Tsawra Shawang Myit Ni Hte Hpring Nga Ra Ga Ai

Tsawra hkungga ai kun dingku kanu kawa ni anhte law malawng sawn hkam la chye ai gaw tinang tsawra ai wa hpe myit kraw kata kaw nna tawra nga jang rai sai,N gup kaw nna tsun nra ai ntsun tim shi chye ya nga ai ngu ai anhte myit sawn hkam la yin la chye nga ga ai.

Anhte madu jan madu wa rau sha nga nna ningrum ningtau ra ai hpe hkan shahpring shazup ya nga ai.Lam shagu hta shi hpe ning shawng jaw nga ai gaw shi chye na re,shi a matu lam shagu hta hkam sharang ya ai,sum machyi hkam nga ai lam ni gaw shi chye na ya na re ngu  hkrak chye ai zawn nga sawn yin la chye nga ai.

Anhte madu jan madu wa lapran hta ngai hpe naw tsawra nga ai kun? Ngu tinang mung nsan byin ai zawn tinang maga mung grai tsawra ai yaw ngu ntsun byin ai sha anhte hkrai anhte myit hta gaw rawng nga na re ngu sawn yin la let n dum nmai rai nga ai kun dinghku ni law law nga nga na ga ai.

Kashu kasha ni hpe mung kanu yan kawa a tsawra myit hpe chye na wa ai shaloi chye na ra ai,Kanu yan kawa shanhte hpe kade daram tsawra ai,ma-um da na daram shanhte hpe tsawra ai ngu ai hpe shanhte kaba wa ai ten hta chye na wa na re ngu yin la nna tsawra ai lam hpe n madun chye ai anhte kanu kawa ni law law nga na ga ai.

Ma hpe anu awa grai tsawra ai ngu tsun nra ai ngu sawn yin la ai ni mung anhte hta nga na ga ai.Anhte dum nta masha ni a lapran tsawra ai ngu ga hpe galoi mung ntsun byin ai raitim, mara shagun ai ga,dinglun ai ga,aput a ngwun nga ai ga ni hpe tsun ai sha law ai hpe mu lu nga ga ai.

Anhte kanu kawa shagu gaw tinang a kashu kasha ni galaw ai hpe atsawm nrai yang aput angwun na ai lam mung nga chye ai zawn kashu kasha ni hpe  tsawra myit hte shut na hpe tsang nna mara shangun ai shaloi hpang de n galaw hkrup hkra jahkrit ai,dam jaw ai zawn re ni hpe galaw chye ga ai.Sharin shaga ai lam hpe gaw galaw ra nga ai.Ratim mung myit machyi hkam sha wa hkra n galaw hkrup na matu anhte a tsun shaga ai lam hpe mung sadi ra nga ga ai.

Dai zawn rait sadi sahka ai lai nnga ai rai yang kanu kawa a tsawra myit hpe nhkam sha ai sha,kanu kawa a mara shagun shanem tsun ai hpe sha lu nga ai ten hta shanhte gaw myit nkrem ai myit ni hte kaba wa chye nga ai.Nkau nga jang myit ningma hte prat hpe naw kaji nga ai ten kaw nna asum jawm mayu nga chye ai.Anhte ni gaw anhte mung grai ra madat ai tsawra ai ngu ai ga a malai,na hta hka ai tinang tinggyeng myit shadang lam hpe hkra machyi shangun ai jai lang nmai ai ngu ga zawn re ni,nang gaw bai galaw dat sai.Ngai hpe jam jau jaw n jin shi ai i?Nang hte nga ai gaw nga rai langai re ngu ai ga zawn re ni hpe tsun chye ni mung ga na ga ai. Dai zawn tsun dai majaw shi myit machyi na ra ai,shi hkum shi manu shadan ai kaw nna hkrat wa na kun? Ngu ai lam hpe nmyit yu ai lam ni rai nga ai.

Dai zawn nhpri nem ai lam ni hte hkrum wa shagu mara shagun dinglun ai lam ni hte sha ni wa ai ten hta anhte madu jan madu wa  kashu kasha ni sum shada tsan gang mat wa chye nga ai.Dai majaw sut masa lam hta hprinem nga ai raitim tsawra shawang myit n hkam sha lu ai.Tsawra ai hpe nhkrum sha ai ngu a lam ni a majaw kun dinghku dum nta lam ni hta ngwi pyaw simsa lam ni a malai kashu kasha ni yawn ai lam ni kaw nna kun dinghku dum ta masha prat lam ni hta myit htum myit ru lam ni sha hkrum sha chye nga ai.

Anhte langai hte langai tsawra ai ngu tsun na ga hpe ntsun hkrup ai majaw n na ga ai ga ni hpe sha tsun ai ten ni hta kun dinghku kata shada da tsan gang chye ai mabyin ni hpe sha byin chye ai ngu ai hpe anhte myit dum ra nga ga ai.Anhte ta tut prat hta asak kade kaba tim,kun dinghku prat kade na ai raitim tsawra ai yaw,naw tsun nga ai kun?ngu ga.Tinang a tsawra shawang myit hpe grai mu mayu dik,grai na mayu lu mayu dik ga ni rai nga ga ai.

Anhte kashu kasha ni mung dai zawn sha kanu kawa a tsawra shawang myit hte hpaw madun ai ga ni magam bungli ni hpe kanu kawa ni kaw nna galoi mung ra sharawng nga ma ai re.Anu awa ma hpe tsawra ai nre i?ngu san ai ma ni gaw kanu kawa kaw nna tsawra ai ngu ga hpe kade daram marit nga ai kun?kashu kasha ni hpe tsawra dan yang rai dum mat na ra ngu ai ga gaw ma ni matu zingri zingrat ai hte bung nga ai.Tsawra shawang myit hpe nlu la jang gaw tsawra chye ai kun dinghku dum nta hpe manu shadan chye ai ni byin wa na nrai nga ai.

Hpa majaw nga jang shanhte tsawra shawang myit hpe nchye ai,nchye na ai majaw rai nga ai.Dai majaw kashu kasha ni hpe tsawra chye na matu tsawra shawang myit hpe hkam sha chye na na matu lit nga dik ai gaw anhte kanu kawa ni rai nga ai.Ma ni tsawra chye hkra gaw anhte kanu kawa ni kaw nna shanhte langai hpra a ntsa manu shadan tsawra dan na matu grai ra ahkyak ai ngu mu mada ai.

Tsawra ai tsawra myit ngu ai law jan ai ngu nnga nga ai.Ma langai a matu gaw kanu yan kawa tsawra shawang myit gaw myit masa lam hte seng ai n gun kaba langai rai nga ai.Tsawra shawang myit gaw jaw chye na ra ai zawn shanhte a salum de du hkra jaw chye na mung ahkyak ng ai.Hkam la ai wa kaw nna mung tsawra shawang myit ni hte bai matut sindun sumri gyit hkang ra nga ai.

Dai majaw tinang a ningrum ningtau hpe mi rai rai kashu kasha ni hpe mi rai rai tsawra ai nga ai ga hpe tsun shaga shalawm ra ai ngu ai hpe nmai malap nga ai shanhte hpe manu shadan tsawra ai lam hpe madun dan na matu anhte nmai htingnut ngu tsun n gun jaw dat lu nngai law