Myit kadun pawt loi ai ningrum ningtau wa hpe gara hku lakawn la na

Myit kadun pawt loi ai ningrum ningtau wa hpe gara hku lakawn la na ngu ai lam hte seng nna tsun dan mayu nngai.Anhte kun dinghku nkau ni hta gaw ndai zawn re ai lam byin nga ai hpe anhte dinghku kanu num ni hkrum sha nga ai re.

Dai majaw tinang a ningrum ningtau wa masin pawt taw nga ai shaloi anhte ningrum ningtau jan ni hku nna myit hpe shawng asim sha tawn da nna yen da ya ra ai.Pawt taw nga ai ningrum ningtau wa hpe hkang zing na matu nmai shakut ai.

Anhte madu jan madu wa lapran pawt sindawng ai ngu ai gaw hkrit zang hpa laknak langai rai nga ai.Pawt sindawng ai majaw madu jan madu wa langai hte langai shada da nju ndawng hkat wa nna galoi mung nmu hkam hkat mat ai de du mat shangun nga ai re.

Grau nna masin pawt loi ai masha hpe grau sadi ra nga ai.Dai majaw masin pawt loi ai ningrum ningtau wa hpe gara hku lakawn la na ngu ai lam hta lahta de tsun lai wa sai zawn tinang a ningrum nintau wa masin pawt taw nga ai shaloi zinghkang na matu n galaw ai sha tsim nga yen kau da ra ai.

Dai nrai yang grau nna pawt wa shangun chye nga ai .Anhte ningrum ningtau jan ni kaw nna bai htang tsun marawn ai lam ni gaw shi a pawt ai lam hpe grau sawng shangun chye nga ai re.

Dai majaw ningru ningtau wa a pawt ai hpe nhkap la ai lam hpe madun ai hku nna jahkring mi yen kau da ai gaw kaja dik rai nga ai.Bai nna ahkyak lam langai gaw anhte dinghku kawa madu wa ngu ai ni gaw tinang a myit shingran myit ningchyan shamu shamawt ai lam ni hpe tinang a ningrum ningtau jan kaw nna hkungga manu shadan ai hpe ra sharawng ra nga ga ai re.

Ndai zawn hkungga manu shadan ai lam gaw madu jan madu wa lapran shada da kam hpa kam sham ai lam hpe jat wa shangun nga ai.Anhte ningrum ningtau jan ni hku nna tinang a ningrum ningtau wa shaga ai shaloi myit lawm hkungga ai hte madat ya hpaji ai madi shadaw ya ai lam ni hpe galaw ya ra nga ai.

Anhte koi yen ra ai lam gaw a daw a san ai lam,nmadat ya ai lam,nchye masu ai zawn re ai lam ni gaw ningrum ningtau wa hpe grau nna pawt shangun nga ai re.Bai anhte gaw tinang a ningrum ningtau wa a myit masa hpe chye na hkra shakut ra ai.

Ningrum ningtau wa kaw nna tsun mayu ai lam,byin mayu galaw mayu ai lam ni hpe atsawm sha madat ya ra ai.Mayak lam ni hpe tsun hpaw dan ai shaloi mung anhte gaw atsawm sha madat ya na matu mung grai ahkyak nga ai.Ningrum ningtau ni gaw hkrit tsang ai lam,yawn ai lam,myit kaji ai lam machyi ai lam hte gawng kya ai lam ni hta pawt singdawng ai de du wa shangun chye ma ai re.

Dai majaw kaga masha ni hte npawt hkat hkra anhte madu jan ni hku nna sadi jaw ra ai.Myit hkam sha lam ni hpe zinghkang lu hkra shaman shangun ra ai.Bai nna tinang a madu wa gaw pawt loi ai rai yang ningdang kalang nga ai lam ni hpe koi yen ra ai.

Manghkang lam ni hpe hparan wa ai shaloi mahtai amyu myu nga mai lam hte kaga masha ni a ningmu ni hpe mung hkungga ya ra ai lam ni hpe sadi jaw tsun shadum ra ai.Bai nna manghkang langai ngai hte hkrum wa yang myit masin asim di myit la let hparan na matu shakut ra ai.

 Dai rai yang pawt ai lam yawm wa na ra ai.Madu wa a myit ai lam hkam sha lam ni hpe  zinghkang ai lam hpe koi kam ra ai.Dai majaw pawt ai majaw anhte a dinghku manghkang nbyin hkra myit asim sha hte galaw shakut hparan sa wa nga ga law.

By; Munghkrang