Wa sarabyin Francis gaw simsa lam hpe gawgap shagrau sharawt ya ai lam hta anhte hpe garum ya nga ai, nga nna UN mungkan rapdaw ninggawn amu madu tsun dat nga ai shiga

Wa sarabyin Francis gaw simsa lam hpe gawgap shagrau sharawt ya ai lam hta anhte hpe garum ya nga ai, nga nna UN mungkan rapdaw ninggawn amu madu Antonio Guterres tsun dat nga ai. Wa sarabyin hte sa hkrum shaga bawngban lam galaw na matu lajang nga ai UN mungkan rapdaw ninggawn amu madu Antonio Guterres kaw nna Italian shiga dap langai hte san htai galaw ai hta ya na zawn tsun dat ai lam rai nga ai.

"La Stampa" ngu ai Italy mungdan na shiga dap a ga san ni hpe htai ya ai shaloi UN mungkan rapdaw ninggawn amu madu tsun ai hta, “Wa sarabyin shi galaw nga ai magam bungli ni hpe hkungga manu shadan mayu ai, shakawn shagrau mayu ai lam ni a majaw Wa sarabyin hte hkrum shaga mayu nga ai. Du hkra ladaw galai shai lam hte seng ai mang hkang lam, matsan mayan masha ni hte seng ai lam, tara nrap ra ai mang hkang lam, bu htawt hkawm tsin yam hkrum masha ni hpe garum lakawn la ra ai lam, Nuclear lak nak ni dawm kau lu lam, ndai zawn re ai ahkyak ai mang hkang lam ni law law hte seng nna Wa sarabyin kaw nna galoi mung ja ja tsun shaga lam galaw nga ai. Wa sarabyin shi galaw gun hpai nga ai magam bungli ni hku nna UN mungkan rap daw a yaw shada ai lam ni awng dang wa lu hkra garum ya nga ai. Uhpung uhpawng ni hpe ga garan shangun ai shakum madin ni gaw gap nga na malai mahkrai htan ai lam madaw she galaw ra na re, nga nna mung Wa sarabyin kaw nna law law lang tsun nga ai. Grau nna ra kadawn nga ai masha ni hpe garum ya ai lam tai hkra kaning re ai mahkrai htan lam ni hpe galaw mai na ngu ai lam ni hte seng nna mung Wa sarabyin the hkrum ai shaloi tsun shaga bawng ban lu na myit mada ai” nga nna UN mungkan rapdaw ninggawn amu madu Antonio Guterres tsun dat nga ai lam Vatican shiga dap kaw nna shana dat nga ai.

 https://www.vaticannews.va/en/world/news/2019-12/un-secretary-general-pope-francis-promote-peace.html