Asak (65) Ning Lahta De Na Ni Hta Nga ai Atsam Ningja Hte Galai Shai Lam Ni ( 17 DEC 2021 )

Hkungga ai Nuwa Hpunau ni, anhte dum nta masha ni hta na (shing n rai) makau grup yin hkan na, asak (65) ning lahta asak kaba sai ni hpe, anhte nkau mi gaw, nau wa masha jahpan n bang la ai zawn re ai ni hpe mu lu na ga ai. Shanhte tsun shaga ai lam ni, hpaji jaw ai lam ni gaw, kalang lang, ya byin taw nga ai masa hte nau wa n hkaw taw ai zawn re ai ni a majaw mung, shanhte hpe kadai wa mi nau wa n kam jai lang wa ai lam mung rai nga ai. Rai yang, ya shanhte hta kaning re ai atsam ningja ni rawng ai kun? Shanhte kaning re ai Galai Shai Lam Ni byin hkrum chye ai kun? ngu ai lam hpe hkaja yu ga.

Shanhte hta rawng ai Atsam Ningja Ni gaw –

1). Galoi mung sharin hkaja la mayu ai myit masa

2). Zim rai n chye nga ai sha, ding yang bungli galaw mayu taw ai lam ni

3). Makam masham lam hta, grau nna (Rosary hti, Chyum Laika Hti Sumru) lam ni galaw ai

4). Dum nta masha hte Makin Jinghku ni hpe woi awn zinlum chye ai lam

5). Tinang a kashu ni hpe woi let, pyaw pyaw rai chye nga ai myit

5). Kashu kasha ni, tinang hpe nbau tim, nga ai atsam hte naw tam lu tam sha na ngu ai myit

6). Shawng hpang ban prat dep ai masha ( shing n rai) Hkra Lep ai masha ni hte kaga anhte n mu n chye lu ai atsam ningja ni law law mung shanhte kaw naw rawng nga ai re.

Dai zawn atsam ningja ni rawng tim, maga mi de gaw, Galai Shai Lam ni mung naw byin chye nga ai… dai lam ni gaw –

1). Shingtai garen myit ni grai rawng wa ai

2). Hkum hkrang hkamja lam ningra wa ai majaw, myit kaji wa ai lam

3). Tinang hpe masha jahpan kaw na shale kau ai zawn nga hkam sha wa ai

4). Kashu kasha ni e, kabai da ai zawn nga nna hkam sha chye wa ai

5). Dum nta masha ni (shing n rai) makin jinghku ni hpe galoi mung ala dingda chye ai myit

6). Shingran katsi mat wa nga ai, dum nta wang kata grup yin yu mada nna, garen gari myi prwi pru chye ai

7). Myit du tim, hkum n du lu, myit galaw mayu ai magam bungli ni hpe tinang hkum nan wang lu wang lang n lu galaw ai myit ni a majaw, tinang hkum tinang masha shajan zawn nga wa ai myit ni hte kaga shing gan de n shapraw dan ai Galai Shai Lam Ni hpe hkam sha chye nga ma ai.

Dai majaw, Hkungga ai Nuwa Hpunau ni, anhte a dum nta hta, anhte a makau grup yin hta dai zawn re ai asak (65) ning lahta de na asak kung wa sai anhte a Kanu Kawa ni hpe, anhte dai hku majoi n mai kabai tawn da ga ai. Shanhte hta ra rawng nga ai lam ni hpe tinang dang lu ai made garum pawn ba la ai lam ni hte shanhte a hkam sha lam ni hpe aten jaw let madat ya ga. Dai zawn rai nna, Shanhte a kraw kata hta hkam sha nga ai lam ni hpe aten jaw let hkap madat la ya ai lam ni gaw, shanhte hpe myit pyaw lam jaw ya lu ai hte shanhte ra sharawng dik Kumhpa Kaba nan rai nga ai.

Dai majaw, Asak (65) Ning Lahta De Na Ni Hta Nga ai Atsam Ningja Hte Galai Shai Lam Ni hpe yu hkaja la nna, anhte hkum nan shanhte hpe dang lu ai daram garum shingtau lam ni jaw lu hkra shakut sa wa ga law. 

By;

Sister Rose Angeline Maran Nang Doi (SFX)

RVA-Kachin Service (Myitkyina)