Shyinggyim Sak Prat A Shing Jawng Poi

Anhte a shyinggyim prat grau nna, anhte hkristan masha ni a sak prat gaw, shingjawng poi langai galaw taw nga ai hte maren sha rai nga ai, shingjawng poi langai galaw sana nga yang tau hkyen lajang da ai lam ni, masat da ai rip kawp tara upadi ni nga ga ai, dai zawn sha, anhte ni a hkristan sak prat hkye hkrang lam lu na matu, tau hkyen lajang ai masat da ai rip kawp ni nga nga ai.

Ga shadawn Boxing htawng ai masha langai hpe yu yang, shi gaw, champion kumhpa ni lu na matu, aten galu na na wa shakut shaman ra nga ga ai. tinang a hkum hkrang bawng ring n gun ja wa na matu, galoi mung sadi sahka, marai ni hte nga sa shakut ra ai, anhte ni gaw, sak prat shingjawng poi hta shang lawm ai ram hte sha, shang lawm nna, shingjawng poi a rip kawp tara upadi ni hpe tawt lai koi yen nga na nga yang, champion kum hpa ni zawn hta ni hta na sak hkrung lu na ban dung de du wa lu na nrai nga ai.

Htani htana sak hkrung lam ban dung de du na matu, karai kasang a tau hkyen lajang masat da ai rip kawp upadi ni, galoi mung sadi da hkan sa jai lang sa mat na matu ra nga ai, Ginsup ai masha langai mi kade ram atsam nga ai ngu ai hpe laja ai gin sup hpan ni hte chyam mai nga ai, htoi kabrim ai ja mung ga kata kaw na htu shaw la ai ten, shazai nhprang rai nna, wan hte tsang hte tsang kayi nna she, tsawm htap ai htoi kabrim wa ai zawn, anhte a sak prat hkrun lam ni hta mung, Karai Kasang gaw, shi a jet ai kashu kasha ni jet njet chye na matu, mayak mahkak, dingbai dingna amyu myu hpe, ahkang jaw nna, shaman san jep taw nga ai lam rai nga ai, ndai lam ni hpe anhte ni hkam jan lu na atsam nga na ra nga ai Nkau nga yang anhte ni a hkum hkrnag gaw, nkaja ai lam ngu na shadu da nga ma ai, ndai gaw grai nan shut ai lam yan langai rai nga ai. hpa majaw nga yang nakaja ai ngu ai lam gaw, hkum hkrang hpe tsun mayu ai nrai sha, sai shan hpe sha tsun mayu ai rai nga ai. Nkau ni san chye ai lam nga ai anhte a sak prat san seng tsawm htap hkra nga na matu hpa ni ra nga ai kun?

dai ni anhte a sak prat hpe san jep yu yang, grai nan yawn hpa lam ni, matsan dum hpa lam ni, sak kaba ra ai lam, machyi ra ai lam, sak si hkrum ra ai lam ngu zawn re ni, ngring ai mabyim masa nkaj lam ni, nga sa yak ai sak prat de du taw nga hpe mu lu nga ga ai. Tsawra ai ramma ni anhte ni gaw, kanu a hkri tung kaw na le wa ai ten, hkrap ngoi nsen ni hte le wa ra ga ai dai aten kaw na hpang let, ndai mungkan ga ntsa hta, yu yak jam jau matsan mayan lam ni nga ai ngu ai a , shawng lam lamik kum la mung rai nga ai, dai majaw, kaji ai kaw na kaba wa, kaba ai kaw na dinggai dingla, dinggai dingla ai kaw na si ai ten du hkra, ngu ai shyinggyim tara masa lam ni yu yak jam jau jam hkau lam ni hte hkrum sha ra nga ga ai, dai majaw kaji mi myit sawn sum ru chye ai ni shagu anhte ni a sak prat gaw, nkaja ai ngu hkam la let, ndai prat kaw na lawt lu hkra hpa ni galaw ra na, gara hku nga sa ra na ngu ai hpe myit sawn sumru sawk tam nga ma ai, dai majaw mungkan ting labau shagu hta, nawku hpung amyu myu, hkap la hkan sa ai lam amyu myu paw pru wa ia lam mung rai nga ai.

Anhte ni a sak prat gaw, kanu a hkri tung kaw na mayak mahkak, mang hkang ni, sak kaba, machyi, sak si ra ai lam ni nga tim, htani hta na ngang gring nsi ai wenyi asak ngu ai mung naw nga nga ga ai. anhte a sak prat gaw, si ai hte jahtum dat ai lam nrai nga ga ai, dai majaw anthe ni a, nsa wenyi htani htana ngang gring na ra ahkyak dik rai nga ai, dai majaw tsawra ai ramma ni ndai mungkan hta san seng sanpra ai hte ngu lu na matu hte, hpang na prat hta mung hta ni hta na asak lu na matu bai hkye hkrang la hkrum lu na matu, hkye hkrang la sai Madu Yesu Hkritsu hpe hkap la kam sham let, dai Madu a hkye hkrang la ai chyeju hta shingbyi ra nga ga ai ngu shadum n gun jaw mayu ai.

Lam yan langai mi hku nna, anhte ni a sak prat hpe Madu Yesu a mung sung lak lai ai tsawra myit kata, kalang bai shangai shaprat wa lu na matu hkam la ra nga ga ai, hpa majaw nga yang, Madu Karai Kasang gaw Yu bak masha anhte ni hpe, hkye hkrang la na matu sum sing mung dan kaw na du sa wa ai wa karai kasang a kasha shingtai Yesu hkristu nan rai nga ai, ndai lam hte seng nna, shyinggyim masha ni yawng, tinang a shing jawng poi a matu, mai kaja hkra sadi sahka hkawm sa let htani htana sak hkrung lam a kum hpa hpe lu la lu u ga ngu yaw shada let, #youth #rvakachinservice