Libya mungdan na yak hkak mang hkanglam ni hpe simsa ai masa hte ran hparan mahtai tam la lu matu Wasarabyin tsun lajin dat nga ai shiga

Libya mungdan na yak hkak mang hkanglam ni hte seng nna ran hparan lam galaw ai hta simsa ai masa hte ran hparan mahtai tam la lu ai masa byin tai hkra shakut na matu Wasarabyin Francis tsun lajin dat nga ai.January 19 ya, Laban shani, shani ka-ang Angelus akyu hpyi woi ngut ai hpang, Libya mungdan mang hkang hte seng nna ran hparan lam galaw na matu mang hkang hta shang lawm nga ai uhpung ning baw ni, Germany mungdan Berlin mare daju hta zup hpawng galaw nga ma ai lam hpe tsun shana dan let, ya na zawn Libya mungdan mang hkang hpe simsa ai masa mahtai tam ran hparan la lu hkra galaw na matu Wa sarabyin kaw nna tsun lajin lam galaw dat ai rai nga ai.

Wa sarabyin tsun ai hta, “Libya mungdan mang ahkng hte seng nna Germany mungdan hta galaw nga ai zup hpawng gaw, Libya mungdan hta mang hkagn lam ni hkoi mat wa nna, shada jawm jahkrum mahtai tam la lu na lam ni yawng a npawt nhpang tai wa na hpe myit mada ai, ndai zup hpawng a marang e Libya mungdan mungchying sha ni yawng myit mada nga ai simsa ai mungdan byin tai wa na lam de woi yawng sa wa ya lu ai mahtai ni hpe bawng ban shapraw ya lu na zup hpawng rai na hpe myit mada ai” nga nna Wa sarabyin tsun dat nga ai.UN mungkan rap daw kaw nna sawk sagawn tang madun da ai jahpan ni hta, mungdan kata byin nga ai kasat gala mang hkang lam ni a majaw si hkrum lai wa ai masha ni tsa lam hte ru nna rai nga ai hte, kaga hkying lam hte ru ai masha ni mung hprawng htawt hkawm nga ra ma ai re, nga ai.

Libya mungdan dinghku majan hta shang lawm nga ai ningbaw ni hpe Germany mungdan kaw nna shaga gahkyin la let Berlin mare daju hta zup hpawng galaw nga ma ai lam rai nga ai. Ndai zup hpawng hta Russian mungdan gum san magam Vladimir Putin, Turkey mungdan gum san magam Recep Tayyip Erdogan, UK mungdan hkying mang daju Boris Johnson, bai UN mungkan rap daw kaw nna ahkyak ai salang ni mung shang lawm nga ma ai re, nga ai.

Ya na zawn zup hpawng galaw nga ai aten hta, Jak sau jak rung shara ni hpe adawk kasat ai lam ni n galaw na matu lahkawng maga na mung masa ningbaw ni hpe tsun lajin lam mung galaw da nga ma ai.

2011 ning kaw nna Libya mungdan kata hta nsim nsa kasat gala lam ni byin hpang wa ai the, shaning law law mungdan hpe adip arip di nna up hkang lai wa ai mungdan ningbaw Muammar Gaddafi mung sat kau hkrum lai wa sai rai nga ai, ng anna Vatican shiga dap kaw nna shana dat nga ai.        

https://www.vaticannews.va/en/pope/news/2020-01/pope-appeals-for-a-peaceful-solution-to-the-ongoing-crisis.html