Tinang A Amying Shing Teng Hpe Gara Hku Gaw Sharawt Na  ( Youth Program )

  Tinang A Amying Shing Teng Hpe Gara Hku Gaw Sharawt Na 

Masha langai a mying, na ai hte rau, shi a mying hte, shi a gumhkawng shiga ni hpe kalang ta myit yu na sha rai nga ai, shi gaw gara  maga ningtawn ai, Idea kaja ai wa kun?, gin shalat ai lam hta kung kyang ai wa kun? Ngyan marai kaba ai wa kun? mying gum hkawng ai wa kun? hkrat sum ai wa kun? yaw shada pan dung kaba ai wa kun? ngu zawn re ni hpe mu mada chye nga ga ai, dai hta, tinang gaw gara shara kaw shang tsap taw nga sai kun ngu hpe myit yu mai nga ai re.

Tingkyeng Amying Shingteng Masat ngu ai hta.. Tsawra ai ramma kanau kasha ni, mying langai tsun dat ai hte, Ndai wa gaw, byim ai masha kaja langai re, shingnrai harrr.. ndai wa gaw grai nan nhkru ai wa re, ngu zawn re ni amyu myu hte tinang gaw sharawt da ai hte, lu tawn da ai tinang a amying gum hkawng masat mung rai nga ai re., tinang hkum nan sha, tinang a amying gum hkawng lam hpe tingkyeng masat dip ai lam mung rai nga ai. madu hkum sha madu a amying shingteng hpe gum hkawng lam ni hpe madu sha dasit dip ai lam rai nga ai, nhkru ai wa mi rai rai, kaja ai wa mi rai rai, awng dang ai wa mi rai rai, hkrat sum ai wa mi rai rai, tinang a labau hpe tinang sha ka lajang ai lam rai nga ai , tinang gaw masha man hta, shing nrai, madu hkum a ningmu hta, gara masha zawn hku sak hkrung nga sa na kun? lahta de tsun lai wa sai lam ni zawn sha madu hkum nan gaw sharawt lu mai nga ai re. Gara lam yan masa ni gaw, tinang hpe mying kaja hkra, gum hkawng lam kaja ai hku sak hkrung lu na matu, garum ya lu ai kun ngu ai hte seng nna gam garan ya mayu ai. Amying masat dazik ngu ai gaw, npawt hku yu yang, tinang a lak lai ai atsam ningtawn lam ni hpe marai langai ngai hpe dut ai lam mung rai nga ai, dai gaw tinang a bungli madu kaw rai yang rai na, bai tinang a ningbaw ningla wa rai yang rai na, bai tinang hkungga ai wa mung rai yang rai na ngu zawn re ai marai langai ngai  hpe tinang a lak lai ai npawt kri madung akyang ni hpe dut ai lam mung tinag a mying hte masat ai dazik langai dip ai lam mung rai nga ai. Ndai wa gaw kam ram ai, nkam ram ai, ndai wa gaw myit san ai ngu ai masat dazik amyu myu hpe tinang a galaw sa ai lam yan, masa lam ni, shamu shamawt lam  ni kaw na kalang ta,tinang a makau grupyin na masha ni gaw tinang hpe masat dat ai dazik mung rai nga ai.

Masha ni hte asan brang, sadi dung ai hku matut mahkai tsun shaga u....Ndai lam yan ni mung, tinang a mying gum hkawng gaw sharawt ai lam hta ahkyak shang lawm ai masa langai rai nga ai, masha law malawng hte, asan brang tsun shaga lam, ngang gring ai tsun shaga lam, kam ram ai tsun shaga lam langai hpe gaw sharawt lu na matu, ra kadawn nga ai, galoi mung tinang gaw laga masha ni a matu, hpa ni lu galaw lu na kun? laga masha ni mung tianang hpe hpa bai lu galaw ya lu na kun ngu hpe gin hka mu mada chye na ra nga ai kalang lang bungli magam hta mi rai rai manaw manang ni lapran hta mi rai rai, tinang a ntsa, kam ai myit nmat mata na ahkyak dik rai nga ai, sut masa lam yan ni hta mung, ndai zawn sha rai nga ai, Ja gumhpraw lu su lam sha madung da nna, tinang a mying hkrat sum na lam hpe, nmyit ai sha sut masa la langai gaw galoi nawng dang nga ai, madu sha mai kaja lu su na matu hte, kade myiman mung nyu ai masha wa gaw, sut masa lam hta mi rai rai, bungli magam dap kata hta mi rai rai, shinggyim wuhpung kata hta mi rai rai, law malawng gaw, shinggan de tawn da chye nga ga ai re, dai gaw, masha nsi shi yang mying si ai ni mung rai nga ai.

