Kyang Lailen

Kyang Lailen hta kaja ai hte nkaja ai ngu nna, lahkawng nga ai.Anhte nang ngai ramma ni a prat rawt galu kaba wa lu na matu, kyang lailen kaja na gaw grai ahkyak nga ai. anhte a prat hta kyang lailen nkaja ai hpe madu da nga yang gaw, hkrat sum na lam de sha malawng na rai nga ai, ndai lam hte seng nna, laika ka sara ni, ja gumhpraw hkrat sum yang, nang hpa mung nsum shi ai, hkam kaja lam hkrat sum yang, lama mi hkrat sum sai ngu mai tsun nga ai, bai nna, kyang lailen nkaja ai hpe hkan nang hkan sa yang gaw, na a matu, yawng hte hkrat sum sai nga nna shadum da ai ga ni mung na yu ai

Kaja ai kyang lailen mi raitim, nkaja ai kyang lailen mi raitim shawng nnan hpang ai wa gaw, tinang hkum nan rai nga ai, kaja ai kyang lailen gaw, kaja ai lam de woi sa nna, nkaja ai kyang lailen gaw, nkaja ai lam de woi sa nga ai dai majaw,anhte nang ngai hta kaja ai kyang lailen ni rawng wa hkra npawt/hpang gaw de da lu na grai ahkyak nga ai. Dai ni na aten hta, nkaja ai kyang lailen a hkrun lam de hkawm sa taw ai ni law law hpe yawng hte mu chye chyalu rai nga ai re, dinghta prat ndai hta, rawt galu kaba wa lu na matu, ahkaw ahkang nga ai zawn, hkrat sum na lam de du shngun ai ahkaw ahkang ni mung grai nga ai, ningrai rawt galu kaba na lam hte hkrat sum na lam a lapran hta, mai kaja ai lam hpe chye lata la lu na matu bawnu hpe jai lang ra nga sai re.

Hpaji ninghkring langai gaw, dinghta prat hta shim lum ai shara ngu ai nnga ai, ahkaw ahkang ngu ai sha nga ai, nga nna mung tsun da nga ma ai, anhte ni hta lata la na ahkanw ahkang ni grai nga ai kaw na anhte lata la ai gaw anhte a matu sha rai nga ai re, kara gaw kaja ai, kara gaw nkaja ai ngu ai hpe karai wa jaw ai nyan marai hte chye daw dan la ra nga ai, nkau mi gaw, nkaja ai kyang lailen hta ten mat wa ai, na wa yang dai lailen hpe kau da na matu, grai yak hkrak wa ai hpe yawng mu chye lu nga ai re. Dai majaw nkaja ai lailen hpe gaw, nnan kaw na nhpang u ga matu sadi da ra ai. Ga shadawn Tsa chyaru hpe lu lang ai wa, ten ladaw grai na hkra lu lang mat wa yang, na jang tawn kau na grai yak mat wa na re, dai zawn sha hpai da da ai wa mung, dai hte maren bungli shaja galaw na, hkau hting hkau na galaw na matu, myit nrawng mat sai, dum nta kaw na nga ma nga arung arai ni hpai da da de du wa na gaw teng sha rai nga ai.

