Simsa ngwi pyaw ai mungkan byin hkra gaw gap ga

India mungdan Karlakatar muklum hta na Sasana magam gun lai wa sai San Pra Mama kaba Mother Teresa  Nobel kumhpa lu ai ten htet ga hkum langai tsun ga ai gaw mungkan simsa wa lu na matu gaw na nta de wa nna dum nta masha ni hpe jet ai tsawra shawang hte tsawra u nga tsun lai wa sai re.

Anhte shinggyim masha shagu gaw myit simsa lam,simsa ngwi pyaw shimlum lam hpe lu na matu kun dinghku dum nta masha shada da hkungga tsawra manu shadan hkat ai kaw nna hpang let makau grup yin htingbu htingpyen jinghku jingyu ni kaw nna shinggyim masha yawng  hpe tsawra shawang myit hpe  garan gachan jaw ya ai lam ni rai nga ai.Anhte nkau kun dinghku dum nta ni hta kanu yan kawa nhprinem hkat,kashu kasha ni mung shada da nhkrum nra nga hkat ai kun dinghku ni law law nga nga ga ai re.

Lu su ai kun dinghku langai hta kawa kaw nna kanu hpe kaji ai ten kaw nna roi dang hkungran la ai majaw kanu hku nna mung kun dinghku a ntsa tsawra shawang myit nlu tawn da ai hte kashu kasha ni shangai shaprat da ai raitim kashu kasha ni mung shada da tsawra shawang myit nnga hkat ma ai.

Dai kun dinghku hta pawt sin dawng nju ndawng hkat ai,mangut tawn da rai let gumhpraw ntsa dung let  kangai kahprai ai myit masin hte myit pyaw lam nnga ai sha nga taw nga ai hpe mu yu ga ai.Kun dinghku dum nta hta tsawra shawang myit nnga ai majaw makau grup yin a ntsa hta mung tsawra shawang myit nnga ma ai.Dai makau grup yin kaw nga ai ni mung shanhte mu taw nga ai  majaw myit simsa lam yawm nga ra ai.

Bai tinggaw langai hta madu jan madu wa a prat hta sut masa lam nhpri nem ai raitim ningrum ningtau wa kaw nna shi a shangun ma hpe yu makawp maga da ai 10 jan mat sai.Dai majaw shanhte hta asak ram sai kashu kasha ni mung nga ai majaw hkabra na mung nmai byin ai majaw dai hku sha jawm pawng nga ai majaw dai amyu shayi hta myit htum  myit daw ana lu mat ai.

Kashu kasha lahkawng mung prat hta hpring zup ai raitim myit simsa shimlum lam nnga ai majaw kasha langai gaw nanghpam malu masha sha hte mungkan pyaw hpa lam hta baw bang mat ai prat de du mat wa nga ai.Dai re majaw tsawra hkungga ai nu wa hpu nau ni anhte kun dinghku shagu simsa ngwi pyaw shim lum lam lu la na matu gaw anhte kanu tai ai kawa tai ai ni ahkyak dik htum rai nga ai hpe dum nga ga.

By: Munghkrang