Htawm Hpang A Matu

Tsawra ai ramma ni ya ten Covid ana gaw nmat mat shi nga ai, makawp maka tsi le sai nga tim, mung dang ting lu na matu, ya ten, mung masa lam a majaw mung lam amyu myu hku nna, tsi tsi hkam lu na aten langai gaw naw ra na shadu ai. Byim wa ai mung na sai hte maren hkam kaja lam mang hkang ni sha n ga, laga shinggyim kanawn mazum lam, sut masa lam yan ni de du hkra, hkra machyi wa nga ai, dai sha n ga law malawng myit hte seng ai mang hkang ni gu dek byim taw nga na re shadu ai.

Anhte a myit hpe tsang nga shangun ai lam yan ni kaw na madung re ai lam langai tsun u nga yang, kasing kasun re ai htawm hpang prat ngu ai lam rai nga ai, covid mung galoi she ngut na nchye ai, sut masa lam ni mung tsawm sha galoi bai lu hpang na nchye shi ai, shadawn jit na langai du hkra, mahkawng da lu ai ni mung, dai hpe sha matut tawn da ra na i, magam bungli langai ngai hpe galaw hpang gring sai kun ngu ai, myit yak lam ni byim wa nga ai, magam gun ni nga yang mung, bungli hta, ngang gring na i? myit tsang ra ai dai hta ya ya nan, bungli nlu mat ai ni, shata shabrai shayawm hkrum ai ni law law rai wa nga sai re.

Shyinggyim masha ni a ra kadawn ai lam ni hta, Security ngu ai shinglum lam mung lam yan langai hku shang lawm nga ai, Kun dinghku a shinglum lam, lu tawn da ai sut gan a matu shinglum lam, dai zawn sha bungli hte seng nna mung, ngang gring mayu ai, kam mayu ai, Mari ai masha nnga ai seng hta, magam gun masha ni hpe san yu u, kalang ta nga yang, lani lani hpa nba nna shata shabrai lu ai grai pyaw ai rai tim, mari ai masha nnga sai seng gaw galoi ten bungli hkring ra mat na nchye ai dai myit hkam sha lam gaw, maga mi hku shinglum lam nnga ai lam shanhte hta tsang pu tsangpa lam ni byim shangun nga ai, ya tatut hta, law malawng byim nga ai hkam sha lam ni mung dai rai nga ai, magam gun ni mung tsang ra nga ai zawn, bungli madu ni mung hkyen lajang ra ai lam ni hta mayak law law rai nga ai

Dai majaw ya ten hta, anhte ni hpa galaw gring nga ai kun? teng sha htawm hpang ngu ai a matu kadai wa mung hkrak tup lu galaw ya nlu ai lam rai nga ai, dai a matu anhte ni shakut ra ai lam yan masum hpe tsun dan mayu ai.

1.Tinang lu galaw ai hpa nga ai rai myit yu u, dai lam ni hpe myit maju jung nna galaw u.. kaja wa nga yang, ta tut anhte ni myit tsang nga ai lam yan law law ni hta, anhtr ni hparan lu ai lam ni nrai nga ai, anhte ni hting hkang lu ai atsam a shinggan maga de nga nga ai rai nga ga ai, ga shadawn covid galoi ten ngut na, makawp maka tsi galoi lu na, jawng ni galoi hpaw na, bungli magam ni gara hku bai byim wa na ngu ai zawn re ni rai nga ai. dai lam ni hpe myit tsang nga taw na malai ngai lu galaw ai hpa nga ai re ngu hpe tsawm sha myit let dai hpe sha myit maju jung let galaw sa u, dan dan leng leng nang nga pyaw wa lu na rai nga ai.

