Pyaw Pyaw Rai Magam Dap Byim Na Matu ( Youth Program )

Magam dap pyaw na lam.... Tsun yang sha loi nga ai, raitimung tatut hta shadu da ai zawn nloi la nga ai. Magam dap kata hta  lam yan amyu myu a majaw, pyaw ai lam ni hkrak sum mat chye nga ai. Ga shadawn mazut ai bungli madu hte hkrum ai, mazut ai slg ni hte hkrum wa ai, myit masa nhkrak ai magam gun manang ni hte hkrum wa ai ngu ai lam yan ni a majaw, pyaw ai lam ni hkrat sum mat chye nga ai, kaja wa nga yang pyaw ai lam hpe madu hkum nan sha lu galaw ai lam rai nga ai, laga wa a majaw lu ai pyaw lam ni gaw matut ngang gring na nloi la nga ai.

Tsawra ai ramma ni, tatut mabyim masa hta, tinang hkum tinang rawt jat hkra shakut nga ai lam mung myit pyaw lu na matu kaja dik lam yan langai rai nga ai, magam dap kata tinang a bungli hpe kung kyang wa ai sha n ga, ndai hta grau ningtawn hkra galaw ai lam gaw, tinang hpe grau pyaw ai lam hpe jaw ya lu nga ai, tinang a ningja hpe shatsaw jat ai lam gaw madu hkum hpe kam wa grau lu galaw ya lu nga ai re, dai majaw, madu hkum hpe grau rawt jat wa hkra pan dung langai tawn nna masa lam jaw jaw galaw shangun mayu ai.

Bai bungli a matu  myit sawn u...tinang a bungli hpe gara hku grau kaja wa hkra galaw gring ai lam, Company a masing masa lam ni a matu, gara hku hpaji jaw gring ai, gara hku galai shai gring ai ngu ai lam ni hte tinang a makau grupyin, tinang a magam dap a matu grau kaja rawt jat lam ni hpe myit sawn ai lam mung, myit pyaw hpa langai rai nga ai.

Masha langai gaw: tinang tsawra ai magam bungli hpe awng dang shangun mayu nga ai, masha ni hte shingdaw ai shaloi, ndung de ndu ai raidi pyi maren awng dang shangun mayu nga ai, magam dap awng dang ai lam gaw tinang a awng dang lam re ngu, masat da ai ni yawng gaw ndai zawn sha myit mang galaw sa na rai nga ai.

Akyu ara lu la ai ngu ai hta gaw, tinang galaw dat ai akyu ni kaw na lu la ai amyat ni kaw na mung, bungli magam dap hta grau myit pyaw lam lu la shangun nga ai, ga shadawn tinang shakut ai a majaw shata kum hpa jat ai, kum hpa ni shagrau hkrum ai, ndai lam ni mung tinang hpe pyaw ai lam byim shangun ai lam ni rai nga ai, bungli galaw taw nga tim, masat masa galaw ya ai lam nnga wa ai rai yang, bungli magam dap hta pyaw ai lam ni yawm wa nna, ndai bungli na pru mayu ai lam ni hpe byim shangun wa ai lam ni rai nga ai

Rau jawm awng dang ai lam hkam la ai ngu ai hta gaw, Bungli hta project langai awng dang sai nga yang, yawng jawm pawng nna awng dang lam hpe hkam la ai lam mung, magam dap hta pyaw ai lam hpe jaw ya lu ai lam langai kaw lawm nga ai, ndai lam yan gaw hpa nrai nga ai zawn raitim, mgagam gun ni a matu gaw magam galaw shakut ai lam  hpe shatsaw ya lu ai masa langai rai nga ai ngu mu mada lu nga ai, awng dang wa ai ten yawng galaw ai a marang e, awng dang ngu tsun chye ai ningbaw wa a npu hta bungli galaw lu ai magam gun ni gaw, magam dap hta grau nna pyaw wa lu nga ai hpe mu mada lu nga ga ai.

Magam dap kata hta garum shingtau u ngu ai hpe bai yu yu yang, tinang bungli law taw nga tim, dang di ai daram laga wa hpe garum shingtau u, laga wa hpe garum ai a majaw,laga wa masan sa mat ai hpe yu dat yang lu la ai hkam sha lam gaw, hpa hte nbung nga ai, myit dik myit pyaw nga ai re, garum ai ngu ai hta rip kawp nga nga ai, dai lam gaw, tinang garum dat ai lam gaw myit mada lam nlawm ai garum ya ai lam byim ra ai, ngai gaw shi hpe garum da ai ngai shaloi mung shi bai garum ra na ngu ai hte nmai garum nga ai ngu shadum n gun jaw mayu ai.

Manang kaja tam u ngu ai hta gaw: tsawra ai ramma ni, magam dap kata tinang a ntsa hta mai kaja lam jaw ya na manang ni tam la gring nga ai, ndai lam mung nang hpe pyaw ai lam hpe jaw ya nga ai re, jawng ma prat hta sha, manang kaja tam na loi ai hkum shadu, magam dap kata ni hta mung, manang kaja tam la lu na nyak nga ai

Pyaw ngawn ai sak prat a npawt madung lam ni hta, manang kaja, jinghku kaja lu na matu mung ra ahkrak ai kaw shang lawm nga ai, dai majaw bat mi hta hkying hkum 48 daram aten htum nga ai bungli magam dap hta, tinang a ntsa chye na ya ai, tinang hpe garum ya chye ai manang gaw, nga na ahkayk la nga ai

jahtum hku nna tsun ga nga yang, tinang a sak prat ten law law gaw bungli magam dap hta bang da hkrum nga ga ai re, dai majaw bungli magam dap hta pyaw na matu ra kadawn nga ai,  tinang a pyaw ai lam gaw nang sha gin shalat lu nga ai, Pyaw ai lam nlawm nga ai bungli magam dap gaw hkun hkraw taw ai hpun langai hte bung nga ai awng dang ai apu asi ni nprut wa lu ai zawn, nga taw nga ai lakung laking ni mung nnan nprut wa ai sha n ga nyip mat wa chye nga ai dai zawn sha, tsawra ai ramma ni npyaw nga ai magam dap gaw magam gun ni a matu, tinang a atsam marai ni, gin shalat lu ai lam ni, shakut shaja ai lam ni gaw hkang nhkang ai sha n ga manu nnga mat chye nga ai re, dai majaw pyaw ai magam dap hpe lata na matu nang hkum nang sha daw dan lu ai rai nga ai, nang a lata ai lam gaw nang a pyaw ai lam hpe jaw ya lu nga ai ngu gam garan dat let

#youth #rvakachinservice