Saradaw ni a Synod hkumra hpawng hta, Ramma ni a nsen hpe madat ya ai lam, Nawku Hpung kata amyu shayi ni a lit lamang lam ni hte seng nna tsun shaga bawng ban lam ni galaw nga

Nbung ai Mungdan ni hta, nbung ai mabyin masa ni hte nga pra nga ai ma raitim, ramma ni a hkam sha, ra sharawng ai lam ni gaw maren rai nga ma ai, shanhte hpe madat ya na, shanhte galaw lu ai lam ni hpe galaw shapraw lu na ahkang jaw ya na hte, shanhte hpe kam hpa lam madun jaw na hpe ramma ni ra sharawng nga ma ai, nga nna hkrumra hpawng hte seng nna shiga dap ni de tsun sang lang ai lam galaw ai hta India mungdan na Cardinla Gracisa tsun dat nga ai.  

“Hkumra hpawng a shawng na daw ngu na hta madat ya ai lam ni galaw nga ai, ramma ni a mabyin ni hte Karai Kasang gara hku shamu shamawt nga ai, ngu ai lam ni hpe mdat ai lam ni galaw nga ai, hkumra hpawng lajang ai hku nna tau nau sa da ai laika ni kaw nna bai htang wa ai sen lam hte re ai laika ni hpe lu la ai, dai ni hpe hti madat ai lam ni galaw nga ai, Nawku daw jau ai lam ni hpe ya na hta grau htap htuk hkra galaw na matu nga nna tsun madi madun dat ai laika ni mung law law lawm nga ai, hkumra hpawng a tsang lahkawng ngu na daw hta ndai tang madun dat ai ning mu ni hpe dinglik masam maram ai lam ni galaw nna, tsang masum ngu na daw hta gaw htap htuk ai mahtai masing masa ni hpe jahkrat jaw ai lam ni galaw mat wa na re,” nga nna Cardinal Gracias tsun dat nga ai.  

Matut nna Cardinal Gracias tsun ai hta, “Nawku hpung kata amyu shayi ni a lit lamang ni hte seng nna mung tsun bawng ban lam galaw nga ai, ndai lam hte seng nna, ntsa lam galai shatsawm ai masa nre ai sha, Nawku hpung kata daw dan hparan ai lit lamang ni hta amyu shayi num sha ni a lit magam ni hte seng nna galai shai ai lam ni galaw ra na re, nga nna mung Wa Sarabyin Francis tsun ai lam nga ai, Mungkan Mungdan law law kaw nna ramma ni tang madun da ai lam ni hte mung ndai amyu shayi ni hte seng ai lam ni law law mung lawm nga ai,” nga nna Cardinal Gracias kaw nna shiga dap na masha ni hpe tsun sang lang dat nga ai lam Vatican shiga dap kaw nna shana dat nga ai.

Source : Vatican News