Kashu Kasha Ni Hpe Rap Ra Hku Kanawn Mazum Pawnba Lanu Lahku Ga

Tsawra hkungga ai kun dinghku kanu kawa ni anhte kanu yan kawa hte kashu kasha ni a lapran kanawn mazum lam hta tara rap ra ai lam ngu ai gaw kade daram ahkyak ai ngu ai hpe gara hku chye na ai kun? Anhte myit yu mai nga ai.

Anhte sawk sagawn yu ai hta kanu kawa hte kashu kasha ni a kanawn mazum lam hta tara rap ra ai lam nau nnga ai hpe kun dinghku law malawng hta mu lu nga ai gaw myit npyaw hpa she rai nga ai.Anhte kanu kawa shagu gaw kashu kasha ni yawng hpe rau maren rap ra ai hku tsawra ai re nga nna n gup kaw nna tsun nga ga ai raitim yawng hpe maren rap ra,hkum hkum ra ra kanawn mazum pawnba ai kanu kawa gaw taw nga ai ngu tsun mai nga ai.

Grau nna gaw kasha la sha hpe shanhte a matu myit mada kamhpa shara re ngu yin la chye ai kanu ni gaw kasha kade mi nhkru tim kade mi hkra machyi hkra galaw nga tim mara dat tsawra lu nga ga ai.

Shanhte a myit hta atsawm nnga jang tsun na lam hpa nnga ai kasha num sha hpe gaw kahkri hpe yu nlu ai majaw jahpai tam mara mu chye nga ga ai.Kanu a matu kasha num sha ngu ai gaw la kasha daram n ahkyak ai ngu myit ni hte sim rai mayun yawn myi prwi hkret ai kasha num sha ni mung law law nga na re.

Dai zawn sha kasha num sha a matu nga muk,bu hpun pawng kaw nna hkawt atsawm rai ahkyak la galaw ya chye ai raitim kasha la kasha a matu nga jang ahkyak la na gaw tsan ai,ga shaga na pyi atsawm n shaga byin ai kawa ni mung anhte ginra hta law law nga nga ai.Dai zawn shingra tara a majaw ni ngu ngu,nu sha,wa sha nga nna garan ai lam kaw nna hpang jahtum kashu kasha bung ai raitim hkinghtawng garan jaw ai ten lu gring ai ahkaw ahkang hpe mung garan kau chye ga ai.

Dai zawn masa lam ni hte kanu kawa ni gaw  kasha ni hpe nbung ai ngu garan kau ai gaw kun dinghku dum nta kata tara rap ra lam  nnga shangun chye nga ai.Kasha la kasha gaw num kasha hta grau lu gring ai ngu ai ningmu hte galaw kau ai.Langai ngai hpe ahkaw ahkang grau jaw sai ngu ai kaw nna gaw ngam nga ia kashu kasha ni a ntsa ntara hku galaw kau hkrup sai ngu ai hpe nchye na mat sai rai nga ai.Chye na ai raitim lawng lam amyu myu hte jahpai tsun nna tawt lai chye ga ai.

Anhte kanu kawa ni kaw nna kashu kasha ni a ntsa tsawra ai bung ai raitim kanzawn mazum ai lam hta lam magup hta rap ra gring ai ngu mu mada ai.Bai nna  anhte hpaji chye ai amyu shayi ni hkum nan pyi kasha num sha hte la kasha nga ai nga tim kasha num sha a ntsa myit lahkawng rai chye ai masa hpe mu lu nga ai.Myit lahkawng gaw tsawra ai myit gaw san san rai nna yawng hpe maren bung ai hku nna kanawn mazum na myit nnga ai hpe mu lu nga ai.

Kasha la kasha hpe wanglu wanglang kaba wa na ahkaw ahkang jaw lu ai raitim kasha num kasha hpe gaw wanglu wanglang kaba sak hkrung na hkum tsun,myit wanglu wanglang lu na matu pyi hkum pat chye nna kasha num kasha ni a ntsa ka up lu na matu shakut chye ai hpe mu lu nga ai.Nkau kanu ni gaw kasha la kasha a matu sak jaw na lam nga ai raitim kasha num kasha hpe gaw kanu a dip ai lam,kanu a shagrit shadip shara myit pru hpa shara shatai chye ai hpe mu lu nga ai.

Kanu a mungkan hpe myit ndik ai daram,makau grup yin hpe myit ndik ai daram kasha num kasha a ntsa dingsa chye nga ai.Dai zawn kanu a myit gum tawng ai lam hte sak hkrung ra ai kasha num kasha ni gaw kanu a myit gum tawng ai lam hte shingdaw ai hpe sha lu nna shanhte hku nna mung kanu hte bung pre ai hku nna sha kaba wa chye nga ai.

