( Youth Program )

Tsawm htap ai hpawt de na ninghtoi ni hpe, gaw sharawt lu na matu, htawm hpang shagu gaw, sak hkrung lam ni hte hpring chyat nga na teng sha rai nga ai, htawm hpang langai a asak ngu ai gaw, asak langai a htawm hpang rai nga ai, dai majaw htawm hpang hte asak gaw, langai hte langai garan ginhka nna nmai tsun nga ai.

Htawm hpang nnga ai asak gaw, manu ndan ai zawn asak nnga ai htawm hpang mung, lachyum rawng lu na nrai nga ai, teng ai langai gaw, htawm hpang ngu ai hte asak ngu ai gaw, langai hte langai madi shadaw ya nga ai lam rai nga ai. dai hta, htawm hpang hpe madun rit ngu yang, dai ni na nang ngai ramma ni hpe layung madi madun nga na sha rai nga ai, ramma ni gaw htawm hpang a matu rai nna, dai ramma ni sha htawm hpang a asak ni rai nga ai, ga malai hte maren, dai ni na ramma hpawt ni na ningbaw ningla  nga ai hte maren, ramma ni hpe yu nna, htawm hpang mung kan hpa byim wa  na ngu ai hpe, lu tsun nga ga ai, dai majaw, htawm hpang prat tsawm htap wa na i, sak si hten za mat ni i ngu ai lam ni dai ni na ramma ni hpe yu nna tsun mai nga ai

Dai majaw, shyinggyim wuhpung hpe woi awn taw nga ai masha kaba ni gaw, htawm hpang a shinggyim wuhpung, matut sak hkrung tsawm htap lu na matu, ramma ni hpe shalat shapan ra na rai ga ai, kaja wa masha kaba ni gaw, ramma ni hpe shalat shapan ai lam nnga yang, htawm hpang ngu ai hpe ga sadi hprai ai lam hte, htawm hpang ngu ai prat hpe jahten ai masha wa hku labau hta shang mat chye nga ga ai re. Htawm hpang ngu ai hpe sak hkrung shangun mayu yang, tsawm htam shangun mayu yang, labau jaw ai lit langai rai nga ai ramma ni hpe shalat shapan ra ai ngu ndai shara kaw na nu wa ni hpe ramma ni yawng a gawng malai shadum n gun jaw dat  mayu nngai.

Ya na masha kaba woi awn nga ai ni ngu ai ni mung,  lai sai ten na ramma ni byim wa ai ni hkrai rai nga ai, bai kalang lang myit npyaw hpa langai byim ai gaw, ramma ni hpe mu yang, maza langai zawn zawn, mang hkang kanu zawn zawn mu mada tsun shaga chye ai ni mung nga nga ai, kaja wa, ramma ni gaw, mang hkang kaba she rai taw yang, htawm hpang ngu ai gaw, mang hkang mayak ni hte hkrai hpring nga ai rai nna, tsawm htap ai htawm hpang ngu gara hku lu tsun sana

Dai hta ramma ni gaw, sak prat a lachyum ni hpe hkan tam nga ai ten, shut ai jaw ai lapran hta sumri gang nga ai n gun ni rai nga ai, kadai mung shut ai lam hte nkam hkawm sa nga ga ai, dai majaw shut ai lam kaw na, lawt pru wa hkra, masha kaba tai nga sai ni gaw, shut ai jaw ai hpe lam matsun madun ya na lit nan nga nga ai dai rai yang chyu sha, tsawm htap ai htawm hpang ngu ai prat hpe gaw sharawt lu na rai nga ai, ya na prat madang hta, rawt jat lam ni law nga ai hte maren, sak prat a ning dat ai lam ni mung law law rai wa nga ai. dai ning dat ai lam ni hpe hkam jan let, htawm hpang ngu ai shyinggyim wuhpung matut sak hkrung lu na matu, lit la ra na magam ni hpe gun hpai na matu shajin da nga ai ramma ni hpe yu nna mung n gun lu nga ai, grau nna arawng la ai gaw, ndai ramma ni gaw, kun dinghku a myit mada shara, bai myu hte  mung dan a matu, nawku hpung a matu yawng ni a myit mada shara htawm hpang nan rai nga ai zawn, shanhte a sak prat tsawm htap wa lu na matu, mahtai tam nga ai hpe yu nna, htawm hpang ngu ai a, asak kade daram tsawm htam wa na ngu ai hpe mung myit sawn shagu n gun la shakut nga nngai, maga mi de n gun la arawng la lu ai zawn, maga mi de na ramma ni hpe yu nna mung myit npyaw hpa lam ni nga nga ai.

Hpa majaw nga yang bungli madu langai wa tsun ai, ya prat na ramma ni gaw, bungli hta ja gumhpraw grau yu ai, bungli mahkrum madup gaw nnga, magam bungli hte seng nna, atsam marai ni mung nlawm wa majaw bungli jaw na yak ai nga nna tsun nga ai, bai nkau rai yang, mare kaji kaw na, myo mare kaba de sa let, bungli galaw ra ai ni nga nga ai. dai hta Nkau nga yang dai mahkrun hta masha kanawn shut let,hten za ai ni, nang hpam a mayam ni tai let, sak sum ra ai ni mung law law rai nga ai Gumhpraw ngu ai gaw, masha she nga nga dingsa tam la mai ai ngu mai tsun tim, bungli mahkrum madup ngu ai lam gaw, madu hkum nan nlawm yang nmai lu la nga ai, dai majaw, mahkrum madup law na matu, ten jaw nna, bai tinang a sak prat hpe rang let, zai ladat hte hpaji ni hka ja chye na ra ahkyak la nga ai. dai majaw, gumhpraw, nang hpam, pyaw hpa lam ni, loi ai lam ni kaw na nhkan ai sha, tinang a sak prat a matu, madu hkum nan tsawm htap wa lu hkra gaw sharawt sa wa ga ngu a ja wa n gun jaw mayu nngai

Dai sha n ga ramma ni gaw, gin shalat hkrang shapraw ai lam shagu hta, madu hkum langai sha a matu sha n ga, htawm hpang a shinggyim gai wang, wuhpung wuhpawng a matu du hkra, hkra wa chye ai hpe ndai shara kaw dum ra nga ai, Ramma ni myit sawn gin shalat galaw sa ai  lam shagu gaw, htawm hpang a matu, daw dan ya lu nga ai, dai majaw, ramma ni gaw, shinggyim gaiwang shinggyim mungkan a htawm hpang ni byim wa nna, dai htawm hapng ni sak hkrung tsawm htap wa lu na matu, asak bang ya lu ai ni rai nga ga ai. Dai majaw htawm hpang prat sak hkrung tsawm htap wa lu na matu, ramma shagu hta, labau e jaw ai lit magam gu dek hta nga ai hpe dum let, htawm hpang a asak ni rai nga ai ramma ni yawng, mungkan ga hpe sak matut shatsawm jahtap na matu ya jang shakut sa wa ga ngu yaw shada let,

# youth

#rvakachinservice