Kanawn Mazum Yak Ai Myit Masa Lam ( Youth program )

Dai ni na prat hta, kajai gumhkawng ai ga si langai nga ai, dai gaw, “ Kanawn mazum lam grai nkaja ai ” ngu ai ga si rai nga ai. Tinang hkrai tinang nga sa let, kanawn mazum yak ai hte, masha hpawng hte nchye nga ai masha, ngu ai rai nga ai. Hkrit tsang ai, gaya ai, n-gwi ai, marai nrawng ai kum la rai nga ai. Dai zawn re ai masha gaw, kanawn mazum lam hta, ningra wa shangun ai masha byim shangun chye nga ai. Dai myit masa a ning pawt ninghpang gaw, myit hkam nkaja ai a-na a majaw byim shangun ai rai nga ai.

Kaning re ai mabyim ni a majaw, dai zawn re ai myit a-na lu wa a ta nga yang, makaji ten hta, kanu kawa, makyin jinghku ni hte, makau grupyin ni a, sharin achyin lam woi madun, shapan shalat, shakut shazet ai lam, shut shai ningra ai a majaw, byim pru wa ai a-na rai nga ai. Kanu Kawa ni, tinang a ma hpe kam mara di na tawn da ai, galaw shut, tsun shut wa ai ten, adup abyen kayet let, jahkrit shama ai,marawn bun ai, shanhte ma ni hpe hpa nsawn ai, bai nna makau grupyin prat rum manang ni hte, nkanawn mazum shangun ai, shanhte a wang lu wang lang ahkaw ahkang hpe, pat shingdang da ya ai, ten shagu hpa lam hta rai tim, pat shingdang hkrum ai lam amyu myu ni a majaw, byim pru wa ai ni rai nga ai.

 Dai re ai majaw kaba wa ai shaloi na, shanhte a myit masa, kyang lailen ni gaw, ma kaji ten hta, shanhte hkrum sha mat wa sai mabyim ni hta, grai ru jung let, myit masa kyang lailen ni, shapraw ai rai nga ai. Ma kaji ten hta, shanhte mahkrum madup nkaja ai hku nga kaba ai rai yang, kaba wa tim, nkaja ai lai len ni rawng wa nga ai. Kaji ai ten hta, mai kaja ai hku, nga kaba wa ai rai yang, kaba wa ai ten hta, kaja ai masha ni byim tai wa lu nga ai. Kanu kawa tai nga sai ni, tinang a kashu kasha ni hpe, sharin shaga ai lam hta, hkrang jaw ai hku, si mani ai hku, sharin achyin shakung shahpan lam woi madun la na matu, grai ahkyak nga ga ai.Tinang myit kraw kata kalang dat, pawt mayu ai myit ni a majaw, kasha ni hpe daw dan sharin, shaga ai lam, nmai galaw ga ai, mabyim hpe atsawm sagawn yu nna, ma ni shut wa ai ten hta, galu kaba ai myit, sumnung shingdi ai myit, majing hte madi madun sharai sharin ya ra ga ai.

Dai zawn sharin achyin ya ai rai taw gaw, myit machyi, myit npyaw ai hte, hkrit tsang ai myit ni, ma kaji ni kaw, nrawng nkap wa lu nna, zet tsang gwi hkring wa na ra ai. Galaw ra, galaw ging ai hpe mung, kaja ai maga hku, gwi gwi galaw wa na mara ai. Ma kaji ni hpe, tinang hkum tinang kam hpa ai myit hte shim lum ai myit marai ni jaw ya lu na matu gaw, kanu kawa  tai nga ai ni a ahkyak madung lit kaba langai rai nga ai. Shim lum ai, gwi hkrim ai myit marai, nku kau dat ai gawng kung masha ni, masha hpawng kaw tsun shaga, hkawm sa n-gwi ai hte jut hkrai machyu jut de hkrai matsut mayu ai myit ni rawng wa nga ai. Masha ni hte  shingjawng na marai nrawng mat ai. Lama myi hpe galaw mayu ai ai myit ni rawng ai raitim, shut na hpe, tau hkrau hkrit tsang ai majaw, tinang kaw nga taw ai, atsam marai ni mung, yat yat rai mat wa let, sak hkrung nga pra ai ni law law hpe mu lu nga ga ai.

Kanawn mazum lam hta, gawng kya shangun ai lam gaw, anhte a myit masa ni shut taw ai a majaw rai nga ai. Moi ma kaji ten hta, kanu kawa ( Sh) makau grupyin ni,lama ma hku nna, tinang hpe myit machyi shangun ai , gwi hkrim lam hpe pat shing dang ya ai, bawng ring lam hpe jahten sharun kau ya ai. nden ja myit ni hpe ninghkap shamyit kau ya ai, mahkrum madup ni a majaw, myit machyi myit kaji mat wa ai rai nga ai. Kanawn mazum lam gawng kya ai masha hte hkrum katut wa ai ten hta, anhte chye da ra ai lam gaw, shi hpe hkap la let, manang tai ya nna,lam woi shading sharai pawn ba la ra na matu, grai ahkrak nga ga ai. Yawng gaw, lama ma mi hta, gaw ningra ai shiggyim masha ni hkrai re ai majaw, dai zawn kanawn mazum nhkrak ai manang ni hpe jahpoi asawng ai lam tsep kawp nmai galaw ga ai

Shawng mu shawng jawng ngu ai ga malai hkan nna, jahpoi asawng ai lam n-galaw ga. Nang ngai anhte hta,mi tsun lai mat sai kanawn mazum yak ai masha jahpan kaw, lawm taw ai rai yang, tinang a myit jasat kyang lai len ni hpe, galai shai kau let, sharai la chye na gaw, ahkyak kaba rai nga ai. Kadai raitim hkum tsup ai masha ngu nnga ai re majaw, tinang a gawng kya ai lam hpe, masha ni madi madun wa ai shaloi, pawt sindawng ai lam, nnga ai sha, hkap la let, sharai la chye ra ga ai. Yawng gaw hkum tsup ai nre hpe, dum let, nhkum tsup ai lam hpe, hkap la nna sharai la chye ga ngu saw shaga let.

#crdmalawt(udangpawt),#rvakachinservice.