Nigeria mungdan hta hkrum nga ai Hkrsitian ni zingri zingrat lam ni hpe kadai nmu nchye ya, ntsun shaga ya lawm byin nga ma ai shiga

Nigeria mungdan hta hkrum nga ai Hkrsitian ni a zingri zingrat sat hkrum lam ni hpe kadai nmu nchye ya, ntsun shaga ya lawm byin nga ai majaw, mungkan mungdan ni mu mada ya nna garum la na matu Nigeria Kahtawlik jau langai kaw nna tsun shajin lam galaw dat nga ai.

Nigeria mungdan Maiduguri ngu ai saradaw ginwang kaw na Jau Joseph Bature Fidelis tsun lajin lam galaw dat ai hta, “anhte a hpu nau ni lam nmaw ntsa ni hkan sat sharu hkrum nga ai, Nigeria mungdan a Dingdung maga shanu nga ai Hkristian hpung masha ni hku nna nchyun shanawng myit masa rawng Muslim masha ni a zingri zingrat sat sharu ai lam ni hpe hkrum nga ma ai” nga nna tsun dat nga ai.

Nigeria mungdan a sinna dingda maga, Kaduna ngu ai mare kaji hta, Muslim hpyen uhpung kaw nna jau tai jawng ma kaji ni marai 4 hpe rim gyit woi mat wa ai mabyin a hpang ya na zawn Jau Joseph Bature Fidelis a tsun lajin lam pru wa ai rai nga ai.

Ya na zawn jau tai jawng ma kaji ni rim gyit woi mat wa hkrum ai mabyin gaw, ndai zawn re ai lam ni law law kaw nna ya jahtum byin ai mabyin langai rai nga ai. Lai wa sai shaning 2019 ning laning laman hta sha pyi makam masham a majaw zingri sat kau hkrum lai wa ai Nigeria Hkristian masha ni marai (1,000) jan re, 2015 ning kaw nna rai yang sat kau hkrum lai wa sai Nigeria Hkriatin masha ni marai (6,000) jan rai nga sai. Dai re ai majaw, anhte hpe garum makawp maga la ya mi nga nna mungkan mungdan ni hpe akroi anoi lajin mayu ai, grau nna ngai hpaji sharin hkaja la lai wa ai Italy mungdan hte Europe dan mungdan ni hpe garum hpyi lajin mayu nngai” nga nna sumla hkrung hte rai nna ndau shapraw ai lajin lam hta Jau  Joseph Bature Fidelis tsun dat nga ai.

Dai ginra hta Hkristian ni hpe garum makawp maga la lam galaw na matu shim lam n gun law law jat nna jahkrat da ya sai, nga nna mungdan asuya ni kaw nna tsun nga ma ai raitim, Hkristrian ni law law matut nna zingri hkrum sat hkrum ding yang naw rai nga ma ai, ng anna Vatican shiga dap kaw nna shana dat nga ai.        

https://www.vaticannews.va/en/church/news/2020-01/nigeria-persecuted-christians-appeal.html