Amyu Shayi Ni Hpaji Chye Na Ahkyak Ai

Tsawra hkungga ai amyu shani  anhte shi jan ning kaw nna hkun jan ning du hkra gaw law malawng hkamja lam kaja nga ga ai re.Kaji ai ten kaw nna ana ahkya hkap ai ni mung nga ga ai.Raitim nau nlaw nga ai.Anhte shinggyim prat hta dai aten gaw nga sa ai lam hta kaja dik aten mung rai nga ai.

N gun atsam rawng zet tsang ai,shinggyim lit magam ni hta nshanut shi nga ai re.Ndai zawn re ai aten ladaw ni hpe hpang de lu na nrai nga sai.Kun dinghku de sai kaw nna gaw lit magam ni law wa nga sai.

Anhte amyu shayi mahkawn ni gaw htawm hpang de kashu kasha shaprat let kanu ni tai ra nga ga ai.Ndai lam ni gaw koi yen nmai ai lam ni rai nga ai.Dinghku mayak hpe hkrit tsang nna hkawn tung tai tim grai wa wanglu wanglang nga lu nna nre ai sha shinggyim lit magam ni grau nna gun hpai ra gaw mara rai nga ai re.

Dai magam bungli ni gun hpai lu na matu tinang hta ninghpawt ninghpang hpaji gaw nga ra nga ai.Ya na prat gaw hpaji chye ra wa sai re.Shawng de na ni tsun ga ai num kasha ni gaw hpaji chye nra ai.Kun dinghku hpe gawn hkang lu jang rai sai nga tsun ma ai.

Moi na ni gaw moi na madang masa lam hta hkan nna tsun ai she rai na re.Dai ni na prat masa hta gaw dai ni nnga mat sai. Prat a masa hta hkan nna hkan bau magam bungli a matu bungli pru galaw hkawm ai law wa nga sai re.

Kun dinghku kanu nta madu jan san san rai nga ai lam gaw prat ndep mat sai.Kun dinghku kanu,nta madu jan san san hku nna nga ai raitim machyoi hpaji rawng ai kanu ni gaw tinang a kashu kasha ni hpe myitsu myit kawp wa hkra,ningtawn kaja ai kashu kasha ni byin wa hkra dum nta hta nga let sharin gawn hkang lu nga ai.

Anhte kanu kawa kaja yang she kashu kasha ni mung kaja na sha rai nga ai.Kanu kawa kaja a kashu kasha ni rai na rai nga ai.Anhte kanu kawa ni hpaji nchye a nya ai rai yang kashu kasha ni ningtawn kung kyang na yak nga ai re.Dai ni na hkawn sek (hkawn jet) ni gaw htawm hpang na kanu ni rai nga ai majaw hpaji sharin hkaja ai lam hpe ahkyak shatai shakut sharin la ra nga ai.

Anhte kun dinghku dum nta a sut masa lam ni hta la ni hkrai sha galaw ra ai lam nrai nga sai. Kawa la ni gaw kun dinghku hpe woi awn na aya lu da ai raitim,kanu num ni gaw dinghku a amu madu rai nga ai majaw grau nna ahkyak nga ai.

Kawa la ni law malawng gaw shinggan bungli ni hta woi awn ningshawng nga ai.Kaja wa nga yang dingku dum nta hta kanu num she woi awn nga ai rai nga ai.Ya prat amyu shayi num ni a shara gaw grau dam lada wa nga ai.Dinghku dum nta hpe woi awn ra ai gaw maga mi,maga mi hta mung dum nta sut gan magam bungli ni hta shara la galaw ra nga ga ai.

Ya ten na mahkawn ni gaw dinghku de ai ten hta aya lahkawng hpe kalang ta galaw ra ai re majaw kawa la ni hta grau nna lit kaba ai ngu tsun lu nga ai.Anhte Shinggyim masha shagu gaw bungli galaw ai sak hkrung hpan rai nga ai.Bungli n galaw ai shinggyim masha gaw manu ndan ai masha sha rai nga ai.