Dai zawn kashu kasha ni hte kanu kawa ni a ntsa tara rap ra ai lam nnga myi man lata ai kanawn mazum lam gaw jung kap nang wa nga ai.Hpa majaw mi rai rai,kaning re ai majaw mi rai rai kashu kasha ni hpe rap rap ra ra kanawn mazum ai lam nga ai,rap ra ai hku tsawra nchye ai kanu kawa ni hpe kashu kasha ni mung myit ndik chye nga ai.Laksan ahkaw ahkang hkam la ai kasha num,la sha ni kaw nna nsen npru wa ai raitim kashu kasha bung nga ai raitim kanu kawa a ahkyak la lakawn lanawn ai hpe nkam lu ai kashu kasha ni kaw nna myit machyi chye ai ga ni hta n ga kanu kawa a ntsa tara rap ra lam nnga ai ngu dinglun ai ga ni pru chye nga ai.

Nu gaw nu kasha la ni hpe anhte hta grau ai,n tara ai,Wa kasha num ni hpe gaw ntsun ai anhte hpe gaw tsun jaw ai ntara ai ngu tara rap ra ai lam nnga ai kanu kawa ni hpe kashu kashu ni tsun yang kanu kawa ni gaw kanu kawa hpe dai hku tsun yang Ngarai lu na lu,nanhte kanu kawa tai yang chye na ra ai ngu ai lam ni hte ginhtang chye nga ai.

Dai ga ni hte tinang hkam sha lam ni yawn machyi ai lam ni hte kaba wa ai shaloi myit ningma ni hte prat hta kaba wa lai di ra nga ai.La kasha mi rai rai,num kasha mi rai rai kaji ai ten kaw nna rawt malan ai myit rawng wa nna kaba wa jang gaw tinang hkum hpe kam hpa chye ai ni byin wa ai.Kanu kawa ni  a garum ya ai lam nnga ai sha sak hkrung lu wa chye ai.Raitim kanu kawa dum nta hpe myit kap ai myit nnga ai sha tinggyeng jasat ni lawm wa chye nga ai.

Dai zawn dum nta hte tsan ai shara hta nga nna tinang hkum tinang shakut nga ai ni law malawng gaw kaji ai ten hta kanu a majaw mi rai rai,kawa a majaw mi rai rai myit machyi lam ni lu ai ni ma ni byin chye nga ai.Dai tinang hkum tinang hkam hpa ai myit ningma ni hte kaba wa ai ni gaw shanhte hkum nan kanu kawa tai wa jang myit lahkawng kabra ai kanu kawa ni byin wa chye nga ai.

Anhte lam langai gaw kaji ai ten hta kam sha ai hku kashu kasha ni a ntsa bai galaw chye nna hpan langai gaw kashu kasha ni hpe shanhte kam sha ai zawn nkam sha shangun mayu ai majaw awngdawm lam hpring hkra jaw hkan ya chye nga ai.Dai n chyun lahkawng hta nga ai kanu kawa ni gaw myit ningma kap ai ma ni hku nna kaba wa ai ni rai nga ai.Dum nta hta rap rap ai kanawn mazum lam hpe shanhte hkum nan nlu lai wa ai majaw shanhte a dum nta bungli prat ni hta mung rap ra ai  kanawn mazum lam hpe nlu gaw gap nga ai.

La kasha mi rai rai,num kasha mi rai rai ginhka kanawn mazum tsun shaga ai hkrum ai ma gaw machyi hkam sha na sha rai nga ai.Shi prat ting myit ningma hte kaba wa ra ai.Bai langai gaw kashu kasha ni hte seng wa jang hpa majaw mi rai rai myi man nlata ai sha rap ra hkra kanawn mazum tsun shaga na gaw ahkyak nga ai.

Tara rap ra ai kashu ksha ni hpe ra sharawng yang gaw kanu kawa ni hkum nan kaw nna tara rap ra ai,kashu kasha ngu ai ni gaw kanu kawa ni kaw nna sharin la ai hpe anhte chye da ra nga ga ai.Dai hpe kanu kawa shagu gaw kashu kasha ni hte tsun shaga kanawn mazum ai lam hta tara rap ra hkra shakut nna gawgap ra nga ga ai.

Anhte kanu kawa ni kaw nna ma ni hpe tsawra ai jahpring shazup ya ai hte sha nlaw nga ai.Kaji ai ten kaw nna dum nta kata tsun shaga kanawn mazum lam hta rap ra hkra galaw nna jaw kaja ai myit masa rawng wa hkra sharin shaga na hkyak nga ai ngu tsun garan gachyan dat nngai.