Coronavirus zinli hkrum nga ai Miwa gumsan mungdan de Vatican kaw nna tsi mawan lawm ai Myi man magap ni shagun jaw ya ai shiga

Coronavirus ana zinli a majaw masha marai 400 jan si hkrum lam byin nga ai Miwa gum san mungdan de Vatican kaw nna tsi myi man magap sen- 7 daram shagun jaw dat ya nga ai. Masha wan 1,300 jan shanu nga ai Miwa gumsan mungdan hta tsi myiman magap ni dum hprut nga sai, nga ai shiga ni pru wa ai hpang ya na zawn Vatican kaw nna tsi myiman magap ni shingyin nna Miwa gumsan mungdan de shagun jaw ya ai lam rai nga ai.

Wa Sarabyin a rung, garum ningtum lam hte seng ai Vatican lit hkam Caridinal Konrad Krajewski woi awn let Jan 27 ya shani kaw nna tsi myiman magap ni hpe lahkawn shing gyim la nna, Coronavirus grai sawng ai masa chyam bra nga ai Miwa gumsan mungdan Hubei, Zhejiang hte Fujian ginwang ni de shagun jaw ya ai lam rai nga ai.

Miwa gumsan mungdan hta Dec 12 ya shani hkan na byin hpang wa Coronavirus ana zinli manghkang gaw, Feb shata praw 4 ya shani du hkra na jahpan hta, ndai ana zinli a majaw si hkraum sai masha marai 492, ana kap ai masha marai 24,500 jan rai nga sai rai nga ai.

Asak 99 rai sai Miwa Saradaw Joseph Zhu Baoyu mung hkum kahtet nkawp hkraw ai masa byin nga ai hte ndai ana kap na masa rai nga majaw laksan tawn da nna tsi gawn lajang lam ni galaw ya nga ai. Bai asak 62 ning re ai Jau Ma Yuxing ngu ai wa hta mung ndai ana byin kap nga sai, nga nna Feb praw 3 ya shani na shiga hta tsun shana da nga ai. Ndai Jau Ma Yuxing gaw Jan 11 ya shani Wuhan de sa nna hpang shani bai ginhtang wa ai, Jan 24 ya shani shi hta ana kap nga sai lam sawk sagawn lu ai majaw tsi rung hta laksan bang da nna tsi lajang hkam la nga ai re, nga ai.

Beijing saradaw kaba Li Shan kaw nna mung, ndai ana zinli hte seng nna sadi maja na matu, kaga mare ni de bu hkawm sa nga ai jau Mama ni mung Beijing de lawan bai ginhtang wa na matu,  shawa law law jawm lang ai mawdaw wan leng ni hte hkawm sa ai lam ni n galaw na matu sadi jaw shana ai lam ni galaw da nga ai. Ya na zawn li ana byin nga ai majaw Miwa gumsan mungdan nawku hpung hku nna sasana magam bungli ni hpe gan jahkring da nga ai rai tim, grai myit tsang myit ru ai lam ni nnga ai sha, myit azim sha nga na matu mung nawku hpung kaw nna tsun n gun jaw lam galaw da nga ai.

Grau sang ai masa ana chyam bra ai Miwa gumsan mungdan na Wuhan, Ezhou, Huanggang hte kaga mare kaba 10 jan daram hpe pru shang lam ni n galaw na matu mung asuya kaw nna pat shing dang da nga ai. Dai shara ni hta mung shawa masha marai wan 60 daram shanu nga ai re, nga nna Ucan shiga dap kaw nna shana dat nga ai.  

https://www.ucanews.com/news/vatican-sends-masks-to-help-tackle-virus-in-china/87140