Mai gan mungdan matut mahkai lam hte seng ai Vatican lit hkam hte Miwa gumsan mungdan maigan hkring mang yan hkrum shaga bawng ban lam galaw lai wa ai shiga

Mai gan mungdan matut mahkai lam hte seng ai Vatican lit hkam hte Miwa gumsan mungdan maigan hkring mang yan Feb 14 ya shani Germany mungdan Munich hta hkrum shaga bawng ban lam galaw lai wa ai. Shim lam hte seng ai ahkyak ai bawngban hpawng galaw na matu mungkan mungdan 35 kaw nna sumtsan hkring mang ni Germany mungdan Munich mare kaba hta du hpawng nga ma ai aten, ya na zawn mai gan mungdan matut mahkai lam hte seng ai Vatican lit hkam Saradaw kaba Paul Richard Gallagher hte Miwa gumsan mungdan maigan hkring mang Wang Yi yan hkrum shaga bawng ban lam galaw lai wa ma ai lam re nga ai.

Ndai hkrum shaga bawng ban lam hte seng nna Vatican shiga dap kaw nna Feb 15 ya shani ndau shapraw dat shiga hta, “Mungdan lahkawng lapran matut mahkai mahkri shawn lam hta mai kaja ai maga de rawt jat wa nga ai zawn, ya na hkrum shaga bawngban lam hpe mung grai hku hkau ai masa hte galaw lai wa ai, Miwa gumsan mungdan hta Saradaw dang da ai magam lam hte seng nna lai wa sai shaning September shata 22 ya shani mungdan lahkawng lapran myit hkrum ta masat htu da lai wa ai lam ni hte seng nna mung bawngban lam galaw ai, Miwa gunsan mungdan mungchying sha ni yawng a mai kaja ai akyu a matu mung, bai mungdan kata na Kahtawlik nawku hpung a masa grau mai kaja masa byin tai wa hkra mung, mungdan lahkawng lapran matut nna tsun shaga bawng ban lam ni dingrun galaw mat wa lu na lam ni hte seng nna mung bawngban lai wa ai. Mungdan kata byin nga ai Coronavirus zinli hte seng nna Miwa mungdan asuya a n gun dat galaw shakut nga ai magam lam ni hpe n gun lu manu shadan ya nga ai lam, ya na zawn n gun dat shakut nga ai lam hta Miwa gumsan mungda asuya hte myit hpang nga ai lam ni hpe tsun shaga bawngban lam galaw lai wa ai” nga nna Zenit shiga dap kaw nna shana dat nga ai.               

https://zenit.org/articles/holy-sees-secretary-for-relations-with-states-meets-with-minister-of-foreign-affairs-of-peoples-republic-of-china/