Shawng Lam Myit Mada Shara Kashu Kasha Ni Hpaji Chye Na A hkyak Ai

Anhte kanu kawa ni a lit magam langai gaw lam shagu hta kashu kasha ni hpe kaja ai a kasi kaja madun na matu ahkyak nga ai.Anhte kanu kawa ni kaw nna sat lawat laikyang ni hte seng nna kashu kasha ni  a ntsa kaja ai kasi madun na lit nga ga ai re.Shani shagu tsun shaga ai lam ni bungli magam lam na sa lam malu masha lam ni yawng hta kashu kasha ni a matu kasi kaja madu ra nga ai.Shani shagu na kanbau magam bungli ni yawng hta tengman ai lam hte shakut shaja galaw dan ai gaw kashu kasha ni a matu kasi kaja ra nga ai.

Bai nna kanu kawa ni gaw akyu hpyi ai lam hte seng nna kashu kasha ni a matu kaja ai kasi kamang tai nga ra ga ai.Anhte kanu kawa ni gaw kun dinghku dum nta akyu hpyi ai lam hte seng nna mung,laban nawku sa akyu hpyi nna mung kashu kasha ni a matu kasi kaja tai ra nga ga ai.Akyu hpyi ai lam hte seng nna kashu kasha ni gaw tengman jaw kaja ai myit hkam la lam ni lu na matu anhte kanu kawa ni lam woi madun ra nga ga ai.

Tsawra shawang myit hte seng ai alu atan ni hta mung kashu kasha ni matu kaja ai kasi tai madun ra nga ai.

Anhte kashu kasha ni hpe hpaji hparat sharin ya na matu mung anhte kanu kawa ni a lit kaba nan rai ra nga ai.Hpaji ngu tsun ai shaloi makam masham lam hte seng ai hpaji hte mungkan hpaji hparat  lahkawng hpe tsun mayu ai rai nga ai.Anhte kanu kawa ngu ai ni gaw kashu kasha ni a matu Karai Kasang lata da ai shawng ningnan na sara ni rai nga ga ai.Kashu kasha ni a hpaji lam hte seng nna kanu kawa ni a lit magam gaw malai nlu mai ai lit magam nan rai nga ai.

Kam sham lam hte seng nna kanu kawa ni gaw kashu kasha ni a shawng nnan hte kaja dik sara ni rai nga ai.Anhte kashu kasha ni gaw Karai Kasang hpe mung tinang hte ni htep ai ni hpe mung myit lawm hkum lawm tsawra lu na hte Karai Kasang hpe galoi mung hkrit hkungga kam sham chye na matu sharin ya ra nga ai.

Anhte kashu kasha ni hpe laikyang sat lawat hte seng nna shanhte myit masin sat lawat laikyang ni hpe dawk bang ya ai hta kaja lam hpe sharin ya lu na matu anhte kanu kawa ni a lit kaba nan rai nga ai.Ndai zawn sat lawat laikyang ni hpe sharin bau maka ai shaloi anhte kanu kawa ni gaw ta tut byin ai lam ladat masa ni hte shanhte chye na lu ai ga si ni rau sharin ya ra nga ai.

Anhte kashu kasha ni hpe kaji ai prat kaw nna shanhte a shut ai lam hte seng nna hpyi nem tawngban chye na matu hte shut ai lam lam shading sharai mayu ai myit ni rawng wa hkra bau maka ra nga ai.Ntau shalau shut ai kashu kasha ni hpe pawt sindawng ai hte hparan na matu atsawm sha zim nga ai ten hta atsawm sha ngu tsun sharin shaga ai gaw shanhte a na masin salum hta grau nna hkapla lu na rai nga ai.

Bai nna kashu kasha ni a prat nga sa lam ni a matu internet jai lang ai lam a kaja ai lam nkaja ai lam ni hte kaja jaw ai ladat hte jai lang chye na matu sha lam madun ra nga ai.Dai rai yang she anhte kashu kasha  ni a kaja ai laikyang sat lawat ni hte  rau kaba wa lu nga ai.

Rit kawp tara nga ai kanu kawa ni gaw lak lai kaja ai lam rai nga ai.Kashu kasha ni a ntsa kam ai hte laikyang kaja ni hte bau maka ai sharin shaga ai kanu kawa ni gaw kabu myit dik n gun lu ai hte masha ni shakawn ai lam mung lu nga ai re.Kashu kasha ni a kam ai lam hte sat lawat laikyang ni hta dinghprut ai kanu kawa ni gaw myit npyaw yawn ai lam ni hpe law malawng hkam sha shangun chye nga ai.

Bai nna mungkan hpaji hparat lam ni hte seng nna mung sharin ya na lit nga ga ai.Kanu kawa ni a kaja a laikyang,htunghking lam ni,magam bungli ni hte shingni hpaji ni hpe kashu kasha ni bai shalai ginlen sharin ya ra ai.Tinang amyu sha ga shaga chye na matu,hti chye ka chye na amatu sharin ya ra nga ai.

Anhte a kashu kasha ni hpe hpaji hparat lam hte seng nna atsam sharawt galaw ya ra ai.Kashu kasha ni hpaji chye kung kyang na matu laika sharin jawng ni hpe mung lata ya chye ra nga ai.

Anhte a kashu kasha ni gaw kanu kawa lahkawng sha madu ai kashu kasha nrai nga ai.Anhte kanu kawa ni gaw sai hte shan  hte gawgap da lu ai hkum hpe sha jaw lu nga ai.Nsi nmat chye ai lam hpe gaw Karai Kasang sha jaw ya lu nga ai.Kaja ai hpaji hparat ni hpe sharin hkaja chye chyang na matu gaw kashu kasha ni a hkaw ahkang nan rai nga ai.Anhte kashu kasha ni a ahkaw ahkang hpe kashu kasha ni hpe jaw ai gaw kanu kawa a lit magam rai nga ai.

Kashu kasha langai ngai shangai chyinghkai wa ai gaw kabu myit pyaw hpa rai nga ai.Kashu kasha ni yawng gaw kanu kawa dum nta a matu shawng lam myit mada shara rai nga ai.Laika hpaji chye ai kashu kasha ni gaw dum nta a matu shawnglam rai nga ai zawn sari sadang mung rai nga ai. Dai majaw anhte kanu kawa ni a lit nga ai hte maren kashu kasha ni hpe hpaji machye machyang ni hpe anhte dangdi dandep ai made  sharin achyin ya chye chyang shangun ai gaw dum nta masha ni a matu shawng lam kaja hpe gawgap ya ra nga ai law.