Kun Dinghku Ngwi Pyaw Hkra Gawgap La Ga

Kun Dinghku Ngwi Pyaw Hkra Gawgap La Ga

Tsaw ra Nu wa ni e Matut mahkai lam hte seng ai hpaji jaw Salang ni yawng gaw kaja wa jet ai madat ya ai lam gaw Ga law ninggyet hkat ai lam hpe shayawm ya ai sha n ga Kam ai myit hpe grau jat wa shangun nna myit pyaw ai matut mahkai lam hpe lu la shangun ai nga nna hkap la da ma ai re.Madat ai ngu ai lam hta masha kaga wa hte tsun shaga yang madat na gaw loi nga ai raitim,tinang a ningrum ningtau ga shaga ai hpe madat na gaw loi gaw yak na gaw rai nga na re.Raitim madat ai a atsam marai gaw grai kaba ai majaw galaw shaman la gring nga ga ai re.Nang kaja wa madat ai hpe madun mayu yang TV hpaw da yang pat da,ph lang taw nga yang tawn da nna kaja wa myit lawm hkum lawm hte madat la nna tinang madat la ai hpe kaja wa galaw ai ngu ai hpe madun da na mung ahkyak nga ai re. Madat ai ngu ai gaw tinang a ningrum ningtau pawt taw nga ai ten hta grau ahkyak nga ai re.Dai ten tinang kaja wa madat ya ai rai yang hpabaw manghkang byin taw nga ai ngu ai hpe chye na wa nna gara hku hparan la lu na ngu ai hpe chye wa na sha rai nga ai.Dai majaw madat ai ngu ai hpe shaman la na ahkyak nna Masha kaba ni,manaw manang ni hte hkrum ai shaloi madat ai zawn dinghku kata hta madat ya ai rai yang dinghku hta ningrum ningtau hte ga law hkat ai lam ni yawm wa na sha rai nga ai.

Myit hpaji hta masha langai hte shawng hkrum yang tinang gaw tinang ra ai lam hpe sha myit shang lakawn chye ma ai.Raitim aten na wa jang tinang nra ai lam hpe sha myit shang lahkawn chye ma ai nga nna tsun da ma ai.Lama na dinghku langai hta kaja ai lam hpe myit nshang nlakawn la ai sha nkaja ai lam hpe chyu myit shang lakawn ai rai yang dinghku gaw nau nna yang hten wa chye nga ai re.Dai re majaw tinang a ningrum ningtau a kaja ai lam ni hpe sha yu myit shang lakawn lanawn ra ai,tinang a ningrum ningtau hta tinang ra ai lam ni law law nga na re dai lam ni hpe sha chye sawn myit shang la nga ga.

Aput angun nga ai lam gaw kanawn masum lam hpe  ja dingkang hkat shangun ai sha n ga manghkang hpe kaja hkra nmai hparan la nga ai re.Tinang gaw aput angun nga magang tinang a ningrum ningtau gaw grau nmadat magang sha rai nga ai. Lama na tinang ra ai lam hpe nlu jaw ai nga yang gaw tinang hpabaw galaw nga ai kun ngu ai hpe bai sawn yu ra ai. Dai majaw aput angun nga ai lam hpe  galai nna tsun yu ra ai.tinang a ningrum hpe galai shai shangun mayu ai rai yang shi a kaja ai lam hpe tsun shalawm ya yang chyeju dum hkam na myit pyaw na rai nna, tinang a ningrum wa mung tinang hpe myit pyaw na matu grau nna galai shai shangun mayu na sha rai nga ai.

Hkum hkrang shada hkrum hkra ai lam nga ai gaw myit hte seng nna matut mahkai hkat ai zawn sha ahkyak nga ai re.Hkum hkrang shada hkrum hkra ai lam gaw myit tsam pu tsam pa ai myit hpe shayawm ya lu nna tinang a ningrum hpe tinang hku nna ahkyak la ahkyak shatai taw nga ai ngu ai hpe madun ya ailam byin shangun nga ai.Dinghku hta shani shagu ahpum manam ai lam hpe galaw ai rai yang ga law hkat na matu yak nga ai re.

Tsawra hkungga Nu Wa ni e  shadut shakat shagyip shagyeng ai lam nmai galaw ai.Masha langai gaw galai shai mayu yang she galai shai na re nga ai hpe chye na da ra ai.Tinang kaw nna ningrum hpe shaning law law nga nang wa ai lai kyang langai hpe sa galai ya nmai nga ai.Shanhte shut ai ngu ai nhkam la da ai lam hpe shadut shakat galai shai shangun nmai re.Ndai hpe galai shai u ngu na malai ningrum a ra ai lam hpe aten la madat ya nna galai shai ai lam hta garum la na matu sha ahkyak nga ai re.

Anhte gaw ningrum ningtau jan rai yang gaw myit mada lam ni hpe shayawm ra ai,ningrum ningtau wa rai yang gaw hpring zup lit la chye ra ai.Myu shayi ni gaw dinghku langai kaw nna hpabaw ra sharawng ai nga yang tsaw ra myit,manu shadan ai lam,madat ai lam,lakawn lanawn lanu lahku la ai hte myit krem myit dik ai lam hpe ra sharawng ai re.Myu shayi ni hte shanhte ra sharawng ai lam ni hpe mahkawng da ai jahpan galu nga nna ningrum wa a ntsa hta mung myit mada lam law law nga chye ma ai.La ni gaw dinghku langai hta na ra ai lam law law nnga ai. Dinghku langai hta la ni hte num ni a lapran hta myit mada ai lam gaw grai shai grai kaba nga ai. Dai majaw Kun dinghku langai hta manghkang nbyin na matu gaw myit mada hpyi shawn ai lam ni hpe shayawm nna shai hkat ai kaba ai lam hpe shayawm la ra ai zawn sha madu wa ni hku nna mung madu jan ra ai lam rai nga ai dinghku hpe ningshawng tawn nna grau nna madat ya ai zawn re ai lam ni hpe lit nga nga  hte grau nna galaw ya na matu ahkyak nga ai re.

By : John Mung Hkrang