NINGBAW NINGLA HTE MANG HKANG HPARAN LADAT LAM NI 

Dai ni na ramma lamang hta gaw, NINGBAW NINGLA HTE MANG HKANG HPARAN LADAT LAM NI  ngu ai gin lam hte seng nna, gam garan ya mayu ai.

Tsawra ai ramma ni ningbaw ngu ai gaw, mang hkang ni hpe lit la sawn maram, jep joi daw dan ya nga ai wa rai nna, ningbaw hte mang hkang gaw ndi nhka bai kahtap hkrum kadup nga ai lam rai nga ai, ningbaw ningla ni gaw, ning baw a lam jaw ai hta, ahkyak ai bungli langai gaw, mang hkang hparan ai lam rai nga ai, mang hkang ngu ai gaw, ningbaw ni a matu, nhkrum n katut yang,nbyin ai bungli langai mi re.

Teng sha nga yang, mang hkang nnga ai shinggyim wuhpung wuhpawng hta ningbaw ngu ai masha nra ai, byin pru maw ai mang hkang hpe hparan na matu, ningbaw ngu ai wa byin pru wa ai, shyinggyim wuhpung wuhpwang hta, mang hkang ngu ai garai nnga nna, grai sum nung ai sang lang ai shyinggyim masha wuhpung wuhpawng hte, kanawn mazum ai lam sha nga nna, mang hkang ngu ai npru, ningbaw ngu ai mung nnga ai, raitimung shyinggyim masha ni, nga sat nga sa lam rawt jat wa ai hte maren, shyinggyim masha ni a ra sharawng ai lam ni hte, mang hkang ni mung rawt jat law htam shuk shanut wa ai, dai mang hkang ni hparan ya na matu, ningbaw galaw ai wa nga nna,byin wa ai rai nga ai.

Shyinggyim masha ni a ra sharawng ai lam magup hte, shinggyim lam hkum sumhpa sha n ga, lu na sha na, bu na hpun na lam hkum tsup na matu re ai manghkang ni gaw, shinggyim labau hta rawt jat galai shai byin pru wa nna, dai mang hkang ni hpe, lata tam let, ningbaw ni byin pru wa ai lam rai nga ai, dai rai nna, shinggyim wuhpung wuhpawng makau grupyin hta mang hkang byin pru wa ai lam ngu ai masa ra rawng ai lam ni hte ningbaw ngu ai byin pru ai shingra tara hte maren, ningbaw galaw ai ni gaw, mang hkang ni hpe n katut kam nga ai, dai gaw ningbaw ni a matu shut shai ai ningmu langai mi rai nga ai, ning baw ngu ai gaw, mang hkang a majaw byin pru shangai wa ai re, mang hkang nga nna, dai mang hkang hpe ningbaw wa hparan gun hpai ya na matu, ningbaw nga nna,byin wa ai re, ga shadawn ramma ni a kaja ai lam rawt jat lam, mang hkang lam ni hpe, hkrum kadup hparan ya na matu, ramma ningbaw nga nna, byin pru ai, dai hte maren mung shawa ni a, lu sha bu hpun lam, hkum tsup lam hte, shyinggyim mang hkang lam ni hpe, hparan ya na matu, mung masa ningbaw ni pru wa ai dai majaw ningbaw ni gaw, mang hkang ni hpe nmai  hkrit nmai koi, nhkrum na nmai nga ai, mang hkang hpe hparan ai ngu ai gaw, ningbaw ni a matu ahkyak ai bungli langai mi re.

Mang hkang ngu ai gaw, ningbaw langai a atsam ningja hpe, garang ai lunghkrut langai mi mung rai nga ai, ningbaw langai wa mang hkang hpe htap htuk ai hku hparan lu ai hte maren, awng dang ai ningbaw langai byin wa nna, yak hkak ai mang hkang ni hpe hparan lu magang kaja wa ram ai ningbaw ni byin wa magang rai nga ai, Sang Hpaw a ningbaw langai mi a atsam marai hpe, sang hpaw nbung laru hte katut nna, dai hka de hkrat lup mat wa na sha re yang, chye lu ai hte maren ningbaw kaja a atsam marai ningja gaw, yak hkak ai mang hkang hte hkrum nga ten, dan dawng nga ai, bungli langai hta mang hkang ni hkrum kadup magang, hpaji lu magang rai nna, rawt jat lam ni nga wa magang rai nga ai dai majaw mang hkang nnga ai bungli gaw, hkrang shamu ai lam nnga ai bungli rawt jat lam lu la na nloi nga ai, dai rai nna ningbaw ni gaw, mang hkang hpe wuhpung wuhpawng rawt jat lam hte tinang a rawt jat lam a matu, kum la madun ai, madi shadaw lam langai hku nna, myit la nhtawm, mang hkang hpe hkap tau la ra ai, htap htuk ai hte maren, hparan ya ra ai, mang hkang hpe koi yen nna, nmai hprawng ai, lamana tinang a bungli wuhpung wuhpawng kata na ra rawng ai lam ni pru wa ai ngu myit la nna, tinang a bungli wuhpung wuhpawng kata jep joi ra ai, rawt jat shamu shamawt lam nga ai wuhpung wuhpawng shagu hta, mang hkang ngu ai galoi mung nga ai lam rai nga ai, dai rai nna, ningbaw ni gaw, tinang a bungli wuhpung wuhpawng kata hta, tam sawk nga ra na rai nga ai

