Sak Prat Awng Dang Na Matu, Gara Hku Galaw Sa Ra Na ( Youth Program )

Sak Prat Awng Dang Na Matu, Gara Hku Galaw Sa Ra Na

          Anhte shinggyim masha ni gaw ngwi pyaw hkam kaja ai sak prat hpe lu madu mayu nga ga ai, lachyum rawng ai magam bungli hte sak hkrung mayu nga ga ai, ja gumhpraw lam hta myit tsang shara nnga ai sak prat hpe lu madu mayu nga ga ai. nkau ni gaw tinang a makau grup yin hte mungkan ga hpe galai shai lu ai awng dang lam hpe lu madu mayu nga ai hpe mu lu nga ai.

Anhte shinggyim masha ni gaw shingra maga hku yuyu dat yang,grau kaja ai, grau awng dang ai sak prat hpe lu madu mayu nga ga ai, dai majaw shanhte gaw sak prat hpe gara hku awng dang hkra galaw ra na ngu ai hpe law law san chye nga ga ai. dai majaw tsawra ai ramma ni Sak prat awng dang na lam yan gaw hpa rai, dai ga san a matu, prat ban hte ban awng dang ai ni gaw shanhte a mahkrum madup hta npawt da let kalang hkaw tsun da ai lam yan ni mung law law nga nga ai hpe nang ngai ramma ni mu hti, na ga yu ai ni law na re hpe kam dat nngai

Dai zawn awng dang na lam law law tsun da ai hta nga ngai hka ja lu ai lam yan nkau mi hpe gam garan ya mayu ai

1.Hkrat re ai ban dung yaw shada lam... Nang gaw sak prat hta hpa hpe ra kadawn dik rai nga ai kun? gara shara, gara madang du hkra hkawm sa du lu na matu, yaw shada da nga ai kun, dai ra kadawn dik ai shara, dai yaw shada da ai shadang gaw, nang a ban dung nan rai nga ai, dai hkrak re ai yaw shada lam gaw, awng dang lam a ahkrak dik ai zaw nan rai nga ai hpe shawng nnan e tsun dan mayu ai

2.Masat da ai ahkyin aten ( Dead Line )..Awng dang na hkrunlam de sa na matu, mahkyen lamang lajang ra ai, dai plan a jahtum masat da ai ahkying aten mung nga ra nga ga ai law, aten ladaw masat da ai lam nlawm ai mahkyen lamang gaw, galoi mung shangut lu na nrai nga ai, masat da ai lam nga ai lamang gaw lam woi madun na lamu ga sumla langai hte mung bung nga ga ai re,  bai bungli shawk shaga ai lam hta, jahtum ngu na nhtoi hpe hkrak re shaw madun chye nga ga ai, shawk shawn ai wa gaw, atsam marai yawng shaw let, aten dep shawk shawn laila pa hta jahring shatsup let, tang shawn ra nga ai, dai zawn sha awng dang na lam magam hta, aten shadawn masat da ai lam tawn ai rai yang, tinang gaw atsam marai dat let, aten dep shakut galaw gun hpai sa ra nga ga ai re.

3.Tatut galaw sa ai lam, Tatut magam bungli nlawm nna, awng dang na lam yup mang hpe mang taw nga ai ni mung san san nga nga ai hpe mung makau grrupyin ni hta bai mu lu nga ai, dai ni gaw shanhte a sak prat hta awng dang lam hpe mung nlu nga ga ai, hpa majaw nga yang, ya sha tsun ai tatut galaw sa ai lam  shingnrai, kaja wa nan byim hkra hkrang shapraw ai lam nnga ai majaw rai nga ai.kaja wa awng dang ai ni gaw, myit sawn yupmang da ai ni hpe, awng dang ai sak prat de tatut hkawm sa shakut nga ma ai, yaw shada ban dung gaw, aten ladaw masat da ai myit sawn yup mang langai rai nga ai nga nna mung tsun nga ma ai dai masat da ai ladaw hta ngut kre hkra, tatut shakut hkawm sa nga ra ga ai ngu

4.Nshayawm ai myit mari ni... Awng dang ai sak prat gaw sharawt ai lam hta, kaning re ai mayak lam ni, kaning re ai yak hkak lam ni hkrum wa u ga, nshayawm ai marai ni hte ngang gring ai daw dan lam ni nga ra nga ai mayak lam ngu ai gaw, hkrum sha na sha rai nga ai dai myit masa ni hte sha nrai yang awng dang lam lu na nrai nga ai

Bai nna, ahkyak ai langai mi gaw, sak prat awng dang na matu nga yang, kaja ai mahkrum madup ni mung ra nga ai, tsawra ai ramma ni awng dang lam gaw masha shagu hte seng ai ahkaw ahkang langai mung rai nga ai, dai ahkaw ahkang ni hpe, mshadawn masat da ai lam nnga ai, tsun mayu ai gaw, masha shagu gaw, masat da ai lam nnga, awng dang ai lam de shang wa lu nga ai majaw rai nga ai  dai awng dang  lam ladat ni nga nga ninglen, hpa majaw nkau ni sha awng dang nga ma ai kun ndai ga san hpe yu yu dat yang malawng maga gaw, awng dang lam de ndu shi yang, nmai byim ai, nlu  madu na re, ngwi myit mada  ai ngu ai madu hkum masat dat ai lam ni a majaw law malawng rai nga ai hpe mu mada lu ai

Dai majaw Tsawra ai ramma ni hpe tsun n gun jaw mayu ai lam gaw, “ Nang hta shadawn masat da ai lam nnga ai atsam mrai ni law law nga nga ai re, bai nang kaw  shadawn masat da ai lam nnga, awng dang na ahkaw ahkang ni law law mung nga nga ai, dai atsam marai ni hpe jai lang let, awng dang ai sak prat hpe nang gaw gap mai nga ai “ ngu shadum n gun jaw dat let,

#youth

#rvakachinservice