Tsawra Shawang Myit Hte Gaw Gap Dap Ai Dingku

Anhte a prat a matu ngang kang ai ru pawt langai gaw jet ai tsawra shawang myit shanu nga ai kun dinghku dum nta shagu hta gawgap da nga ga ai.Tsawra shawang myit ngu ai gaw dum nta kaw nna hpang ai ngu ai mung, tsawra myit ni nnan byin shangun na matu ahkaw ahkang ni hpe shani shagu shalat galaw ya nga mung dum nta kaw na nan rai nga ai re.

Nang hpe ngai tsawra ai ngu ai hpe gara hku tsun ra na,tsawra ai ngu ai gaw kaning re ai lachyum rawng ai ngu ai hpe anhte kanu kawa ni,kashu kasha ni,kaji kawoi ni gaw kun dinghku dum nta kaw na sha sharin la nga ga ai re.

Kaja wa nga yang tsawra ai ngu n gup kaw tsun shapraw ai san san sha nrai tsawra shawang myit ni hte lai kyang shamu shamawt lam ni hte mung madun dan lu nga ga ai. Kaga masha wa tinang hpe tsun garan dan mayu ai hkam sha lam ni hpaw tsun ai lam hpe madat ya ai majaw shanhte hpe tsawra lam madun dan ya lu nga ai.

Dum nta hta sharin matsing la lu ai tsawra hku hkau ai lam ladat ni gaw uhpung uhpawng hta,jawng hta anhte hkrum zup kanawn mazum ai masha law law a asak aprat ni hte matut hkra taw nga ai re.

Langai ngai hpe anhte mara dat ya ai shaloi nang hpe ngai tsawra lu ai.Nang ahtu hkra galaw dat ai myit machyi hpa lam ni yawng hta nang gaw grau nna manu dan ai ngu ngai nang hpe mu mai ai ngu ai lachyum rai nga ai.

Karai hpaji ninghkring langai tsun ai hta mara dat ya ai lam gaw tsawra shawang myit a hpang jahtum masat langai rai nga ai,madat ya ai lam gaw nang hpe ngai tsawra ai ngu tsun ai hte bung ai nga tsun da nga ai.

Anhte madat ya ai ngu ai lam gaw kaga masha wa hpe jaw na matu manu daw dan nlu ai lam rai nna tsawm htap ai kumhpa langai mung rai nga ai.Manang wa tsun ai hpe atsawm sha madat ya chye ai wa gaw myit galu nga ai.

Kaga jasam wa hpe simani alum ala rai kanawn mazum ai lam gaw kaja tsawm htap ai lam rai nna kun dinghku prat hta mung nnga nmai galaw ra ai lam langai mung rai nga ai.

Simani sumnung shingdi ai lam,kaga masha wa a matu myit ya ai lam matsan dum chye ai lam ni gaw dum nta hta,kun dinghku hta hkap la ai lam,lanu lahku shimlum lam nga ai hkam sha lam hpe garum shalat ai lam ni rai nga ai majaw grai nan ahkyak nga mali ai.

Anhte myit galu hkam sharang ai lam mung tsawra myit madun ai lam rai nga ai. Anhte a kashu kasha ramma ni hta kaga masha wa gaw shanhte hpe tsawra ai ngu ai hpe chye hkam sha lu na matu ahkyak dik rai nga ai.

Anhte ramma ni gaw dum nta hta ntsawra hkrum ai ngu hkam sha jang gaw gara shara hta mung tsawra myit ngu ai hpe tam mu na nre ngu hkam la nna kaba wa chye nga ai.Anhte a kashu kasha ma ni hpe shanhte tsawra hkrum ai,shimlum lam lu la ai ngu ai hpe hkam sha chye lu na matu ladat shaw  garum ya lu nga ai.

Anhte kanu kawa ni kaw nna kashu kasha ni hpe myit ra hkan ya ai lam galaw ya gring ai zawn shadawn shadang masat galaw ya na matu mung ahkyak nga ai.Langai sha re ai tengman ai rit kawp tara gaw tsawra shawang myit kaw nna sa ai re nga ma ai.

Anhte kanu kawa ni kaw nna tsawra shawang myit hpe kasi kaja ni madun ai hku nna kaja dik htum ai hku sharin ya mai nga ai.Kanu kawa hte kashu kasha ni a kanawn mazum lam gaw kanu kawa ni a matu sha nre ma ni a kashu kasha ni matu du hkra grai nan ahkyak nga ai re.

Dai gaw gara hku tsawra ra ai ngu ai atsam rawng dik ai kasi kamang kaja nan rai nga ai.Anhte a dum nta hta tsawra shawang myit masa hpe jai lang ai gaw tinang a mungkan hpe galai shai ya lu ai ladat masa lam langai mung rai nga ai.

Hkrang Pan Sumla soi sara langai gaw Mungkan hta tsawm htap dik hpe hkrang pan (sumla) soi  na matu myit mada let dai gaw kaning re ai hpan rai na kun ngu let masha marai lahkang masum  kaw na shanhte mu hkap la ai lam htai ya na matu san dat ai da.

Dai shaloi mungkan hta tsawm htap dik gaw tsawra shawang myit re nga nna mahkawn num sha langai htai ya ai.Tsawra myit gaw myit ningtsang ni hpe myit pyaw lam hpe byin shangun ai,myi prwi ni hpe dwi sau shangun ai,tsawra myit nnga jang tsawm htap ai lam mung nnga ai da.

Simsa lam gaw mungkan hta tsawm dik re ngu nna hpyen la langai bai tsun dat ai ai.Majan gaw ntsawm nhtap ai,simsa lam hpe mu ai shara hta tsawm dik ngu ai hpe nangtam mu na re nga tsun dat ai da.Kam sham ai lam,tsawra ai lam simsa ai lam ngu ai hpe ngai gara hkum sumla soi na ngu myit yak mat let dum nta de wa mat ai da.

Nta chyinghka shawng hta shang wa ai shaloi kashu kasha ni a myi hta kamhpa kam sham ai lam mung,ningrum ningtau jan a mani sumsai hta tsawra shawang myit mung,dai hpang shi a dum nta hta tsawra shawang myit hte kam sham ai lam hte gawgap da ya ai simsa lam hpe shi kalang ta mu hkrup dat ai.

Dai hta shi mung mungkan hta tsawm htap dik htum hpe hkrang pan (sumla) soi dat sai.Shi lata soi dat ai kam sham lam,tsawra shawang myit,simsa ai lam hte gayau da ai hkrang pan hpe dum nta ngu mying shakap dat sai da.Dai re majaw kam sham lam,tsawra shawang myit,simsa ai lam hte gayau da ai kun dinghku hpe gaw gap la law.

By:Munghkrang