Bungli Galaw  Ai Hta Pu Ba Nna, Myit Daw Nga Sai Kun? ( 23.5.2021 )

Bungli hta pyaw nga ai kun? nang bungli galaw ai hta, pu ba wa nna, myit daw nga sai kun? Computer shawng hta dung nna, bungli galaw na matu, madu hkum hpe kanawng  n-gun ni bai jaw ra yang, nglaw nmai galaw ra na lit magam langai zawn, bungli galaw taw nga yang, nang a bungli hpe myit htum wa sai gaw teng nga sai. Tinang a myit sawn lam kaw na, bungli nrai nga ai majaw, bungli galaw npyaw ai ni kaw sha ndai lam byim nga ai nrai nga, ra sharawng nna galaw nga ai ni hta mung, bungli a dip n gun ni a majaw, bungli galaw ai hta myit daw chye ai lam ni chye byim nga ai.

Dai majaw nang hpe ndai zawn myit hkam sha lam ni byim wa shangun ai lam ni hpe chye hkra shawng galaw na ra nga ai, raitim bungli galaw ai lam myit daw wa sai lam hpe shawng chye hkra galaw u, gara hku chye hkra mai galaw ai i nga yang, nang hta bungli galaw ai lam ajin aban rai nna, myit daw wa sai nga yang ndai kum la ni hte hkrum wa na re

Lagaw lata sharu mat ai zawn hkam sha wa na.... Nang gaw, bungli magam hta, npyaw wa nna, bungli galaw ai lam hta myit daw wa sai nga yang, lagaw lata sharu mat ai ( Sh) n gun atsam ni htum mat hkyet mat ai zawn hkam sha wa na rai nga ai.Ndai zawn re kum la ni mung bungli hta myit htum wa ai lam rai nga ai. Bungli hpe aten na na galaw nga na, bungli dip n gun law wa na nga yang, n gun atsam hkeyt mat na lagaw lata sharu mat ai lam ni aten nlata hkrum wa chye ai gaw, tara langai nan rai nga ai. Bungli pat nhtoi ni hta mung, atsawm hkring sa la nga ninglen, pu ba taw ai zawn, ngun atsam htum ai zawn byim taw yang, bungli hpe myit htum nga sai lam rai nga ai.

Myit Hte Seng Ai N gun Atsam Ni Yawm Wa Na....Ndai lam hpe bai yu yu yang, madu ra sharawng ai bungli hpe galaw nga taw tim, bungli galaw ai lam hta myit daw ai hkam sha lam ni byim wa chye ai, bungli hpe myit nlawm wa ai, lit langai a majaw sha, galaw taw nga ai zawn, myit hte seng ai n gun atsam ni yawm wa chye nga ai. Bungli hte grai tsan gang mat ai zawn hkam sha wa chye ai, bungli hte seng nna, myit rawt ai lam ni, myit shang sha ai lam ni mung yawm wa mat wa na, ndai zawn byim wa sai nga yang, magam dap hta, nang a galaw lu ai atsam ningja ni hkra machyi wa na teng sha rai nga ai, bungli kaw sha n ga, bungli shinggan laga lam yan ni yawng hta mung myit shang sha ai lam ni yawm wa chye nga ai hpe mu lu wa na re.

Ninghtan shai ai ningmu ni hte mu wa na. Ndai lam hpe mung sadi ra nga sai re, nang galaw taw nga ai project, lit la galaw da ai magam lam ni,nang a matu n ahkyak ai, nngut tim hpa nra ai ngu jahkring hkring myit sawn taw nga ai nga yang mung, bungli hta myit daw nga sai lam dan dawng wa nga ai. Nang a bungli ni gaw, nang a ntsa, lachyum npru ai zawn hkam sha taw nga yang, nang a bungli galaw mayu ai myit, myit htum nga sai sha n ga, bungli hta mung, madu hkam kam ai lam yawm wa ai zawn hkam sha taw nga ai rai nga ai, bungli hte seng nna, lam shagu hpe nkaja ai ningmu hte mu chye nna, ninghtan shai ai myit sawn lam ni hte myit sawn nga na nga yang, bungli magam dap hta, nang a galaw lu ai atsam ni yawm wa nna, shawng lam hkam kaja lam a matu mung, bungli a matu mung mai kaja lam byim wa lu na nrai nga ai ndai zawn byim hkrum nga sai nga yang, ngai bungli hta myit htum myit daw nga sai rai nga ngu chye da nna, hpa majaw ya na zawn byim ai ngu ai lam yan hpe sawk tam sa wa ra nga ai ngu n gun jaw shadum ya mayu ai.

Bungli galaw lu ai shadang ni yawm wa ai...Magam dap hta nang gaw, ya na zawn galaw lu ai lam ni hkrat wa sai nga yang, shawoi na hta bungli hpe n lu galaw nga sai, atsam dat nmai nga sai nga yang, bungli hpe myit daw nga ai kum la langai mung rai nga ai. dai zawn galaw mayu ai myit yawm wa yang, nang a htawm hpang a matu, kan bau magam bungli lam ni hta mung hkrat sum wa ai ni law wa chye nga ai, dai zawn byim taw yang , aten, ladaw langai hta bungli shapru katut chye nga ai majaw, dai bungli hpe myit htum wa sai kumla ni hpe  sadi tam la let, madu hkum hpe sharai ra nga ai ngu n gun jaw mayu ai.

Jahkring Hkring Hkum Npyaw Ai Zawn Hkam Sha Wa Ai...Nang jahkring hkring machyi mayu ai zawn chyu hkam sha nga ai nga yang, nang a hkam jan lu ai hkum chying ai lam yawm wa ai majaw rai nga ai. Dai hkum chying atsam yawm wa ai lam gaw, nang a bungli magam dap hta hkrum katut wa ai dip n gun ni a majaw, tsam pu tsam pa byim wa ai a majaw rai nga ai. Bungli hta pu ba wa yang, bungli hpe myit htum wa na rai nga ai, bungli hpe myit htum wa ai majaw, nang gaw jahkring hkring hkum npyaw ai zawn hkam sha wa chye nga ai, nang a myit hte seng ai hkam kaja lam ni hpe hkra machyi wa magang nang a hkum gawng shingran hte seng ai hkam kaja lam ni du hkra hkra machyi wa magang rai nga ai, ndai zawn byim wa yang nnag gaw, aloi hte machyi wa chye nga ai, nang a myit hta mung ten shagu ngu na daram, nga npyaw ai lam ni byim wa nga ai, dai zawn byim wa sai nga yang, nang a bungli hpe myit htum wa ia gaw, kaba la ai mang hkang langai rai nga ai hpe chye na da graing nga ai ngu gam garan dat let,

#youth

#rvakachinservice