Nawku Hpung Shiga

Majan kaba bai byin wa na hpe mung chying sha ni hkrit tsang nga ma ai, nga nna Gaza kaw shanu nga ai jau tsun dat nga ai shiga

“Israel mungdan hte Gaza lamu ga jarit mayan adawt kasat lam ni bai byin pru nga ai majaw dai mayan shanu nga ai mung chying sha ni a prat masa grau yak hkak hkrit tsang lam ni byin pru nga ma ai the majan kaba bai byin wan a hpe mung chying sha ni hkrit tsang nga ma ai” nga nna Kahtawlik Jau langai tsun dat nga ai.

“Israel mungdan asuya kaw nna Gaza jarit mayan hpe pat shing dang da ai shaning 11 daram rai sai majaw Gaza kaw shanu nga ai mung chying sha ni a matu myit mada shara nnga byin nga ma ai, ndai kaw shanu nga ai masha ni shamu shamawt hkawm nmai, gara de nhkawm na matu pat shing dang da hkrum nga ai the, lu hka malu masha mung nlu, myit hprap wan ni mung nnga re ai grai yak hkak ai masa rai nga ma ai, majan nnan bai byin wa na hpe mung grai hkrit tsang nga ma ai” nga nna Gaza Holy Family ginwang up jau, Jau Mario Da Silva Vatican shiga dap de lai wa sai bat lahkawng ya shani tsun dat nga ai.

Ndai zawn re ai yak hkak hkrum nga ai masa aten nawku hpung kaw nna galaw ya lu mai ai lam ni the seng nna Jau Mario tsun ai hta gaw, “mung chyin sha ni hpe shalan shabran lam the myit mada shara jaw ya lu hkra shakut ya ai, simsa lam bai gaw gap la lu na mahtai gaw uhpung lahkawng maga na ni tsun shaga bawng ban lam ni galaw nna myit hkrum lam lu la hkra galaw ai masa sha rai na rai nga ai, ndai Gaza hta shanu nga ai lachyawk mi sha re ai Hkristian ni kaw nna lai wa sai shaning 15 ning laman majam a majaw asak si hkrum lai wa ai ni 70 jan rai mat sai, nga nna Gaza ginwang up jaw, Jau Mario Da Silva Vatican shiga dap de tsun dat nga ai.

Add new comment

7 + 0 =