Asak Kaba Tim Masha Kaba Nbyin Ai Kanu Kawa Ni

Tsawra nu wa hpu nau ni Bawnu a mahkrum madup kung hpan lam gaw asak hte nseng nga ai, asak kaji kaba nnga  myit nyan hpaji hte hkan nna mahkrum madup kung hpan ai lam gaw shai nga ai re.

Grau nna asak kaji ai ten dinghku shang mat ai raitim bawnu jai lang ai hta hkan nna dinghku hpe atsawm gawn hkang lu ai ni nga ai zawn asak mung ram daw rai nna hpaji mung chye ai daram chye ai raitim bawnu hpe atsawm jai lang ai yawm ai majaw kunghpan lam nnga ai majaw dinghku hten brak mat ai ni mung law law nga nga ai re.

Madu jan madu wa lahkawng sha nga ai shaloi gaw hka na pawng na ngu ai grai nan ntsang ra ai raitim kashu kasha lu wa ai shaloi kung hpan lam,bawnu jai lang chye na lam hte yu maram hkaja ai lam ni gaw nnga nmai nan rai nga ai.Ma zawn rai nmai nga sai,dai na malai ma rem hkang ra sai,sharin shaga lam madun ra sai re.

Grau nna Ma kaji ni hpe rem ai shaloi mahkrum madup nnga nkung hpan shi ai Kanu Kawa ni hpe tsun mayu ai gaw ma gaw shani shana shut nna  nyup ai shaloi shanhte mung nyup ai majaw shalu ai.Ma hpe hpa rai n yup ai ngu nna chyu njaw ai lam ni mung nga chye ai.Ndan lam ni hpe mung koi gam ga.

Ma ni gaw dai zawn galaw na gaw rai nga ai.ndai zawn ma hte shingdaw shalu taw ai rai yang chyu naw lu ai ma ni gaw chye na nrai nga ai.Bai nna tinang gaw kaja ai Kanu ngu ai hpe galoi mung myit hta bang dum da ra ai.Kanu ngu ai gaw kaga masha ni hta grau kunghpan ra ai kaga ni hta grau chye na ra ai tinang a kasha hte seng nna kadai hte mung gasat gwi ai jau bu langai zawn rai ra ai re.

Kade mi ma zawn rai tim ma lu wa ai kaw nna gaw masha kaba tai rai sai.Tinang a shawng na Kanu Kawa  ni hpe yu hka ja la ra nga ai re.Tinang hpe gara hku pawn ba bau kaba da ai gara hku tsun sharin shaga lam madun lai wa sai lam ni hpe kanu kawa ni kaw nna bai sharin la mai nga ai.

Langai sadi da ra ai gaw tinang a kasha gaw kam ai hku ginsup na ginsup rai nre ai hpe dum chye ra ai.Ma ngu ai gaw tinang sharin shaga ai hku nna kaba wa na tsawm htap ai tsi kin lep rai nga nna tinang ra hte kaja dik ai hku hkrang shalat la mai nga ai re. Bai nna kanu kawa ni ting kyeng myit kaba rawng ai rai yang ma ni gaw grai nan gam nkaja ai ngu mai tsun nga ai .

Tinang byin shangun mayu ai hku nbyin yang ma ni hpe marawn ai,jahkrit shama ai lata du ai lam ni galaw wa chye nga ai re.Ga shadawn Ma hpe shat jaw sha ai shaloi tinang sha shangun mayu ai daram ma ni nsha yang Ma hpe pawt ai marawn ai lam ni kanu kawa ni galaw chye ma ai re.

Ma ngu ai gaw shanhte sha mayu ai daram sha sha ai gaw mara rai nga ai.Dai hpe kanu kawa ni chye na ya ra ai .Tinang a kasha hpe hpum shangun mayu ai n gun rawng shangun mayu ai myit hte jaw sha ai raitim ma ni hkap la ai shadawn shadang ngu ai nga ai.dai hpe anhte kanu kawa ni chye na ya ra nga ai.

Bai Ma langai hpe sharin shaga ai shaloi anhte kanu kawa ni myit galu ra ai.Tinang sharin ai lam hpe shanhte a na hta shang hkra atsawm akawm ngu chye tsun ra ai.Dai hpe myit n galu ai kanu kawa ni hte hkrum yang n htang hku ni byin wa chye nga ai.Ma hpe sharin shaga ai shaloi myit n galu sai galang sha tsun na chye na hkra madat u bai hkum tsun gin htang nga ai lam ni kalang tsun yang nmadat yang lagaw lata lawm wa ai lam ni gaw shut ai lam ni rai nga ai.

Shanhte hta mi nga ai hkring htawng gaw  gara hku mi kaja taw nga ai raitim shawng nnan na sara ni rai nga ai Kanu Kawa ni a lai kyang hpe shawng sharin hkam la ai ni re majaw galai shai wa chye nga ai.Ma hpe atsawm sha tsun shaga chye na matu Kanu mung Kawa mung shawng shaman la ra nga ai.

