Wa Sarabyin: Romania Wan Hpyen Hte Philippine Hka Hpyen Tsin-yam Hkrum Masha Ni A Matu Akyu Hpyi Ya

November 15, laban shani, Wa Sarabyin Francis gaw Romania wan hpyen hte Philippine hka hpyen tsin-yam hkrum masha ni a matu myit n pyaw lawm ai hte akyu hpyi ya nga ai lam chye lu ai.

Daning na 21 lang ngu na Vamco Typhoon Laru kaba a majaw marai 67 si mat sai lam tara shang ndau da ma ai. Dingdung Philippine mungdan shara nkau ni hta ya du hkra hka naw kaba taw nga ai lam; Laban shani “Madu a Lamu Kasa Akyu Hpyi” ngut ten Philippine mungdan hka hpyen tsin-yam hkrum masha ni a matu akyu hpyi ya ai lam; Mungdan shara shagu de garum ningtum hpyi shawn na matu Caritas Philippines kaw nna mungdan Asuya kaw hpyi shawn da ai lam chye lu ai.

Romania mungdan hta lai wa sai laban bat 6 ya shani tsi rung langai mi hta coronavirus ana kanu kap masha ni tsi tsi hkam nga ai ten wan hpyen tsin-yam hkrum sha lai wa sai ni a matu mung myit n pyaw ai hte akyu hpyi ya ai lam tsun let shi hte rau akyu hpyi garum ya na matu mung saw shaga da ai.

Dingdung Romania na Piatra Neamt mare kaba na tsi rung hta byin ai ndai wan hpyen a majaw masha marai 10 si mat sai rai nna, masha marai 10 gaw hkala hkrum ma ai lam; marai 7 gaw tsang ra ai madang hta nga ai lam chye lu ai.

Wa Sarabyin Francis gaw Philippine mungdan na hka hpyen tsin-yam hkrum masha ni hte Romania mungdan na wan hpyen tsin-yam hkrum masha ni a matu akyu hpyi ya nga ai gaw shanhte hte nihtep ai lam rai nga ai ngu nna Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-11/pope-angelus-philippines-typhoon-romania-fire-covid-hospital.html