Prat Laru Hta Nang Kataw Wa Ai Ten ( Youth Program )

          Sak prat  gaw galoi mung ading sha nrai nga ai, magyi magaw law ai hte gumhpawn da ai lam langai rai nga ai, sak prat hta ra sharawng awng ai awng dang lam ni nga ai zawn myit daw na zawn re ai lam ni mung jahkring hkring hkrum sha chye nga ga ai.

Raitim sak prat hpe shingjawng poi langai hku masat da ai ni gaw, Kataw Wa Ai Ten Bai Rawt Nna Shakut u ngu ai lam rai nga ai, tsun mayu ai gaw shingjawng poi hta kataw wa ai ten, nrawt tsap yang nang asum jaw kau ai hte bung nga ai re.sak prat hkrun lam hta gara hku hkawm sa ra na ngu hkrat masing jahkrat da nga tim, nmyit mada da ai mayak lam ni,jam jau lam ni law law hte hkrum wa chye nga ai dai majaw nlai lam ni hre hkrum wa ai ten ni hta myit ndaw ai hte matut hkawm sa lu na ahkyak ai lam tsun mayu ai

Ga Hta Ja nga ai ga malai hpe mung na ga yu ai ni law na re.. tinang tsun shapraw dat ai lam hta nang a sak prat byim wa chye ai hpe mung dum ra nga ai sak prat a mayak mang hkang ni hte hkrum kadup wa ai ten, nkau gaw yup mang nkaja ai hku sha hkam la chye ai ni mung nga nga ai dai ni hta shanhte a mayak lam ni shagu gaw dai yup mang nkaja ai hku sha byim wa chye nga ai bai sak prat ningdat lam ni hpe hkrum wa ai ten ni hta anhte a sak prat myit gumhtawn hpa langai zawn masat hkam la tsun nga ai ni mung nga nga ma ai, shanhte a matu hkrum hkam sha wa ai shagu dai zawn myit gumhtawn hpa ni byim wa chye nga ai jahten lam hku yu nga yang anhte sak hkrung nga ai mungkan ga gaw tsawm htap wa lu na nrai nga ai, ningmu kaja hte mu chye ai wa sha sak prat laru kata hta myit gumhtawn hpa langai zawn hkam sha chye na lu na rai nga ai ngu n gun jaw mayu nngai. kataw shagu nang a sak prat sum ai lam nrai nga ai sak prat a nru nra hkrat sum ai lam ni kaw na lup makoi nga ai nang a kraw dung atsam ningja ni paw pru wa nna awng dang ai wa byim tai wa lu na rai nga ga ai law.

Kalang kataw ai hte nang nsum shi nga ai...awng dang ningtawn ai ni a sak prat hpe yu dat yu yang, shanhte a sak prat nnan hta kataw hkrat sum ga ai ni chyu law nga ai hpe mu lu ai sut masa lam kaba hta, awng dang ai ni gaw sut masa lam hten za mat ai lam ni hte mung hkrum sha ga ma ai nnan gin shalat ai ni mung n awng dan shi ai ten ni hta hkrat sum ga ma ai re. sak prat hta kataw ai lam gaw sak prat sum mat ai lam nrai nga ai mayak law law ni kaw na lawt pru wa lu yang she awng dang lam lu madu na re,

Bai sut masa lam, mung masa lam, shinggyim kanawn mazum lam ni hta, baw bai nlu sharawt na daram, machyi hkrum ai ten ni hte hkrum wa chye nga ai, hkrat sum ai lam gaw hkum hkrang nhkam kaja nna, tsi rung lung tsi shamai ra ai masa lam hte bung nga ai. machyi masha langai hpang jinghku ni sa du shakram jahkrum sa ai shaloi, n-gup aga hku, ja gumhpraw hku mi rai rai sa du garum tsawra myit madun nga ma ai, dai zawn madi shadaw garum ya ai a marang e, machyi masha wa hpe bai hkam kaja wa na n gun atsam byim shangun nga ai re. dai zawn sha sak prat hkrat sum ai wa hpe bai rawt wa lu na matu, makin jinghku ni kaw na hpaji jaw la ai hku mi rai rai, ja gumhpraw hku mi rai rai jawm garum ya na rai nga ai , kataw ai wa gaw, bai rawt tsap lu na matu, dai madi shadaw ya ai lam ni hpe hkap la nna kataw ai lam kaw na bai rawt tsap lu ra nga ga ai, tinang hkrai ndang rawt yang, kataw ai lam hta na,gang garum sharawt la na ni a garum ya ai lam hpe myit asan sha hte hkam la chye na mung ahkyak nga ga ai law.

Kam hpa myit mada lam nga u ga..Sak hkrung hkawm sa lam a mayak mang hkang hkrum nga ai ten ni hta, jahkring hkring hkrat sum ai wa gaw awng dang ai lam ninghtoi ni hpe myit mada lu nga ai, dai kam ai myit gaw kraw kata na n gun atsam ni hpe paw pru wa shangun nga ai, mayak lam nnga ai laga aten ni hta dai kraw kata na atsam marai ni gaw makoi taw nga ma ai lam rai nga ai dai majaw awng dang lam ni lu madu wa lu na matu, dai kraw kata kaw makoi shanu nga ai atsam ni hte kataw ai kaw na  rawt tsap awng dang wa lu mu ga ngu dai majaw gwi gwi bai rawt tsap shakut ai lam gaw, dai awng dang lam ngu ai a chyinghka hpe mu tam akawk hpaw lu ai zaw langai byim tai wa lu na rai nga ai.

#youth

#rvakachinservice