Anhte amyu shayi ni gaw asak aprat ram naw kaji nga ai ten hpaji hparat lam hpe sharin hkaja shakut ra nga ai.Ningtawn ai amyu shayi num kaja tai ra nga ai re.Anhte hpaji sharin hka ja ai lam hta ahkyak ai gaw hkamja lam kaja ra ai zawn mahkawn aten gaw hkam kaja ai atsam rawng ai ten rai nga ai.

Anhte hpaji madang lam hta tsaw lu ai daram tsaw hkra shakut ra ai.Hpaji lam hta grai n gun yawm ai nga jang mung kaga lata hpaji hpan ni hpe ningtawn hkra sharin chye da yang kaja nga ai.Tsun mayu ai gaw lam shagu hta galaw chye lang chye hkra kung kyang ra nga ga ai.

Madu hkum madu kam tsap lu hkra lu da yang kaja nga ai.Dai zawn sha wanglu wanglang nga lu hkra,kaga masha wa a ntsa hta shamyet shanat shingbyi nnga ra hkra myit masin ngang kang lam mung ra nga ai re.

Myit masin ngang kang ai lam ngu ai hta myit tsaw myit dap ai lam hte myit ja  ai lam hpe tsun mayu ai gaw nrai nga ai.Myit kaja nna kaga masha wa jahte tam ai,bunghkup ka-up lang hkrum ai hpe n hkap la ai sha madu hkum madu tsap lu ai share shagan myit hpe tawn da na ra nga ai.

Dai a matu gaw anhte laika law law hti hkaja ra ai.Anhte kadai raitim kaja wa wang lu wanglang re ai hpe ra sharawng ai rai yang gaw laika law law hti hkaja ra nga ai.Laika law law hti jang gaw machye machyang hpaji hparat ni law law lu la chye wa na sha rai nna gara gaw kaja ai nkaja ai,jaw ai njaw ai ngu ai hpe grau nna mu chye wa na rai nga ai.

Anhte jawng laika ngu ai gaw machye machyang jat wa ai ngu na daram sha rai nga ai.Dai zawn laika hpan amyu myu hpe hti hkaja ai majaw gau ngwi ngwi myit nyan ningmu ni dam lada wa nna gara gaw laika kaja gara gaw nkaja ngu ai hpe ginhka mung chye wa na sha rai nga ai.

Laika law law hti hkaja ai lam gaw kaga ni hta myit masin kunghpan wa nna mahkrum madup hkum wa na rai nga ai.Dai hta madu hkum wanglu wanglang lu la wa nna madu myit nyan hte myit jasat ni gaw jaw ai hpe jaw ai hku mu nna jaw kaja ai hpe gwi gwi hte dawdan lu wa na sha rai nga ai.

Anhte kun dinghku hta mung manghkang lam amyu myu paw pru chye nga ai.Shinggyim kanawn mazum lam hta mung manghkang amyu myu nga nna myit masa amyu myu nga ai  majaw myit tau hkyem sa jaw ra ai lam law law nga nga ai.Dai majaw jaw teng kaja ai hpe shagrin daw dan na matu nloi la nga ai.

Hpaji chye chyang ai num gaw jaw teng ai hpe mu nna shagrin dawdan lu na atsam rawng nga ai.Hpaji chye ai ngu ai hta jawng laika hpaji chye nna janmau gup ai hpe sha tsun mayu ai nrai nga ai.Janmau hpaji mung ra ahkyak nga ai.Raitim Janmau nlu tim shinggan hpaji ni law law hkaja la lu mai nga ai.Hpaji lam,hkamja lam hta madang dep taw jang gaw shinggyim lam hta hpring zup wa sai ngu tsun lu ai.Shinggyim kanawn mazum lam gaw ta tut hpaji la ra nga ai.

Dai re majaw tsawra ai hkungga myu shayi num ni anhte prat awngdang lu na lam,kun dinghku awng dang ngwi pyaw na matu hte kashu kasha ni a lam woi kaja kanu byin tai lu na matu hpaji hparat lam ni hpe hkaja la nga ga law.

By:Mung Hkrang