Roma mare gaw, simsa ai mare, hpu nau tsawra myit rawng ai mare tai nga na matu Wa Sarabyin tsun shadut dat nga ai shiga

Roma mare hpe Italy mungdan a mare daju ngu nna ndau hpang ai shaning 150 ning hpring masat nhtoi galaw let, Roma mare hpe, simsa ai mare, hpu nau tsawra myit rawng ai mare tai nga hkra shakut na matu Roma mare masha ni hpe Wa Sarabyin Francis tsun shadun dat nga ai.

‘Giuseppe Garibaldi’ ngu ai Italy hpyen hpung kaw nna Roma mare hpe gasat dang la kau lu ai hpang kade nna yang, 1871 ning Feb praw 3 ya shani hta, Roma mare hpe Italy mungdan a mare daju ngu nna ndau hpang dat ai rai nga ai. Ndai zawn ndau dat ai shani kaw nna Roma mare hpe nawku hpung kaw nna up hkang nga ai masa mung ngut mat sai rai nga ai.

“Roma mare hpe Italy mungdan a mare daju ngu nna ndau galaw dat ai lam gaw mai kaja ai lam rai nga ai, dai shani aten kaw nna, Roma mare hte Italy mungdan gaw labau nnan hte hkawm sa hpang mat wa sai zawn, Nawku hpung mung labau nnan hte hkawm sa hpang mat wa sai rai nga ai.” Nga nna Wa sarabyin Francis tsun dat nga ai.

Roma mare hte nawku hpung gaw yak hkak ai lam ni hpe rau jawm hkrum lai wa ai zawn kabu gara ai lam ni hpe mung rau jawm hkam la ra lai wa ai mabyin ni hte seng nna wa sarabyin tsun ai hta gaw, “1943 hte 1944 ning lapran hta, Roma mare hta shanu nga ai Jews ni law law hpe Nazi ni rim la nna masha sat dabang ni de sa kau ai lam ni galaw lai wa ma ai. Dai zawn re ai aten ni hta, Nazi ni hkan rim ai kaw nna lawt lu hkra Jews ni law law hpe nawku hpung kaw nna shingbyi shara ni jaw ya let makawp maga ya lai wa ai, ndai zawn galaw ya ai a marang e Jews ni hte nawku hpung lapran nga lai wa ai nju ndawng myit machyi hkat lam madin ni hpe run kau lu lai wa ai, hpu nau tsawra myit hpe gaw gap lu lai wa ai. 1962 ning kaw nna 1965 ning laman Roma mare hta galaw lai wa ai lahkawng lang ngu na Vatican zuphpawng kaba hta mung mungkan mungdan shara magup kaw nna makam masham ningbaw ni law law ndai Roma mare hta du zup lam galaw lai wa ai. Roma mare gaw yawng a shingbyi shara tai ya lai wa ai. Ya dai ni mung ndai Roma mare kaba gaw myit hkrum gahkyin lam mungkan sima lam hpe gaw sharawt ya ai mare, yawng hpe zinlum la chye ai, hpu nau tsawra myit madun ya ai mare kaba hku nna matut grin nga lu hkra, Roma mare masha ni matut jawm shakut nga ga” nga nna Wa sarabyin Francis tsun shadun dat nga ai lam Vatican shiga dp kaw nna shana dat nga ai.       

https://www.vaticannews.va/en/pope/news/2020-02/pope-francis-rome-capital-italy-150-anniversary.html