“Simsa Lam A Ningnan, Kun Dinghku Hta”

Shinggyim uhpung uhpawng kata simsa lam gaw kun dinghku dum nta kata simsa lam hta hkan ai nga nna San Pra ai Augustine tsun shadum da lai wa sai re.Hpa majaw nga yang Shinggyim uhpung uhpawng gaw kun dingku dum nta law law hte jawm pawng da ai dum nta rai nga majaw re.

Shawnglam mungkan a simsa ngwi pyaw na matu gaw kam sharang ai,shimlum ai,maren mara rap ra ai lam ni lawm ai ninghpawt ninghpant ru pawt langai ra nga ai re.Kun dinghku dum nta gaw dai ru pawt nan rai nga ai.

Kun dinghku dum nta hpe hka garan ai,kaw si hpang gara ai lam ni kaw nna makawp maga lu shang she mungkan mungdan ni jawm pawng da ai mungkan dinghku dum nta kaba hpe simsa rawt jawng shangun lu na sha rai nga ai nga nna Mungkan rapdaw amu madu usa Kofi Annan  tsun lai wa sai.

Kun dinghku kata tsawra shawang myit shadawn shadang hta hkan nna gahkyin gumdin ai lam,myit hkrum mangrum  hprinem ai lam ni byin hpang wa ai rai nga ai.Tsawra myit hte kun dingku byin wa ai zawn matut nna ngang grin lu na matu mung tsawra shawang myit ra nga ai.

Kawa langai gaw shi kashu kasha ni a matu kaja dik ai hku galaw ya lu ai lam gaw shanghte a kanu hpe tsawra ai lam rai nna kanu langai a matu mung dai lam hte maren sha rai nga ai.

Anhte gaw tsawra shawang myit hpe tsun shaga ai hta laikyang hte grau nna madun dan lu nga ai.Bai nna anhte madu jan madu wa ni shada da kaja ai lam tsun shaga ra ai,mara shagun ai,gawng kya ai lam hpe madi madun tsun alun shaga ai lam n galaw ai sha kaja ai lam hpe sha tsun shapraw ra nga ai.

Mara shagun  ra ai lam nga jang n gup pat zim nga ai lam gaw  n kaja ai hpe tsun ai hta grau kaja nga ai nga nna Wa Sarabyin Francis mung tsun shadum da lai wa sai re.Simani sumnung shingdi ai ga,matsan dum chye ai laikyang ni gaw n gun dat ai lam kaji tim tang du masan sa ai lam kaba nga ai.

Dai ni tsun ai tsawra matsan dum ai ga gaw hpawt ni  nang malap kau yang malap na re  raitim na la ai wa a salum hta gaw prat tup masing nga na sha rai nga ai.Sumnung shingdi ai ga tsun shaga jang pawt ai lam hpe la kau ya lu nna,mazut mazai ai ga tsun jang gaw pawt ai lam hpe grau sawng shangun na rai nga ai.

Anhte kun dinghku dum nta hta hkam sha ai tsawra shawang myit hta kabu myit pyaw ai lam gaw nawku hpung a kabu hpa lam mung rai nga ai nga nna Wa Sarabyin tsun lai wa sai re.

Anhte a prat hpe bai yu dat yang kaba dik ai pyaw hpa lam gaw dum nta masha  ni kaw nna lu ai re lam hpe mu lu na re nga nna Joyce Brother tsun lai wa sai.Pyaw hpa lam gaw tsawra shawang myit  kaw nna pu pu si si wa ai lam rai nga ai.Dai re majaw anhte madu jan madu wa shada da mung kashu kasha ni hte kaga masha ni rau hkrum shaga yang mani sumsai hte tsun shaga ai rai yang shada da tsawra shawang myit ni grau nna law jat wa lu na rai nga ai.

Shinggan manaw manang ni hte hkrum yang gaw mani sumsai rai nna dum nta masha shada da tsun shaga yang gaw myi man nsam hten ai ni gaw jahpai chye ai ni re majaw jinghku kaja nmai byin nga ai.