Bai nna, dai ni na ten, nang hpam tsi mawan ni myu hpan hkum hkra pru taw ai ten, anhte nang ngai ramma ni sha nrai, masha kaba ni du hkra, len yawng lawm wa nga ai hpe yawng hte mu chye na chye ai ni hkrai rai nga ga ai, nang hpam tsi mawan  hpe jai lang ai, ndai n kaja ai lailen gaw,  prat a yaw shada da ai ban dung hpe la kau, shamat kau ya lu ai hpe chye da ra ga ai. ndai lam hte seng nna, mabyim langai hpe yu ga nga yang, lani mi hta slg lahakwng shak gawk e tsa lu dung taw nga ai, tsa hpe nnan sha naw lu taw nga ai, dai nta madu a kasha langai mi, e ..wa... nu grai machyi sawng wa ai tsi sara sa shaga ra ai nga nna, sa tsun ai hte, shan lahkawng kalang ta , tsi sara hpe sa shaga na matu, le mat wa ma ai, tsi sara hpe sah shaga na matu, hka lam hku nna sa ra ai majaw, hka li hte tsi sara nga ai mare de sa mat wa manu ai, hkying hkum mi ram hka li gawt yu wa ma yang, hka kau na lagat hpun npu e, tsa seng langai hpe mu dat ma ai, shaloi manang langai wa gaw, sa law hkau e, tsi sara wa a mare ya jahkring nga yagn du sai, tsa loi mi chyawm naw lu la ga law nga nna, sa dat ai hte, machyi taw nga ai madu jan hpe malap kau nhtawm tsa seng de lagaw yawng mat wa ai, dai yen lahkawng gaw hkying hkum kade na wa ai mung nchye mat raim jan du ningrim ten du wa yang she kajawng nna, tsi sara wa a nta de sa ra ai hpe dum wa ai majaw, tsa seng kaw na bai le wa manu ai, dai shana tup tsa nang let, hkali shap kau ma ai, gara de du ai mung nchye mat ma sai, jahpawt  myi mu san wa yang tsa nang ai mung prai mat masai, hkau kau de yu dat yang, shana shan yen lu ai tsa seng rai taw ai majaw, mau mat masai, hka kau e mana an lahkawng shana tup hkali shap tim ndai shara kaw sha rai taw nga ai, nga nna shada tsun taw nga ma ai. hka li baw de yu dat yang, hkali gyit da ai sumri nraw ai sha, shana tup hka kau kaw sha hkali shap kau ma ai.

Ndai mabyim gaw, anhte hpe dum shai shangun ai lam rai nga ai nang hpam tsi mawan lu sha jai lang ai a amajaw, tinang a du mayu ai shara de, nlu du mat ai, ahkying aten gaw, masha hpe nlat taw ai ngu ai hte maren, ten ladaw ni gaw, lai mat na sha rai nga ai dai majaw, kaji ten kaw nna, lailen kaja ni hpe bang da ra ga ai, kalang mi lu sha jai lang sai nang hpam tsi mawan hpe gaw, loi loi hte tawn da na grai yak hkat nga ai, anhte a prat gaw, shingyim  ga hte bung nga ai, shinggyim ga naw kya nga ai ten, tinang ra ai sumla ni lahpraw shingyin ni hpe mai galaw la nga ai raitim, ja mat jang tinang ra ai hku nna nmai galaw mat sai, anhte a ramma prat hta mung, kaja ai lailen hpe sha hkan sa ga, nkaja ai lam de hkamw sa nga ai manaw manang ni hpe mung, mai kaja ai lam de woi bawp la nga ga,

Ga shadawn nang hpam tsi mawan hpe jai lang sai ngu ga, nlu lu sha wa jang, nta na rai ni hpe myi ju wa na, hpang jahtum gaw kanu a hkungran la chyawp ni hpe du hkra myi ju wa na rai nga ai, mungkan ga a pyaw hpa len hpa ni gaw, jahkring mi sha rai nga ai hte maren, du wa na ten ladaw na ningbaw ningla kaja ni tai wa lu hkra shakut sa wa ga, anhte a mungdan hte nawku hpung gaw, daini na anhte nang ngai ramma ni a lata hta madung rai nga ai re, nsin hta pyaw len hkawm nga ai ramma manaw manang ni mung, lailen kaja de nhtoi de bai nhtang wa ga,

Lahta de tsun lai wa sai hte maren, lailen kaja hpe kaji ai ten kaw nnam hkan sa ra ai ngu tim,tinang myit malai let, nsin kaw na nhtoi de gayin wa ai shani gaw, anhte nang ngai a matu, prat nnan lu lai shani rai nga ai, hpa lam hta raitim, hpang hkrat ai ngu ai nnga ai, dai majaw tsawra ai ramma manaw manang ni e, nkaja ai lailen de,nhkam sa ai sha, lailen kaja hpe machyu nhtawm myu sha ni yawng a mtu, nawku hpung a matu, htoi tu shagan ni tai wa lu hkra hkawm sa wa ga ngu gam garan dat lu nngai.

#youth.

#rvakachinservice