Chyum Laika Hte Nawku Hpung Kawn Matsun Ai“Tsawra Myit”  

Karai hpaji hkra ja ai hta “ga” (Language) manghkang mung nga ai. Anhte hpe Karai Kasang tsaw ra ai gaw, anhte a prat a matu npawt nhpang rai nga ai hte dai gaw, Karai Kasang kadai re ai hte anhte kadai re ai ngu ai, grai ahkyak ai ga san hpe san nga ai.

Ndai lam hpe myit yu yang, ga manghkang dip ka-up da ai hpe kalang ta mu lu ai. Dai ni na prat hta tsawra ai ngu ai ga hpe manu mana law law lang, lang nga ai hte, n jaw ai hku grai lang ma ai. Anhte lang ai hte lachyum shai ai hku lang nga ma ai. Anhte  lang ai tsaw ra ai ngu ai hte Nawku Hpung a matsun maroi ga ni hte chyum laika hta na Karai Kasang a tsawra ai ngu ai hpe garan ginhka chye madat hkap la na matu yak nga ai.

Myusha ga langai hte langai Lachyum bung ai zawn re ai ga si ni nga ai rai tim, sung ai lachyum hta shai hkat mai ai ga si ni law law nga nga ai. Nawku Hpung a sharin shaga ai hta ga si ni hpe jai lang ai shaloi lachyum dan len ai, lachyum sung ai hku jai lang ai rai nga ai.

Shawng nnan e,

“Tsaw ra ai” ngu ai ga a grai dam lada ai ginru ginsa lachyum hpe myit sumru yu ga. Tsun ga nga yang, mungdan hpe tsawra ai, tinang a amu magam hpe tsawra ai, manang hpe tsaw ra ai, manang ni hpe tsaw ra ai, amu hpe tsawra ai, kanu kawa, kashu kasha ni a lapran e tsaw ra ai, dinghku masha shada tsaw ra ai, htingbu wa hpe tsawa ra ai hte, Karai Kasang hpe tsaw ra ai lam ni, htap hte htap nga nga ai.

Ndai daram law htam ai lachyum ni a lapran e, gara hku raitim, laklai ai lam langai mi adan sha mu mada lu ai.

Dai gaw, kaga nre, num hte la a tsaw ra ai lam rai nga ai. Dai yan a tsaw ra ai hta hkum hte nsa wenyi gaw, n daw, n hka lu na daram, makyit sumri ngang kang nna, n dang sharang na daram hkam sha ai ga sadi a ngwi pyaw ai lam rai nga ai, masha hkrang galim gala pru wa sai. Tsaw ra ai lam a tsaw dik htum ai  kri madung hpe kaga tsaw ra ai lam ni hte shadawn yu yang, dai ni gaw kalang ta prai mat wa ai zawn rai nga ai.

Ya anhte ga san san na kaw du sai. Dai gaw, tsaw ra ai hkrang amyu myu gaw npawt nhpang langai sha re ai i? lama rai ai rai yang, dai tsaw ra ai gaw, lam law law hte amyu myu madun dan ai gaw, teng tup sha teng teng byin ai lam langai mi hpe sha tsun nga a ni? Shing n rai, anhte gaw, maren re ai ga hpe majoi lang nna, teng tup shai ai kaga tengman ai lam tsun nga ga ni?

“Tinggyeng tsawra myit” Greek ga hku “Eros” hte “jaw jau ai tsawra myit” Greek ga hku “Agape” lahkawng a tsawra myit lachyum shai hkat nga ai.Ndai lam hpe daw II hta matut hka ja la nga ga.

Wajau Patrick Gawmaw Hkawng Yae

Reference : Deus Caritas Est (by : Pope Benedict XVI