Tinang  A Atsam Ningja Ni Hpe Ndau U..ngu ai hta gaw, tinang a amying gum hkawng lam masat dazik kaja lu na matu, madu hkum nna galaw la ra nga ai, tinang hta, awng dang na masa nga ai lam nnga ai sha, tinang a kan bau mgam lam hpaji bawng ring lam nnga ai hte sha gaw, tinang a myig gumhkawng kaja masat dazik nlu mai nga ai.tinang gaw bungli shawk ai wa langai rai yang, tinang a shawk shawn laika pa hta, tinang a atsam ningja ni hpe mai ndau ka bang mai nga ai, bai tinang gaw sut masa lam rai yang gaw, tinang a maga mi na sut masa rau gala masha ni hte  kam hpa lam hpe gaw sharawt mai nga ai, shada da  sadi dung ai lam ni hku nna, tinang a mying gum hkawng masat dazik hpe lu la mai nga ai re.

Tinang a kan bau magam lam hta kung kyang hkra gala shakut u... Ndai lam yan mung tinang a atsam ningja, amying shingteng gaw gap lam hta lu la mai ai lam yan langai mi re, masha ni gaw tinang a mying na ai hte, tinang a mai kaja ai shiga ni hpe matut manoi sha na na matu, tinang maga, ningtawn lam, san seng lam, awng dang lam, gin shalat lam ni hta ngang gring nga na ahkyak nga ai. bai tinang du taw nga ai ginwang kata hta mi rai rai, pu kam magam lam shakut nga ai hpaji lam hta mi rai rai kung kyang hkra, ningtawn hkra galaw shakut na ra nga ai. Masha law malawng a ningmu hta, tinang gaw shi hpe  ngai zawn yu maya masha langai hku sha, masha law malawng a ningmu hta, sak hkrung nga mayu ai kun, shingnrai, tinang a mying na ai hte, masha law malawng a masat shakawn lam ni hte, hkungga lam, kam shamyet lam ni hpe lu mayu ai kun? dai rai yang, tinang a myit masat dazik hpe ngang gring hkra tinang a kam bau magam lam hpaji langai hta, ningtawn  ai masha langai byim hkra shakut sa wa ga ngu n-gun jaw mayu ai.

Mahkrum madup ni hpe, hkaja u..Lai wa sai ten na tinang a awng dang lam ni, ya  tatut awng dang lam a hpang hta matut manoi hkan nang nna, du na ten ni hta mung, dai mahkrum madup ni kaw na kalang awng dang lam lu hkra shakut u, lama na nawng dang ai mahkrum madup ni hte hkrum wa ai nga yang mung, dai hkrat sum lam kaw na mahkrum madup la let, hka ja shakut hkawm sa u,

Hpaji Nga u.. ngu ai hta gaw, tsawra ai ramma kanau kasha ni, kan bau magam lam lawlaw ni hta, hpaji gaw n-nga nmai rai nga ai Ngan hpaji mi rai rai, tsang hpaji mi rai rai, ra kadawn nga ai, tinang a kan bau hpaji hta, ra kadawn ai hpaji ni hpring tsup hkra, kung kyang hkra gaw sharawt da ra nga ai, dai zawn gaw sharawt ai shara hta, hpaji lam hte seng ai sharin dabang ni, matsat ya ai let mat ni mung, tinang a kan bau hpaji lam hta madi shadaw ya nga ai lam rai nga ai, dai hpaji lam hte tinang a mying kaja langai, gum hkawng lam langai gaw sharawt la mai nga ai,

Tinang a mying hpe gara hku dazik shakap na.. Ngu ai hta gaw, Masha shagu hta, tinang hte seng ai mying gumhkawng shiga kaja langai gaw sharawt na matu ahkaw ahkang lu nga ga ai, Tinang a galaw ai lam, shamu shamawt lam ni gaw, nang gara masha hpan re ngu hpe madun ya nga ai re, dai galaw sa ai lam ni kaw na  laga masha ni gaw tinang a mying hpe dazik shakap ma ai rai nga ai.Ningbaw ningla mi rai rai, magam gun mi rai rai, tinang a magam bungli a ntsa, tinang a magam gun rau shada a ntsa, sadi dung ai, kam shamyet lam lu ai lam ni gaw nang gaw gap la lu ai mying kaja shiga ni rai nga ai bai magam gun langai hpe kaja wa teng teng hkrak madi shadaw ya dat lu ai lam mung, dia mgam gun a gaw sharawt da lu ai mying kaja langai rai nga ai.ngu gam garan ya let,

#youth

#rvakachinservices