Ma Ni Matsa Mawa Ga Hte Sharin Shaga Ai Lam Hpe Koi Gam Ga

Tsawra nu wa ni anhte a kashu kasha ma ni gaw ra ai hpe loi loi nlu ai majaw ningdang kalang rai galaw chye ai Ma ni mung nga ai re.Anhte a Ma ni gaw prat ram wa ai ni mi rai rai,naw kaji nga ai mi rai rai Kashu kasha ngu ai gaw Kanu Kawa ni hte hkrum shagu aput hpyi shalu chye ma ai re.

Dai hpe anhte kanu kawa ni chyena ya ra ai.Atsawm sha angwi apyaw hte tsun ra ai.Nkau kanu kawa ni gaw ga ja shaga mazut ai ga ni hte tsun chye ma ai.Anhte kanu kawa nkau ni gaw tinang kashu kasha ma ni hpe  mazut matsai matsa ai hte yu hkraw she hkraw hkra tsun marawn sharin shaga ai lam galaw chye ma ai.

Dai ladat ni gaw jaw ai ladat nrai nga ai.Anhte kashu kasha ni ra ai hpe nlu jaw ai ten shing nrai kalang ta nlu jaw na matu nmai byin ai aten myit n galu ai lam ni gaw byin chye ai re.Raitim ndai zawn matsai mazut matsa ai hte pawt marawn tsun sharin shaga ai lam gaw anhte kashu kasha ni hpe dai zawn tsun shaga na matu lam madun ya ai hte bung ai re.

Dai re majaw tsawra ai nu wa ni tinang a kashu kasha ma ni hpe tsun sharin shaga na shaloi mai byin ai daram tinang a myit hpe hting hkang ra ai. Galaw jaw na matu nmai byin yang nmai byin shi ai lam hpe atsawm sha tsun sang lang dan yang kaja nga ai.Ndai gaw kalang sha na matu nrai nga ai.

Anhte akashu kasha ma ni a myit simani ai hte kung kyang kaba wa lu na matu jahkring hkring galaw ya ra ai nga tim galaw ra na rai nga ga ai.Bai nna tsawra hkungga kanu kawa ni e ya prat na ma ni a lai kyang shamu shamawt ai lam ni gaw laklai ai zawn shanhte myit lawm myit shang sha ai lam ni hpe lak lak lai lai rai nga ai re.Bai nna ra sharawng ai lam ni mung lak lai nga ai re.

Dai majaw anhte kashu kasha ni a ra sharawng ai lam ni masha kaga hte nbung shagu asawng asang nmai galaw  kau ya ai,nra ai lam jahpoi ai alm nmai galaw ai ngu pat hkum ai lam ni nmai galaw ai.Anhte Kashu kasha ma ni a ra sharawng ai lam ni gaw hkrit tsang ra ai hpan kun? shanhte hpe hkra machyi shangun ai hpan kun ngu sawn maram jep yu ra ai.

Ndai sawn maram jep yu nna hkrit tsang nra ai shanhte hpe hkra machyi ai lam ni nnga ai nga yang shanhte ra sharawng ai lam ni hpe pawnba madi shadaw ai lam n gun jaw ai lam ni hpe galaw ya ra ai.Dai rai yang she anhte a kashu kasha ni gaw tinang hkum tinang kamhpa shamyet shanat lu ai tsam lu la wa na rai nga ai.Kade daram ma zawn re ai ra sharawng lam mi raitim nmai jahpoi asawng ai.

Ten du wa jang masha kaba langai zawn chye myit chye mang wa nna ra sharawng ai lam ni mung galai shai wa nna grau nna kaja ai lam hpe galaw lu wa na rai nga ai.Shing nrai n galai shai ai raitim mung shanhte a ladat hte hparan lajang wa lu rai nga ai.