Kawa Hte Ma Chyangai Tsawra Myit Sindun Sumri Matut Mahkai Lu Na Ladat (I)

Anhte kawa la ni gaw shata Ja hku ma n gun ra ai ratim ma chyangai hte tsawra myit matut mahkai ngang gring lu na matu ladat masa lam ni hpe bai gam garan ya na nngai.Tsawra ai kawa la ni anhte law malawng gaw kanu ni daram ma chyangai hte rau grai hku hkau ai lam nau nnga chye ga ai.

Kanu ni gaw shata (9) kraw kata hta ma hpe gun da ra ai majaw machyangai hte matut mahkai hku hkau lam grau loi nga ai.Raitim mung anhte kawa la ni hku nna shanhte n shangai shi ai ten kaw nna hku hkau matu mahkai lam hpe galaw la mai nga ai.Anhte kawa langai a tsawra shawang myit gaw ma chyangai a shawng lam myit masa lam hte seng ai hkamja lam hpe madi shadaw garum ya lu ai majaw anhte kawa tai wa na ni tai nga sai ni yawng tinang kasha ma chyangai hte  mai byin ai daram ni ni htep htep rau nga ra nga ga ai.

Dai majaw anhte kawa la ni matu kasha ma chyangai hte rau tsawra shawa myit sin dun sumri ngang kang lu na matu ladat nkau ni hpe tsun dan na nngai.Tsawra ai kawa la anhte a kasha Ma chyangai a shawng nnan na ahkying hpe anhte shayawm nna nmai sawn ai kawa hte ma chyangai ni rau sha aten jahtum ai shawng nnan na ahkying ni gaw shawng na shata hta bawngring wa ai sin dun sumri ni a ntsa akyu ara byin nga ai.Shangai chyinghkai ngut ai kaw nna ma chyangai hte aten jahtum ai kawa gaw hpang na shata masum mung ma chyangai hte rau aten grau jaw la chye nga ai nga nna hpaji ninghkring ni tsun da ma ai.

Kasha hte kawa kanawn mazum lam hpe grau nna ngang hkang wa hkra galaw hpang na matu grai jau ai lam gaw nnga nga ai.Ma a myi tum hpe ni htep hkra yu ai,myi shada hkrum hkra yu ai,pawn ba ai hte mahkawn ni hkawn dan ai lam ni mung mai galaw ya nga ai.

Bai nna anhte kasha ma chyangai ni hte shan shada hkra ya ai lam mung sawk sagawn lu ai lam hta ma a bawngnu hta saituzin ngu ai hpe htuk shapraw ya lu ai.Ndai gaw ma hpe makawp maga nna zim temsi re ai lam hpe byin shangun chye nga ai.Dai majaw anhte kawa ni hku nna dung lahkum hta atsawm sha dung let ma hpe sinda ntsa hta shimlum ai hku pawn da ai lam mung kawa hte kasha a lapran grau nna hku hkau ni htep wa shangun nga ai.Grau nna gaw byin mai yang ntsa palawng nhpun yang grau kaja ai.Kachyi mi katsi yang gaw nba hte lawai ka up da ya mai nga ai.

Bai nna ma hpe yu gawn lajang ai lam hta gahpran galan rai shanglawma ai lam gaw sawk sagawn ai lam hta ma a ra mara lam hta ni ni htep htep lit la galaw ya ai kanu kawa ni gaw dai hku n galaw ya ai kanu kawa ni hta grau nna hku hkau ni htep ai sindun sumri nga ai lam hpe madun ya ai nga tsun da ma ai.

Anhte kawa la ni hku nna ma hka shin ai ten,chyu jaw ai ten,sinen galai ai ten hte ma shayup ai ten ni hta garum ya mai nga ai.Ma langai hpe yu gawn lajang pawnba ai lam gaw yak hkak ai bungli gaw nrai nga ai.Anhte kanu yan kawa kaw nna lit magam ni hpe garan la ai rai yang kawa hte kasha a lahpran grau nna tsawra myit sindun sumri grau nna ngang kang lu na rai nga ai.

Bai nna tsawra ai kawa la ni anhte ma hte rau ginsup ya ai lam hpe mung galaw ra nga ai.Grau nna gaw ma zim rai nga pyaw ai ten hta anhte kawa la ni hku nna ma hte rau rai ginsup ya yang kaja nga ai.Anhte a kasha ma hte rai ginsup ya ai lam gaw ma hte grau nna hku hkau ni htep lam lu shangun nga ai.Ma hpe mani hkra galaw ai gaw shanhte hta nga ai shingra tara matut mahkai lam hpe grau nna n gun rawng wa shangun nga ai.

(Ngam Nga Daw Lahkawng Du Na Bat Hta Bai Matut Mara Ya Na Nngai)