2.Madu hkum hpe shatsaw u, ndai covid kaw na anhte ni hpe sadi jaw dat ai lam ni law law nga ai hta na, tinang a kun dinghku ni hte hku hkau tsawra ai ni yawng hpe yu gawn lajang chye ra ai lam hte, hkam kaja lam hkan sa na matu ni law law rai nga ai, dai hta na kaba dik sharin hkam la lu ra na gaw tinang gaw hpaji a mayam nrai yang, ten nlata jam jau mat chye ai lam rai nga ai. Work From Home galaw ga ai hta, hpaji lam hta ding yang galaw nga ai ni chyu sha matut lu galaw na re ngu ndai shara kaw mu mada lu ai hta, lep top lu ra na, internet nga na nga yang, masan sa sai gaw rai nga ai, raitimung hpaji hpe madung nda ai  bungli nkau gaw, hkring sa mat ra ai hpe mu lu nga ai, ndai shara hta, madung dat hka ja da ai Specialized Knowledge nga na ra kadawn nga ai, dai hta n ga, tinang a atsam marai ni hpe galoi mung shatsaw sharawt ra na ra nga ai nrai yang, htawm hpang a matu nloi la nga ai ngu n gun jaw mayu ai

Ya nga yang magam gun ni shayawm wa ai, gara lam yan ntsa madung da nna magam bungli madu ni kaw na daw dan ai kun nga yang, bungli galaw ai ten hta, kade ram sadi sahka chye ai, kade ram madang sharin hkam la mayu ai myit rawng ai, kade ram shakut ai, shawang myit rawng ai ngu zawn re ni a ntsa yu nna daw dan mat chye nga ai, shanhte nra sharawng ai magam gun ni, nshakut ai ni, bungli hpe manu nshadan chye ai magam gun ni gaw, lawm mat chye nga ai dai a matu, madu hkum hpe shatsaw ra ai ngu ai shara hta, sharin dabang lagat na hpe sha tsun mayu ai nrai nga ai, ra kadawn yang lung ra na rai nna, dai sha n ga, bungli hta tinang bungli galaw ai hkrang, tinang a hkam la lam myit marai ni hpe mung sharai na ra ngu ai lam hpe chye na da shangun mayu ai.

3.Lani mi a matu, ten jahpan hpring hka galaw da u, nteng shi ai htawm hpang a matu hte seng nna tsun ga nga yang, anhte ni law malawng a mabyim masa ni gaw, pang lai hta  nyawng taw ai hte, sharaw langai makau kaw nnga nga ai sha shai nga ai, hka hkin gau nmu, lam nmu ai, nteng shi ai htawm hpang de sak hkrung nga taw ai ni hkrai rai nga ai, dai a matu  galoi hkin hkau de du na ngu ai myit mada lam ni hta tinang a shani shagu na galaw sa ra ai lam ni hpe myit maju jung lu na nga yang grau masan sa na shadu ai maga mi de mayak ni hpe asum jaw kau ai hku mung hkum galaw, pang lai hta yawng hkrum ai ni pyi shi asak hkrung lu na matu, jahtum du hkra htim gasat ai nga yang anhte ni mung madu a sak prat hpe asum nmai jaw kau ai

Dai majaw sak hkrung lam hta mai kaja dik hku sak hkrung ga, hkum hkrang shamu shamawt gin sum lam hpe galaw ga, malu masha atsam lu sha rai, yup hkru hkru rai ga, nta bungli galaw ai, tinang myit lawm ai hpe mung galaw ga, lani mi  yawm htum hkying hkum mi ram ten jaw na, hka ja shakut ga, madu hkum a atsam marai ni hpe   shatsaw ra ai aten ya ya nan rai nga sai,dai rai yang, myit marai hte seng ai lam hta madi shadaw ya lu ai zawn htawm hpang a matu mung akyu nga na rai nga ai, tsun lai wa sai hte maren shawng de hpa byim na gaw hkrak nlu tsun nga ai, myit tsang nga yang mung lachyum npru, dai majaw tinang lu galaw ai hpe galaw ga, galoi hkin gau de du na ngu na mung hkum myit mada taw, tinang a sak hkrung lam hpe mung galoi hkum shayawm kau, ndai myit masa ni gaw, nteng shi ai htawm hpang prat hpe man ap hkrum na mai kaja dik lam yan re ngu, mu mada lam hpe garan dat let lamang hpe ndai kaw naw jahkring sai.  

#youth

#rvakachinservice