Wa Sarabyin: Anhte Ni Gaw Karai Kasang A Yup Mang Shingran Teng Wa U Ga Matu Hpan Da Hkrum Ga Ai

November 22, “Hkristu Hkawhkam Poi Laban” hta Wa Sarabyin San Peter Nawku Htingnu kaba hta Misa Hkungga nawng jau woi ai.

Hkristu Hkawhkam Poi laban shani gaw Kahtawlik Nawku Hpung a nawku daw jau shaning ginchyum dat jahtum ai shani rai nna, dai shani hti ang ai chyum mungga hpe sumru woi da ai.

Yesu Madu wudang ntsa shi a tsawra myit anhte hpe ru jaw ya maw ai aten hta, shi a hpang jahtum myit ra ai lam hpe garan gachyan ya ai. “Anhte hta na kaji htum ai nau na ni hpe galaw daw ai mai kaja lam galaw na matu anhte hpe hkang da ai. Dai gaw kawsi hpang gara ai ni, manam ni, manam ni, singgu krin re ai ni, machyi makaw hkrum ai ni, htawng rawng ai ni hte ra kadawn ai ni hpe daw jau ai gaw Yesu Hkristu hpe daw jau ai rai nga ai”, ngu Wa Sarabyin Francis bai tsun shadum da ai.

Karai Kasang a yup mang shingran teng wa na matu galaw shatup ai lam

Madu Yesu tsun da ai lam ni hpe anhte ni hkan shatup ai kun, n hkan shatup ai kun, anhte hkum anhte bai san la ra ga ai. Yesu tsun ai “ngai nang e nga nga ai”, ngu ai gaw kaji htum wa hta shi nga nga ai hpe tsun ai rai nga ai.

Grau nna ramma ni hpe Wa Sarabyin shadum n gun jaw da ai: “ndai yup mang shingran kaba hpe n kau da ga. Anhte ra ai hte ahkyak dum ai lam ni hta sha n galaw nga ga. Karai Kasang a yup mang shingran ndai mungkan ga ntsa teng sha byin pru wa na matu gyin shalat shapraw gawde shakut sa wa ga.”

Kaja htum ai hpe lata chye ga. Yesu Madu gaw anhte lata la ai hta hkan nna anhte hpe jeyang na ra ai. N-ju n-dawng ai hte n-hkru n-kaja ai lam hpe lata ai rai jang anhte ni galoi mung pyaw lu na n re ai; Raitim, anhte ni Karai Kasang hpe lata ai rai jang gaw, shani shagu shi a tsawra myit hta kung galu kaba wa na ga ai; masha ni hpe tsaw ra na matu lata ai rai yang anhte ni teng man ai kabu pyaw ai lam hpe tam mu la na ga ai.

Hkrit tsang ai lam ni, simlam n lu dum ai lam ni hte mahtai n pru ai ga san ni gaw anhte kaja ai lam hpe lata la lu na matu dingbai dingna ni rai nga ai. Tsawra myit gaw dai zawn re ai dingbai dingna ni hpe tawt lai lu shangun ai.

“Ngai hpa majaw sak hkrung nga ai kun, ngu anhte hkum hpe san na aten n rai sai. Ngai kade a matu sak hkrung nga ai kun ngu anhte hkum hpe san nna mahtai tam let sak hkrung ra ga ai.”

Tinang a asak aprat hpe lata la ai gaw htung hking lailen hpe kabai kau ai lam kaw nna makawp maga hkam jan lu ai hte ndai aten ndai shara hta yawng hpe madu la mayu ai myit masa rai nga ai. Dai gaw anhte a sak prat a matu Karai Kasang yup mang shingran tawn ai sumsing mungdan pandung de hkawm sa wa ai rai nga ai.

Na a matu kaja dik ai gaw hpa rai ta?

Wa Sarabyin Francis hpang jahtum hpaji jaw ai gaw Mai kaja lam hpe galaw shakut let kabu pyaw lam hpe tam nga mu ngu ai rai nga ai. Shani shagu anhte lata la nna galaw ai magam bungli hpe galaw nga ten ngai gara hku hkam sha ai kun ngu n san ai sha, ngai a matu kaja dik ai bungli gaw hpa rai ta ngu mahtang san sagawn la ga. Ndai gaw anhte a masin salum hta Chyoi Pra ai Wenyi san nga ai kumla rai nga ai.

“Yesu Madu hpe mada yu let shi a tsaw ra ai lam hta shi hpang hkan nang lu hkra, anhte, ahkyak dik kaja dik ai hpe lata la lu na matu shi kaw na hpyi ga. Shaloi anhte kabu pyaw hpa lam hpe tam mu la lu na re,” ngu Wa Sarabyin Francis, shi a mungga hpe jahtum ginchyum dat da ai.

Anhte Ni Gaw Karai Kasang A Yup Mang Shingran Teng Wa U Ga Matu Hpan Da Hkrum Ga Ai Ngu Wa Sarabyin Francis Mungga Htawn Da Ai Hpe Vatican Shiga Dap Kaw Nna Ndau Shapoi Da Ma Ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-11/pope-francis-we-are-created-to-make-god-s-dreams-come-true.html