Anhte kabai kau ai, lahpawt kau ai malu masha ni gaw matsan mayan masha ni a malu masha re, ngu ai hpe myit dum ga, nga nna Wa sarabyin tsun dat nga ai shiga

Anhte kabai kau ai, lahpawt kau ai malu masha ni gaw matsan mayan masha ni a malu masha re, ngu ai hpe myit dum ga, nga nna Wa sarabyin tsun dat nga ai shiga

Anhte kabai kau ai, lahpawt kau ai malu masha ni, shing gyin mahkawng la ai malu masha ni gaw matsan mayan masha ni a malu masha re, ngu ai hpe myit dum ga, nga nna Wa sarabyin Francis tsun dat nga ai. Oct 16 ya, ‘World Food Day’ ngu ai mungkan malu masha nhtoi, the seng nna UN mungkan rap daw de shagun jaw dat ai mungga laika hta lahta na zawn wa sarabyin tsun dat ai lam rai nga ai.

FAO, Food and Agriculture Organization of the United Nation, ngu ai malu masha, hkailu hkai sha lam the seng ai UN mungkan rapdaw rung lit hkam hpang de shagun jaw dat ai Wa sarabyin a mungga laika hta, “Anhte ya galaw nga ai lam ni gaw anhte hkum nan hkrum kadup na anhte a shawng lam gam maka ni re, 2030 ning du yang, mungkan hta malu masha dum hprut ai masha kadai nmai nga ai, ngu ai masing hpe lai wa sai shaning 20/30 ning daram kaw nna matsing jahkrat shakut shaja lam galaw nga ga ai raitim, dai masing hpe nhkan shatut ai mungdan ni law law naw nga nga ai. Malu masha nlu kaw si hpang gara hkrum nga ai masha wan 820 jan nga nga mungkan hta, masha wan 700 jan gaw nau sha nna ladu shalai hpum nga ai, ngu ai mabyin gaw grai nan ntara ai, nhkru ai masa mabyin rai nga ai. Masha yawng a matu ra ai malu masha sha hpa mungkan hta nga nga ai raitim, masha shagu sha na malu masha lu nga ma ai nrai. Malu masha ni hpe kabai kau ai, lahpawt kau ai, ra ai jan hkra shajan shalai lu sha ai lam ni galaw kau nga ma ai” nga nna Wa sarabyin tsun dat nga ai.

Hkum hkrang hta ra ai n gun atsam lu la na a matu lu sha ai malu masha hte seng nna, ladu shalai ai lam ni a majaw byin pru ai mang hkang ni hte seng nna ga shadawn hku nna Wa Sarabyin tsun madun ai hta, “sai dwi jit dwi ana ni byin ai, salum sai lam hta sau pat nna salum ana byin ai, maga mi de gaw hkum hkrang hta ra ai malu masha n grung ai majaw lasi lamun machyi makaw hkrum nna si mat wa ai ni nga ma ai zawn, ra ai hta jan hkra lu sha nna nga npyaw machyi makaw hkrum rai si wa ai ni mung nga ma ai lam ka matsing sumhting da ai lam ni mung nga nga ai. Anhte kabai lahpawt kau ai, jahten shaza kau ai, ra ai hta jan hkra mahkawng shing gyin la da ai malu masha ni gaw matsan masha ni a malu masha sha hpa ni re, ngu ai lam hpe anhte dum hprang ra ga ai” nga nna Wa Sarabyin Francis tsun dat nga ai lam Vaticasn shiga dap kaw nna shana dat nga ai.                

https://www.vaticannews.va/en/pope/news/2019-10/pope-message-world-food-day-wasting-bread-poor.html