Dingda Korea Mungdan Gumsan Magam Vatican de sa du nna Wa Sarabyin Francis hte hkrum shaga bawng ban ai lam galaw na shiga

Dingdung Korea Mungdan ning baw tsun htet dat ai mungga ni hpe Wa Sarabyin hpe tsun hti dan ai lam galaw na matu, Dingda Korea Mungdan gumsan magam Moon Jae-in ya ndai Oct 18 ya shani Wa Sarabyin Francis hpe Vatican hta sa du hkrum shaga bawng ban ai lam galaw na re nga nna, Vatican shiga dap lit hkam Greg Burke kaw nna lai wa sai bat lahkawng ya shani tsun ndau ai lam galaw dat nga ai.

Vatican shiga dap lit hkam Greg Burke tsun ai hta, “Oct 17 ya shani San Peter Nawku htingnu kaba hta Korea zin lawng simsa lam a matu, Vatican amu madu Cardinal Pietru Parolin woi awn nna Missa hkungga nawng ya ai lam galaw na re, dai Missa hkungga hta Dingda Korea Mungdan gumsan magam Moon Jae-in mung shang lawm na rai nga ai’ ng anna tsun dat nga ai.

Dingda Korea Mungdan gumsan magam a tsun shaga lit hkam kaw nna shana wa ai lam hta gaw, “Dingdung Korea Mungdan ning baw kaba Kim Jong-un tsun htet dat ai mungga ni hpe, gumsan magam Moon Jae-in kaw nna Wa Sarabyin Francis hpe tsun hti dan ai lam ni galaw na re, ningbaw kaba Kim Jong-un hten dat ai ga ni hta, Wa Sarabyin kaw nna Dingdung Korea Mungdan Pyongyang mare daju de du gawan sa wa na rai yang kabu gara hkap tau la na re, nga ai shiga mung lawm nga ai” nga nna tsun dat nga ai.

Korea zin lawng hta byin nga ai lam ni hpe Wa Sarabyin Francis kaw nna ni ni htep yu maram ai lam ni ding run galaw nga ai rai nga ai. 2014 ning hta, 6 lang ngu na Asia dan Ramma poi kaba galaw ai aten Dingda Korea Mungdan de Wa Sarabyin Francis sa du gawan lai wa yu ai. Dai aten shi a hkrun lam jahtum shani hta Korea Mungdan simsa lam a matu lak san Missa hkungga Nawng ya lai wa ai hte, “shada da ntsen hkat hkat ai myit masa, majan baw hkat mayu ai myit masa ni hpe yeng seng kau nna simsa lam gaw gap la lu na matu lam nnan tam la ra ai” nga nna hkaw tsun shadum ai lam mung Wa Sarabyin Francis galaw lai wa ai rai nga ai. 

Korea Mungdan lahkawng lapran na tsun shaga bawng ban lam ni hte Dingdung Korea hte American Mungdan lapran tsun shaga bawng ban lam galaw nga ai lam ni hpe mung Wa Sarabyin Francis kaw nna n-gun jaw madi shadaw lawm nga ai, rai nga ai, nga nna Vatican shiga dap kaw nna shana dat nga ai.  

Source : Vatican News