Ma hpe kalang tsun yang nchye na yang 2,3 lang myit galu atsawm tsun sanglang dan u galoi mung ma hpe shawng tawn ra ai.Ma gaw Ma hku sha myit na re tinang myit yang ndai hku nre ngu nmai shingdaw ai,tinang mung ma kaji ten gara hku myit lai wa sai hpe tinang gara hku chye na nrai nga ai.

Dai hpe nchye na ai ma hpe dai hku tsun yang n kung hpan shi ai lam sha rai nga ai.kalang tsun yang nchye na yang pawt wa nna Kanu kawa nkau ni nga yang lata du kayet wa chye nga ai re.Ma hpe ga n shaga wa ma ai .Ga nshaga ai hte mang hkang gaw n mai hparan lu ai.Gara hku mi chye na ai Ma ni raitim shanhte hpe ga nshaga ai kanu kawa hpe gaw shanhte mung nchye na na rai nga ai.

Shanhte kaw nna ndai lam hpe Myit machyi hkam sha ai hta lai nna gara hku mung nchye galaw mat na rai nga ai.Dai re majaw tinang a sai Ma she re majaw chye na hkam sha ya re ai.Tinang a kasha hpe yu nna gara hku tsun yang chye na na gara hku tsun yang madat na ngu ai hpe mung anhte kanu kawa ni yu maram hka ja ra ai re.

Ma hte shingdaw nna hkrap ai lam gaw n kung hpan shi ai lam rai nga ai .Kanu Kawa ngu ai gaw ma hkrap jang hkrap mayu wa ai gaw mara rai nga ai.Raitim dai hku nmai galaw ai Kanu ngu ai gaw myit ngang ra ai Ma hkrap yang Kanu hkan hkrap yang gaw Ma gaw gara hku hkam sha na,Ma a myit hta shi majaw kanu hkrap ai ngu hkam la na rai nga ai.Ma hpe grau hkam sha hkra n galaw yang kaja nga ai.Ma hkrap yang kanu gaw asawng la chye ra ai.

Ma a shawng kaw galoi mung  myit kya ai hpe nmadun hkrup lu na matu sa di ra ai.Ma a myit hta galoi mung Kanu Kawa ni gaw myit ja ngang kang ai ni re ngu hkam sha lu hkra  galaw  ra nga ai re.Bai langai sa di ra ai gaw Ma ni a shawng hta Kanu yan Kawa Nang she ngai she nga nna shada gang hkat nga ai rai yang lapran kaw na Ma ni she nam hpun tai wa na rai nga ai.

Kanu yan kawa n hkrum yang Ma ni jam jau hkrum na rai nga ai.Kawa gaw amyu mi nga sharin shaga,bai Kanu mung amyu mi nga sharin shaga taw yang Ma gaw gara wa mahtang kaja ai hpe ya she kaba wa ai ma gaw gara hku ginhka la lu na nrai nga ai.Dai re majaw Ma hpe sharin shaga na nga yang kanu yan kawa shawng atsawm jahkrum la ra ai.

Shi hpang ngai hpang tinang byin mayu ai lam ni hpe  grau kaja ai hku bawngban la nna kalang tsun yang Kanu rai rai Kawa rai rai langai sha tsun sharin yang kaja ai.Lahkawng yan shingjawng tsun ai rai yang ma she dam wa na rai nga ai.Bai Ma ni gaw laika sharin ai hpe nra ma ai.

Anhte mung kaji ten hta nra na rai nga ai.Dai hpe chye na ya na ra ai re .Nkunghpan shi ai kanu kawa ni gaw laika sharin na myit n galu ma ai.Myit n galaw jang gaw jawng kaw aten shajan laika sharin shangun ai,Chu shin ni nhkring nsa sharin shangun tinang nsharin yang rai sai nga nna galaw chye ma ai.

Nkau kanu kawa ni nga yang laika hti tsun shadut nna laika nhti yang aw galaw ra ai le ra galaw ra ai nga nna jahkrit chye ma ai.Dai hku galaw ai majaw laika nkam hti ai ma ni nga ai re.Laika hti ka galaw ai lam gaw Ma ni a matu grai ba ai bungli langai mung rai nga ai.Dai majaw kumhpa jaw,dam jaw ai lam ni hpe mung kalang marang lang ra ai.dingrun galaw yang mung jin wa chye nga ai.

Tsawra Kanu Kawa ni Ma ni hpe hpaji a kyu chyeju ni hte hpaji nchye ai akyu ni hpe shanhte chye na hkra sang lang tsun dan chye ra ai.Hpaji hte seng nna  kade daram ahkyak rawng akyu chyeju ni nga ai lam hpe shanhte  galoi mung ra sharawng wa hkra ga shadawn ni hte tsun dan ra ai.Arung arai ni hte asoi sawng nga na malai shanhte a prat hta ahkyak dik myit htep hpa ni hte tsun nna ma ni chye na hkra tsun sharin let tinang kasha shawng lam hpe gaw gap ya nga ga law.