jat ai lam hte myit sawn sumru ai atsam ni yawm wa jang gaw hpaji sharin ai lam hta mung n gun yawm ai hpe mu lu ga ai re.

Kanu kawa ga nmadat ai sha jasam zawn rai nga ai,kanawn mazum lam hta anyak wa chye ai, tinang kam ai hku nga sa galaw sa wa chye nga ai. Kanu kawa a lakawn lanawn ai lam yawm ai Ma gaw shana yup npyaw ai manghkang ni hkam sha chye nga ai.

Yup npyaw ai ten na wa jang gaw hpaji sharin hkaja ai lam hta mung ningra wa na sha rai nga ai. Ma ni hta mung asak aprat hta hkan nna mayak mahkak lam ni amyu myu nga nga ai.

Kanu kawa ni lanu lahku lakawn ai lam nnga wa jang shanhte hta nga ai mayak lam ni myit htum myit ru lam ni byin wa chye nga ai.Ndai zawn byin wa jang gaw shanhte hta myit npyaw ai lam,kadai hte mung nhkrum hkam ai,koi yen ai,ga nmadat ai lam ni matut manoi byin wa chye nga ai.

Dai majaw tsawra hkungga ai kanu kawa ni anhte a kashu kasha ni hpe aten jaw nna shanhte a mayak lam ni myit hkam sha lam ni hpe madat ya ra nga ai.Bungli hkring ten  bungli pat ten bat Kru ya Laban shani hkan ma ni hpe aten hpring jaw let rau hkawm chyai ai,rau ginsup ai,gat rai mari ai Muk galaw sha ai,shana maga bungli hkring ten hta rau shat jawm sha mung jahta chyai ai zawn re ni galaw let anhte shawnglam myit mada shara,kashu kasha ni a prat tsawm htap nga pyaw shim lum lam lu la hkra galaw let anhte a dinghku hpe gaw de sa wa ga.

By: Mung Hkrang