Dinghku Ngwi Pyaw Lu Na Ladat

Dinghku prat hta hkawm sa nga ai Nu wa hpu nau ni  Dinghku mahkrum madup nga sai kanu kawa myit su ni hpaji jaw da ai lam ni hpe tsun nga yang  anhte dinghku num dinghku la ni hkungran ai shani Madu Karai kasang a man Jau,Sara shawa masha mahkyin jinghku ni a man e nan Ga sadi da ga shaka hkam la sai hpe anhte kundinghku madu jan madu wa ni galoi mung myit hta dum nga na grai ahkyak ai re.

Dinghku hta madu jan madu wa shada da kam shamyet hkat chye na pawnba hkat na  mung grai ahkyak ai re.Shada kam hkat lu hkra re ai arawn alai rawng ai hte galoi mung madun hkat chye ra ai re.

Ndai zawn madu jan madu wa shada hkungga kam hpa hkat ai rai yang dinghku mung pyaw wa nna kashu kasha ni a matu mung grai nan ahkyak ai rai nga ai re.Anhte madu jan madu wa shada da myit tau ya ai hte shagrit shanem myit masa hte kanawn mazum hkat na mung dinghku hta ra ahkyak nga ai re.

Bai nna langai wa ra sharawng manu shadan ai lam ni hpe mai byin ai daram sharawng shara rai manu shadan hkan shatup ya na mung ahkyak nga mali ai re.Anhte a dinghku kata mayak manghkang lama ma byin pru wa yang dai manghkang a npawt rudi tam nna chye na hkra mahtai jawm tam hparan la ra nga ga ai.

Dai zawn manghkang hparan mai hkra shakut ai lam hta salum sai pru hkra daram hkam sharang shakut ra ai ten ni mung nga wa na re.Raitim shada da jahkrum bawngban galaw sa wa yang anhte a dinghku a matu manu dan ai akyu chyeju ni hkam la lu nna dinghku mung grau ngwi pyaw wa na sha rai nga ai.

Anhte madu jan madu wa yan a lapran nhkrum nra lam ni byin wa jang madu jan madu wa ngu ai gaw lahkawng raitim langai tai nga sai hpe anhte ni galoi mung myit dum nga ra ai.Dai hta n ga tinang a ningrum ningtau myit kaji garen hkrum nga ai ten machyi makaw n ji nmu hkrum nga ai ten hta tinang gaw shi a matu kaja dik ai manang tai ya ra ai hte ga ngwi ga pyaw shaga let tsawra myit madun let gawn lajang ya ra nga ga ai re.

Bai nna lama ma a majaw tinang a ningrum ningtau kaya hkrum sari hpoi na lam ni pru wa yang shi hpang maga ngang ngang tsap makawp maga na mung grai nan ahkyak nga ai re.Tinang a ningrum ningtau a jinghku manaw manang ni hpe tinang nan mung atsawm sha akaw alaw simani ai hte hkungga shaga ya ra ai.

Bai nna anhte a makau grup yin htingbu htingbyen ni hte mung myit hkrum rap ra si mani ai hte kanawn mazum na mung grai nan ahkyak nga ai re. Anhte madu jan madu wa shada shingjawng hkat ai lam gaw sari sadang arawng aya nrai nga ai.

Shada da tsawra myit madun hkat na sha hkyak dik lam rai nga ai.Anhte dinghku num dinghku la ngu ai arawng sadang hte bung pre hkra sari sadang hte tsun shaga hkawm sa na sha ahkyak dik rai nga mali ai.

Anhte gaw tinang a ningrum ningtau ra ai lam hta garum shingtau ya na galoi mung tinang gaw jin jin rai ra nga ga ai re.Tinang hta ra ahkyak ningshawng jaw ra ai lam ni nga wa yang mung tinang ningrum ningtau hte kashu kasha ni hpe shawng ningshawng jaw ya lu hkra anhte shakut hkawm sa ra nga ai.

Bai madu jan madu wa a lahkawng maga na jinghku jingyu ni hpe maren rap ra ai hte tsun shaga garum shingtau chye ra ai.Anhte nkau dinghku num dinghku la ni hta byin chye ai tinang maga na kahpu kanau jinghku ni hpe sha garum shingtau atsawm nga tsun shaga ma ai.

Kalang marang tinang a ningrum ningtau a amyu ni hpe mung nkaja ai hku shatan nhkan tsun shaga ai lam hpe tinang a ningrum ningtau shawng hta chye tsun ma ai re.Ndai lam hpe anhte ni koi nan koi gam ra ai.

 Bai nna tinang a ningrum ningtau bungli kaw nna shing nrai hkrun lam hkawm ai kaw nna du wa yang tinang kaw nna kabu gara mani sum sai hpe hkap tau la ra ai.Dai gaw anhte a kun dinghku ngwi pyaw lam hta grai ahkyak tang du ai lam mung rai nga ai.

Kade pu ba nna wa ai raitim tinang ningrum ningtau a mani sumsai kabu gara hte hkap tau la ai rai yang puba ai lam ni koi mat na sha n ga dinghku ngwi pyaw na tsi mung rai nga ai law.

 Ja gumhpraw hpe rau jawm tam jawm jai lang ai ladat hpe lang let jahpan tawn da,rau jawm bawngban nna hka nhkap hkra jai lang yang anhte a dinghku myit ru lam yawm na sha rai nga ai.Malu masha sha ai ten rau rau rai nna jawm sha tsawra myit madun hkat na mung grai ahkyak nga ai.

Anhte madu jan madu wa shada awng dang ai lam  mai kaja ai lam ni hpe shakawn shagrau ya nna shut shai gawng kya ai hpe tsawra myit madung da nna madi madun hkat ai shaloi ntsa kaw nna amying jaw ai,jahpoi asawng ai mara shagun ai,sara galaw ai zawn rai tsun shaga ai lam hpe nbyin pru hkra sa di sahka tsun shaga na mung anhte hta grai nan ahkyak nga ai re.

Madu jan madu wa shada da manu shadan shareng ai lam madun nna n gup aga hte mung tsun dan hkra ra ai.Dai re majaw anhte madu jan madu wa rau rai nna Nawku jawng sa ai,rau rau akyu hpyi ai lam gaw anhte a kun dinghku ngwi pyaw na matu ra ahkyak dik rai nga ai majaw lahta de na lam ni hpe hkan shatup ai rai yang anhte a dinghku gaw teng sha ngwi pyaw lu na re.

By:Munghkrang