Mang hkang hpe nmu mu hkra, tam sawk la nna, hparan ya yang she ningbaw ni a lit kang ka nna, bungli ni mung rawt jat lam nga wa na rai nga ai, dai rai nna mang hkang ngu ai gaw,  hpa hpe tsun ai kun? Tsawra ai ramma ni, mang hkang ngu ai gaw tinang a wuhpung wuhpawng a yaw shada ai bandung shadaw de du na matu, hkawm sa ai hkrun lam hta, hkrum kadup chey ai dingbai dingba mayak mahkak yawng gaw mang hkang ni nan rai nga ai,  dai re nna, shinggyim masha tsang shagu na ningbaw ni a matu, tinang a shinggyim tsang langai hpe ningbaw ai hta, shuk shanut lam law la ai mang hkang ni hpe hkrum kadup ra na gaw teng sha rai nga ai

Tinang a yaw shada da ai lam ni gaw, loi ai sang lang ai hte maren, hkrum kadup na dingbai dingna mayak mahkak lam ni gaw, nloi la na rai nga ai, tinang a yaw shada lam gaw, madang tsaw nna, kaba nga ai hte maren, hkrum kadup na dingbai dingna gaw, law htam shuk shanut myit nzim nsa lam law law hkrum ra na rai nga ai.

Hpa mi nga tim, ningbaw ngu ai gaw, mang hkang hpe mung, magrau grang ai myit hte, galaw mat yang sha,  awng dang lam lu la na rai nga ai, tsawra ai ramma ni, ningbaw ni hkum nan tinang a wuhpung wuhpwang hpe, woi awn hkawm sa ai hta, wuhpung wuhpawng a shingra tara hte maren mang hkang kaji ni hte, kaba ni hpe, galoi mung hkrum kadup nga ra na re, dai zawn hkrum kadup hparan ra na mang hkang ni hpan hte hpan nga ai hta na, dai mang hkang ni hpe hkrawm dat yang, hpan lahkawng hku nna mu lu na re, langai myit hte seng ai mang hkang hte, lahkawng hkrang hte seng ai mang hang re, myit hte seng ai mang hkang ngu ai gaw, wuhpung wuhpawng kata na masha ni a myit masa  hkam la ai lam ni mu mada lam ni hpe, npawt nhpang nna,  byin pru ai mang hkang ni rai nga ai, myit hte seng ai mang hkang ni hta, myit npyaw ai lam ni, hpyi shawn ai lam ni, shawa n gun madun ai lam ni, nkaw nkawng galaw ai lam ni, jasu sharawt ai lam ni, n gun jaw myit sharawt ai lam ni, jahten sharun lam ni, dingbai dingna jaw ai lam ni rai nga ai.

Bai hkrang hte seng ai manghkang lam ni hta,gun rai shapraw ai lam hte seng ai mayak manghkang lam ni, bungli hte seng ai jak rai hte seng ai ladat hkum sum hpa mayak mahkak lam ni, katsi kahtet galai shai ai mang hkang lam ni, matut mahkai htaw wa htaw sa lam hta yak hkak ai lam ni, kungkyang ai lam hta yak hkak ai lam ni lawm nga ai re, kalang lang dai lam lahkawng gaw, langai hte langai shada da htinglu htinglai akyu jaw matut mahkai nga chye ai hpe mu lu nga ai, ga shadawn prat ndep ai ladat nkaja ai jak rai hte nhkum tsup ai gun nhprang rai ni grupyin hta bungli galaw ai bungli masha ni a matu mung, nhkum tsup ai matsun madun lam, yak hkak ai matut mahkai lam, prat ndep ai arung arai ni hte, ningbaw ra ai ningbaw kaji ni a matu hkrang hte seng ai mayak mahkak lam ni a majaw myit marai hkrat sum nna, manghkang ni byin pru chye nga ai, dai hte maren sha masa langai ngai a majaw, myit marai hkrat gawngkya nna, myit hte seng ai mang hkang byin nga ai lawu tsang na ma ni hku nna, myit marai nau wa hprang nga ai hte, dai ni a myit hte seng ai mang hkang hpe, shanhte nlu hkang zing nlu reng ai shaloi bungli hte seng ai arung arai ni hpe, jahten ai lam ni, madang dep n galaw shapraw ai lam ni gaw, hkrang hte seng ai mang hkang ni hpe byin shangun nga ai, dai rai nna, tinang a bungli wuhpung wuhpawng kata hta, byin pru nga ai mang hkang hpe, lit la ra na ningbaw ni gaw, kaga mang hkang lam amyu myu hpe mung atsawm hka ja nna, myit hte seng ai mang hkang hte, hkrang hte seng ai mang hkang lam ni hpe mung, htap htuk ai hku nna, hparan ya ra na rai nga ai ngu, ngam nga ai daw hpe du na ra ai  lamang hta bai gam garan ya na nngai

#youth

#rvakachinservice