Shat gawk kata shang ra ai kanu gaw man kahtet ai dam hpe hkam lu tim,sinda kahtet ai dam hpe nkam lu ai ma ai.Dai majaw ga tsun shaga hpaw dan ra nga ma ai.Shinggan de magam bungli galaw ai kawa gaw shingma kahtet ai lu hkam tim na kahtet ai nlu hkam ma ai.Dai majaw na kahtet ai lam hkyem sa na matu simsa katsi ai shara tam chye ma ai.

Ndai zawn shingra masa nbung ai lahkawng a lapran hta chye na ya ai,hkam sharang ya ai lam hpe gaw gap lu yang she myit hkrum mangrum gahkyin gumdin ai lam byin lu na rai nga ai.Simsa ai lam hpe ra sharawng ai dum nta hta myit tsaw myit htap ai lam nnga gring nga ai.

Jaw ai ngu shadu ai wa shawng hpyi nem tawngban ra nga ai.Anhte kun dinghku kata hta jai lang ra ai ga hkum masum hpe jai lang ga,dai gaw chyeju hte ,chyeju kaba sai ngu ai hte hpyi nem ai ga rai nga ai.

Hpyi nem tawngban lu na matu shagrit shanem ai myit hte myit madang tsaw ai salum ra nga ai.Myit madang tsaw ai wa chyu sha shagrit shanem ai manu hpe chye ai majaw rai nga ai.

Lama na dinghku dum nta langai gaw Madu Karai kaw maju tawn ginjaw shatai let sak hkrung ai rai yang Madu Karai gaw dai htinggaw hpe gahkyin gumdin shangun nna dinghku dum nta prat hta nhtoi chyeju jaw ya na rai nga ai.Yak hkak jamjau jamhkau hkrum sha ai ten hta Madu Karai garum ya ai chyeju hte laidi lu na rai nga ai.

Rau akyu hpyi ai dinghku gaw rau nga ai lu ai ngu ai ga gaw dingku dum nta mahkrum madup lam ni kaw nna pru wa ai tengman tara nan rai nga ai.Anhte a kashu kasha ni hta anhte jaw ai kumhpa ni mahkra hta shanhte hte rau nga ya ai lam gaw grau nga ai re.

Dai ni na prat hta kun dinghku kata kawa ni a aten jaw ai lam,myit maju jung ai lam yawm wa ai hpe mu mada nga ai.Kawa ni gaw shanhte a magam bungli,shanhte myit sharawng ai lam tinggyeng pyaw hpa lam ni hpe ningshawng jaw nna tinang a dum nta masha ni hpe saw sawn di lam ni law nga ai.Kashu kasha ni hpe aten njaw kabai da ai lam ni mu lu nga ai.

Kashu kasha ni kaji ai ten shanhte hpe aten nlu jaw ai ni shanhte prat ram wa ai ten tinang hpe bai yu lakawn na ngu ai hpe nau myit mada nmai nga ai.American Gumsan magam usa Barack Obama tsun ai hta anhte a prat gaw gap ai ru pawt hta kun dinghku dum nta gaw  ahkyak dik rai nga ai.

Ndai rupaw hta kawa ni a shara gaw ahkyak dik rai nga ai.Shanhte gaw Sara ni hte kasi madu sara ni rai nga ai.Shanhte gaw up hkang gawn hkang ai wa mung rai nga ai.Shanhte gaw awng dang lam a kasi mung rai nna anhte hpe dai pan dung de du hkra kanawng shadut ai ni mung rai nga ai.Ndai shara hta ding ding man man sha tsun hkam la ga nga yang kawa ni law malawng  gaw dai hpe malap kau ai lam ni hpe hkam la ra nga ai.

Kun dinghku law law,prat law law hta kawa ni a shara mat taw nga ai re.Dai majaw kun dinghku  kri dung ru pawt  gaw kri dung wa ja nbyin ai masa hta nga nga ai.Kun dinghku hkabra ai lam law law hta kawa ni a lit nkang ka ai majaw madung langai rai nga ai.

Kun dinghku langai gawgap ai gaw nampan sun langai galaw ai hte bung nga ai.Aten jaw ai,marai shaw ai,bau maka gawn hkang lajang ya ai lam ni lawm ra nga ai.Dai majaw tsawra ai nu wa hpu nau ni kun dinghku sim sa ngwi pyaw na matu gaw dum nta masha langai hpra simsa na matu ra ahkyak nga ai law.

By: Mung Hkrang