Matsan Mayan Masha Ni Gaw Karai Kasang Hpang De Anhte Hpe Ding Yang Woi Wa Ya Ai Ni Rai Ma Ai, Nga Nna Wa Sarabyin Tsun

Matsan mayan masha ni gaw anhte Karai Kasang hpang de ding yang du sa wa lu hkra lam woi wa ya ai ni rai ma ai, nga nna “World Day of the Poor” Matsan Mayan masha ni a mungkan masat nhtoi kaba shani hta Wa Sarabyin Francis tsun dat nga ai. Lai wa sai laban, November 17 ya, masum lang ngu na Matsan Mayan masha ni a mungkan masat nhtoi kaba shani San Peter nawku htingnu kaba hta nawng ya ai Missa hkungga mungga hta lahta na zawn Wa sarabyin tsun dat ai lam rai nga ai.

Wa sarabyin tsun ai hta, “htani htana ngang grin nga na re ngu nna shinggyim masha ni shadu nga ai lam ni gaw dai zawn ngang grin nga na lam ni nrai, Karai Kasang a matu ngu nna anhte gaw gap da ai nawku htingnu ni yawng hta Karai Kasang gaw grau nna hkyik hkam kaba dik nga ai. Mungkan shiga ni tsun garu nga ai lam ni yawng hta shinggyim masha ngu ai hte anhte a htingbu htingbyen ni gaw grau nna manu dan la nga ai. Dai re majaw shinggyim prat hta gara madaw grau ahkyak ai ngu ai lam hpe anhte mu chye hkra shakut ra ga ai. Karai Kasang a myi hta matsan mayan masha ni gaw manu dan ai ni rai ma ai, hpa majaw nga yang mastan mayan masha ni gaw kade a garum ya ai lam mung nra, tinang hkrai nga pra lu ai ngu ai myit shanhte hta nrawng ai, shanhte a atsam hte shanhte da hpran tsap lu ai ni nrai, langai langai a garum madi shadaw ya ai hpe ra nga ai ngu ai myit masa rawng ai ni rai ma ai. Matsan masha ni garum la na matu hpyi lajin wa ai aten myit ka un na malai tsawra ai myit hte azi mada yu ai Karai Kasang a mu mada ai masa hte yu mu nna shanhte hpe garum la ga. Matsan mayan masha ni a maga tsap let shanhte hpe daw jau nga ai lam gaw, lam magup hpe Madu Yesu mu mada ai zawn anhte mu mada ai lam tai na rai nga ai hte, gara gaw grin ai, gara ni n grin ai ngu ai lam hpe garan ging hka mu mada ai lam rai nga ai. N grin ai lam ni law law a lapran anhte sak hkrung nga ga ai aten galoi mung grin nga ai lam gaw tsawra ai lam sha rai nga ai. Tsawra myit madun la na matu garum hpyi nga ai matsan myan masha ni gaw anhte Karai Kasang hpang de ding yang du sa wa lu hkra lam woi wa ya ai ni rai ma ai, anhte sumsing mungdan du wa lu hkra garum ya ai ni rai ma ai, shanhte gaw anhte a sut gat rai nga ai zawn nawku hpung a sut gan mung rai nga ai. Htenza mat ai ngu ai galoi nnga ai, htani htana grin ai sut su nga mai lam gaw hpa baw re ngu ai hpe ndai matsan mayan masha ni anhte hpe mu mada shangun nga ai” ng anna Wa Sarabyin hkaw tsun lai wa ai.

Missa hkungga nawng ya ngut ai hpang Pawlu VI ngu ai gawk htingnu kaba hta dum nta shingbyin shara nlu ai ni, matsans mayan ni, grau nna ra kadawn nga ai masha ni marai 1500 daram hte rau Wa Sarabyin Francis shani shat jawm sha lam galaw lai wa ai, nga nna Vatican shiga dap kaw nna shana dat nga ai.     

# Vatican News#

https://www.vaticannews.va/en/pope/news/2019-11/pope-francis-mass-world-day-poor-homily.html